Luke 12

1Koruruckey om yoto piko elifunek ce caŋ koromun, okoy kutyickey cek nkit. Kunyosyo Yesu kuŋololyi kumwoci kule, “Oripkey mumarekap Farasayek ce kaperperot cekto. 2Omnye puryo kiy nye yelat yawut nye puryo kot ceŋonye koyin kutok, oŋnkupuryo kiy nye wuŋat yawut nyemo ciporu koyin kutok. 3Kunyo nka mpo ŋalek ce kyoŋolole wule wuŋat, mosicelim coto ye pet kwen; mpo ŋalek co kyocome korik orit, mosicemwayta cekurte korik kisyek.’’ 4“Komwowok ani akwek coronutekwani kule, monte ciywey piko co poköce porto nkit, nto om letut kupuryo kot komuce kwiy kito ake tokol nye miyat. 5Kunyo mosoporwok ani cito nye roke aywey akwek. Aywey Yiyintet nyo ye kapakäc kuponto kamukeywek kuwirciŋ wule mite mata nye momise. Kunyoto nye omwowok ani akwek kule aywey neto. 6Puryo kot kyole cek titiyinek mut tampuranik oyeny? Nto om konyekap Yiyintet kupuryo kot ceyutye cek mpo akenke? 7Nka mpo putekap metewokwok kiciyit tokol. Kunyo monte cemuye, omnye oponte akwek latik ce caŋ koromun kupël titiyinek ce caŋ.’’ 8“Komwowok ani akwek kule, ci tokol nye kaŋalal kutor om wule mite piko kule oyiku nyimwani, mosukuparta kutor Weritap cito neto nyoto koyin om taytap malaykanikap Yiyintet. 9Ntene ci tokol nye katay maŋalal kuparta ani Weritap cito om wule mite piko, mosicetay mociparta neto nyoto koyin om konyekap malaykanikap Yiyintet. 10“Mosicikalya ci ake tokol nye kaŋalale kwapi Weritap cito ntene puryo kot cimuce kot cikalya mpo kisic ci ake tokol nye kaŋalale kwapi Muyet Nyetilil. 11Nteye kocekwerok akwek wocewosontyok om korikapkok nto om taytap piko co ponto kamukeywek, nto om taytap poyik, monte cisot kule mosiceŋalal kulene, nto kule mosicemwowu ne ye ceyetekey. 12Omnye mosukunetak akwek Muyet Nyetilil om yoto ŋalek ce mosomwowu.’’ 13Kuŋalal citake om kwenutap piko kumwoci Yesu kule, “Konetintet, mwoci yeyamwani cepcicine oko ani tukuk ce kipokokwec acek Papanyo.’’ 14Kuwekyi Yesu kumwoci neto kule, “Corwenyu, ŋo nye kikono ani oyiku ketintemwoŋ nto pciyintemwoŋ?’’ 15Yoto kumwoci Yesu piko tokol kule, “Akäste, oripkey akwek wule mite corokyinot ake tokol, omnye nka kot kuponto cito mokoryonti nye tya, kupuryo kot kumuce kokoci cicoto tukucoto ponto soponto.’’ 16Kumwoci Yesu cekto tyonkoconi kule, “Kiponto mokoryontet ake mparenyi nye kiyiwu kurur topon koromun, 17kusot om moyenyi nkit kumwoy kule, ‘Mosayiy ne ani? Omnye puryo kot oponte wule mokisyi omikyu cu tokol.’ 18Kumwoy nkit kule mosayiy kule, ‘Mosoput cokenikwani aŋnkatec alak cewoyec, saŋet akonore wuloto omikwani tokol oko tukukwani alak; 19nto kapok omwowu nkit om moyenyu kule, ponte nyi tukuk ce caŋ ce konorotin ce mosukuwany kenyisyek ce caŋ, kunyo muny, yesye, yomisye, oŋnkiŋerec.’ 20Ntene kumwoci Yiyintet cicoto kule, ‘Nyi perperyani! Om kwomwowuni po yawut, mosicinumuneniŋ soponŋuŋ, kunyo mosukupoyit ŋo tukuk coto kikonor nyi?’ 21Kuyunyoto wule yunto om wule mite cito nye konorkyinikey mokoryonti, ntene oŋnkupuryo kot ku mokoryo om wule mite Yiyintet.’’ 22Kumwoci Yesu konomikyi kule, “Yunyoto omne saŋet ani omwowok akwek kule, monte cisot soponwekwok kule mosikyam ne, nto kule mosicilac ne. 23Omnye pële soponto omik, oŋnkupële porto sirok. 24Akäs pa pkukinek ce puryo kot kukolsyi nto kukisis, ce puryo kot kuponto wule konore omik nto mpo cokenik, ntene oŋnkupoye Yiyintet cekto! Oponte akwek latik ce caŋ kupël toritek! 25Ŋo om akwek nye ye komuy oŋnkusot koromun ce nöme sopon nyi; nye muce kot kutosyi kucaŋit kenyisyek alak cepo sopon nyi? 26Kunyo nteye puryo kot omuci akwek kot ayiy kiy nye kisic nye yunyo; omne sasoti akwek ce nöme tukuk alak? 27Akäs pa kuyu wule pititoy taptok om koret, puryo kot kwiyisyi oŋnkupuryo kot kunope sirok ce loce. Ntene komwowok ani akwek kule, nka mpo Solomon om woyintap mokoryontit nye kiponto, kipuryo kot kulocekey neto topon kuyu akenke om toptocu. 28Kunyo, nteye muce Yiyintet kot kulac suswek ce mite koret pesyoni nto mite tun cewirci mata kuloy, ku aret ce tya nyun ce muce kulacak akwek Yiyintet? Oyiku akwek pic ce ponto koyenet nye kisic pate! 29Kunyo monte ceceny kiye mosoyam nto ce mosoye, monte cisot. 30Omnye cenye mpo pikap koret tokol tukucutecu: ntene om wule omite akwek, nkete Papamwoŋ kule omöce akwek tukucutecu. 31Kunyo onyosye aceny oŋnkokoci kunyor soponwekwok poytoyisyetap Yiyintet, sukuŋet cetoswok akwek tukucutecu.’’ 32“Monte cemuye akwek luket nyi miniŋ! Omnye ŋerekat Papamwoŋ kokonok akwek poytoyisyet. 33Oyalye tukukwok oŋnkokoci pononik pesanik, oŋnkokonorkyikey akwek munyenkutap pesanik nye puryo kot kuyositu kupunto, okonore mokoryontinekwok torot wule puryo kot kurice corik oŋnkupuryo kot kwome solopik. 34Omnye wule mitowune mokoryontinekwok ku wuloto wule mitowune mukuleywekwok.’’ 35“Omotyi sirokwok suwe, oŋnkoyaste tarinekwok kuloytos; 36akerkeyitu pic ce mite kukonye mokoryontemwa nye mosukuwecekey kucone sakwetap komütisyet, nteye kaweckey neto oŋnkukonykony kurket kuyotyini lakwar. 37Ponto kupeyoy mutworik co ye kaco mokoryontemwa cokunyor cekto kumite kukösu kukenisyi! Komwowok ani akwek ŋalek cepo manta kule, mosukuco cicoto wo; oŋnkucokulackey oŋnkusat cek kopur ŋony topon oŋnkupoyis. 38Ponto kupeyoy mutworik ce ye kaco nyewo panta nyepo oyeny ye komoy kwen oko panta nyepo somok ye kerir koret cokunyor cekto kumite kuyunyoto. 39Möce oŋnket akwek topon kule, ntenkete citap koto sawet nye cone corintet nto puryo kot komuce cicoto kupapakta konyi kuput oŋnkowut orit corintet. 40Kunyo mpo akwek misyini oyiytekey, omnye mosukuco Weritap cito om sawet nyo puryo kot osotyini akwek kule muce kucone.’’ 41Kumwoy Petero kule, “Mokoryontet, mwowec acek nkit tyonkoconi nto mwocini mpo piko tokol?’’ 42Kuwekyi Mokoryontet Yesu kumwoci kule, “Mwowo ani pa, ŋo mutworin nye cikenekey oŋnkuŋom? Nyoto kunye ye kokukoci mokoryontenyi kurip yisyonutekap kanyi tokol, kupcicini pikap yisyet omikwa om pesyet nyo cemokyini. 43Ponto kupeyoy mutworintonoto nye ye kaco mokoryontenyi cokunyor neto kwiye yisyenyi kuyunyoto. 44Komwowok ani akwek ŋalek cepo manta kule, mosukuco mokoryontet oŋnkukoci mutworintonoto kupayta tukukyi tokol. 45Ntene ye kumwoy mutworintet om moyenyi kule, tokulow ye mosukuco mokoryontenyu, oŋnkucec kupir piko moronik oko koruk co yiyisyi, oŋnkwomis oŋnkuyesyo kupokit, 46mosukupun mokoryontenyi om pesyet nyo puryo kot kusotyini, oŋnku om sawet nye puryo kot kunket neto, oŋnkunäm mutworintonoto kuyepune oyeny, oŋnkuwunukyi kunyor taŋanynta wanak oko piko co puryo kot kucömisyi. 47“Nto mutworin nye nkete ce möce mokoryontenyi kule kwiy neto; oŋnkupuryo kot kusat nto kwiy kuyu wule moktoy mokoryontet, mosicepas neto nyoto korokonik ce caŋ. 48Ntene mutworin nyo puryo kot kunket ce moce mokoryontenyi oŋnkwiy ce roke ce pase, mosicepas neto nyoto korokonik ce ŋeri. Nto ci tokol nyo kicikoci ce caŋ, mosicemake neto nyoto koyin ce caŋ, nto cito nyo kicikoci kurip tukuk ce caŋ, mosicemake neto nyoto koyin ce caŋ kutil coto.’’ 49“Kyaco ani cowirci mata koret, kunyo nto nkonkuyunyi kumite kuloye! 50Oponte patisanet nye mosicepatisana, kunyo mataŋany okoy koyin awany! 51Komwowok ani akwek kule, osoti kule kyaco asutu kalyet? Puryo kot kuyunyo, ntene kyosutu pate pciyatet! 52Kuceke yawut mosukupciykey piko mutu cepo koto akenke, kutay piko co somok piko co oyeny, kutay piko co oyeny piko co somok. 53Mosukupciykey kwan oko werit, kupciykey werit oko kwan. Kupciykey kamet oko cepto, kupciykey cepto oko kamet, kupciykey kametitap werit oko korketap werinyi, kupciykey korketap werit oko kametitap santenyi.’’ 54Kuwekyikey Yesu piko oŋnkumwoci kule, “Ye kokäs akwek polik kumite raraktay, yoto omwowu akwek lakwar kule mosukuropen koret, kuyuyit nyoto kuropen koret. 55Nteye kokäs kuwuse yomet nye cone tö, omwowu kule, mosukulay asista, kuyuyit nyoto kulay asista. 56Akwek koperperoticu! Yu oŋnket akwek okäs wule yunto tukuk ce mokwiyokis om koret parak, omne yu puryo kot omuci kot oŋnket ŋalek ce yiyoktos om pesyosyecu?’’ 57“Kunyo omne yu puryo kot omuci akwek kot orwoc nkit okoy oŋnket ŋalek cepo manta ce roke oyiy? 58Ye kowosontyiŋ citake kukweriŋ koti, syem koromun aŋalal olimncine oko cicoto ye tomite opeti om aran, oŋnkowany ŋalekwok, mente kot kukweriŋ okoy wule mite ketintet, kuŋet nyo kuratiŋ kukoytiŋ iwo wule mite sikarek, kuŋet co kukertiŋ mopusi. 59Komwowuŋ kule puryo kot muci nyi cone mopusi mpo kisic okoy konu pesanik tokol.’’

will be added

X\