Luke 11

1Kimite Yesu pesyet ake kusome om yeto ake, nteyu kowo kusom kot kuwany; kumwoci konomintenyi ake neto kule, “Mokoryontet, netec acek wule cesomntoy kuyu wulo kinetitoy Yowana konomikyi.’’ 2Kumwoci Yesu cek kule, “Ye some, omwowu kule: ‘Papa, kante-ciywey kutililit kayneŋuŋ, kante kuco poytoyisyeŋuŋ. 3konec acek omikyo ce cemöce pesyosyek tokol. 4kalyec acek miyotyonikyo, kuyu wulo cikolyoy acek co lele om wule ce mite acek, ntene mesutec royenec wule mite syemutok.’ ’’ 5Kumwoci Yesu konomikyi kule, “Ŋo om akwek nye ye ponto corwenyi, oŋnkuweci ye kopunto komoy kwen wokumwoci kule, ‘Corwenyu, peseno mukatinek somok. 6Omnye kacontyo tontet nye corwenyu ntene moponte kiy nye mokoci kwam.’ 7Kuwec nyin om koto orit kumwoy kule, ‘Mente ataŋany ani! Omnye kaceker kurket, kunyi kaceruye acek tokol oko lekok om kwiririt, puryo kot tomuci aŋet cokoniŋ kiy.’ 8Komwowok ani kule, nka kot kupuryo kot kuŋet cicoto cokukoci nyin tukuk ce komöce omnye corwenyi, ntene ye kosomso cicoto nye puryo kot kulilone kupunto muyot, mosukuŋet nyin kuco cokukoci kiy ake tokol nye kosome. 9Kunyo komwowok ani kule: Osom mosicekonok, aceny, mosonyoru, okonykony, mosiceyotwok kurket. 10Omnye ci tokol nye some, mosicikoci, nto ci nye cenye, mosukunyor; mpene neto cito nyo konykonye mosiceyotyi, 11Ci ŋo om akwek nye ye papa nyepo lekoy nye ye kosom lekwenyi purpuryo kukoci erenet ye ketekocini purpuryontet? 12Nto kukoci lekwenyi keneyontet ye kosom mekeyontet? 13Kunyo nteye oŋnket akwek piko cu oyiku miyotec okoci lekokwok tukuk ce toponec, ku aret cetya nyun ce muce kukoci Papa nyepo torot Muyet Nyetilil piko ce kosom!’’ 14Kukwet Yesu om yoto oyinot nye kiponto cito nye kinämakay kutit, nteye kowo kuwecikey oyinoto, kucec kuŋalal cicoto, yoto kukite piko koromun. 15Ntene kumwoy piko alake kule, “Yiyisye neto Pelsepul nyewo nyepo oyik sukuŋet kukwet oyik.’’ 16Yoto kusyem piko alake kumac kule kokonec Yesu pelutyet nye cone torot. 17Ntene kunket Yesu kasoteywekwa, kumwoci cek kule: “Poytoyisyo ake tokol nye pciykey oŋnkuporyekey nkit komuce nyo kupot, nto koto ake tokol nye pciyekey oŋnkuporyekey nkit kulule koyoto. 18Kunyo nteye pciyat Setani onkuporyekey nkit, kuyonye kulene poytoyisyenyi? Omnye omwowu akwek kule oyiyisye ani Pelsepul saŋet amuc akwet oyik. 19Nteye oyiyisye ani Pelsepul saŋet amuc akwet oyik, kunyo yiyisye ŋo pikwakwek sukuŋet kukwet oyik? Kunyo cekto ce mosukomutwok akwek musankut. 20Nteye oyiyisye ani swametap Yiyintet saŋet akwek oyik, kuporkey manta kule kucontyok akwek poytoyisyetap Yiyintet. 21Ye Ponto cito swama oko karik ce ripe kanyi, kuripotin oŋnkukonorotin tukukyi topon. 22Ntene ye kaco citake nye ponto swamet kupël nyenyi oŋnkuporye kot kupël cicoto, mosukunumune karik co kekenekey oŋnkusut kupör tukukap cicoto. 23Ci tokol nye puryo kot cepontekey oko ani, ku cito nyoto nye toyo ani, nto mpo cito nye puryo kot cirurukisyi tukway oko ani, ku cito nyoto nye serete.’’ 24“Ye kowete oyinoto nye miyat cito, mosukuwesetot kupunte koret wule puryo peko kuceŋoti wule möce kule komuŋe, nteye puryo kot kunyor, mosukumwoy nkit kule, ‘Mosaketitekey ani awo konyu nyo kyocone.’ 25Mosukuketkey kuco, nteye kocokunyor kicipuc oŋnkyesat topon. 26Yoto mosukuwo wokukwer oyik alak tisap ce miyotec kupël neto, kukwa oŋnkwokowut orit oŋnkumiŋis wuloto; mosukuwur yoto kopurtap cicoto nyepo letut kupël wule kiyunto kopurnyi nyo kipo kunyo.’’ 27Nteye kimite Yesu kumwowu ŋalecato, kukurune korket ake kwenutap piko kumwoci Yesu kule, “Ŋerekat nye ponto kupeyoy moyet nye kiyiŋ nyi, oko kitik ce kireri nyi!’’ 28Ntene kuwec Yesu kumwoy kule, “Topon ye kocemwoy kule, Ŋerekotin kuponto kupeyok piko co lime ŋolyontetap Yiyintet oŋnkurip!’’ 29Nteye kimite piko korurucekey wanak, kutosyikey Yesu kumwoy kule, “Pikap pini kuce piko cepo pinta nye miyat! Omnye tepe cek pelutyet, ntene puryo pelutyet nye mocikoci, tos pate palutyetap Yona. 30Kuyu Yona nye kikwek pelutyetap pikap Nenefi, Kuyunyoto musokwek Weritap cito pelutyetap pikap pini. 31Om pesyetap musankut, mosukuyo korko nye Kinko nye cone koretap tö oŋnkuwosontyi pikap pini, oŋnkomutyi musankut kulot cekto, omnye kicone korkono tapantap koret kule cakäs ŋomnonetap Solomon; kunyo möce akäs akwek kule mite yu nyewo nye pële Solomon. 32Om pesyetap musankut, mosukuyoŋ pikap Nenefi, oŋnkumutyi musankut pikap pini, omnye kirenynkey cek pikap Nenefi kwasta miyotyonikwa om ŋalek ce kimwoci Yona. Kunyo möce akäs akwek kule, mite yu nyewo nye pële Yona!’’ 33“Puryo ci nye pele tarit oŋnkutore wule wuŋat, nto kukupuye pesenit, ntene tore kito nye yoŋe tarit, sukuŋet piko co kwoni ko kukäs lakweyet. 34Koŋnta nyeŋuŋ kunye taritap porto nyeŋuŋ. Ye topon koŋnta nyeŋuŋ, mpo porto nyeŋuŋ tokol kuponto lakweyet, ntene ye miyat koŋnta nyeŋuŋ, mpo porto nyeŋuŋ tokol kuponto menonet. 35Möce ripkey oŋnkikäs kule lakweyinto nyo ponte nyi kunye puryo kot ku menonet. 36Kunyo ye ponto porto nyeŋuŋ tokol lakweyet nye puryo kot kuponto kereryantet ake menonet, mosukwek porto nyeŋuŋ tokol nye ponto lakweyet kuyu wule loytoy tarit nye loye topon kukwenyiŋ nyi lakweyet.’’ 37Nteyu kowo kuŋalal Yesu okoy kuwany. Kukur Farasoyintet ake Yesu wokwomis tukway om kanyi. Kuwo Yesu oŋnkuwokopur ŋony kwomis. 38Kukite Farasoyintonoto yu kowo kukäs kule komis Yesu nye puryo kot kowun yewuniyekyi. 39Yoto kumwoci Mokoryontet Yesu neto kule, “Po manta kule akwek Farasayek! Osite topon cikomponik oko saninek saŋ, ntene om montuwokwok orit kunyitotin nyapanatet oko miyotyet. 40Akwek solonocu! Yiyintet nyo kikwiye saŋ kupuryo kot ku neto nye kikwiye mpo orit? 41Ntene okoyite akwek kokotutek cepo tukuk ce kwone montuwokwok orit, sukuŋet kutililitu mpo tukuk tokol om wule omite akwek. 42“Ntene omite kwapi akwek Farasayek! Omnye okocini Yiyintet akenke nyepo taman cepo nkuyek alak tokol, kuyu munyanyinek oko mutunkurunek, ntene oŋnkoyaste morwoc topon, oŋnkotay mocäm Yiyintet. Roke oyiye coto, ntene monte kot ayaste tukuk alak. 43“Omite kwapi akwek Farasayek! Omnye ocöme ŋecerok ce kweyotin ce mite kotapkok, oŋnkyiyweyak cisupayak topon om moteponik. 44Omite akwek kwapi, omnye okerkeyekey mwenonik ce kicetupci piko ce puryo kot kutoku ce tyikoti piko nye menkete.’’ 45Kuwekyi konetintet ake nyepo ntarastinek kumwoci Yesu kule, “Konetintet, ye kemwowu nyi ŋaleca kukecupec mpo acek.’’ 46Kuwekyi Yesu kumwoci kule, “Omite kwapi mpo akwek konetikap ntarastinek! Omnye otorcini piko terekok ce nyikisec ce puryo kot komuce kot kutor, ntene oŋnkupuryo kot onöme akwek morin terkocoto! 47Omite akwek kwapi! Omnye kipakäc mpo kukomwoŋ workoyik; atec akwek kunyol mwenonik co kicetupci cekto. 48Oyiku akwek muncururwanikap ŋalecutecu, omnye ocöme akwek nkit ŋalecato kikwiye mpo kukomwoŋ, kipakäc cek workoyik, atec akwek mwenonik co kicetupci. 49Kunyo om ŋelecutecu, kumwoy ŋomnonetap Yiyintet kule, ‘Mosoyokte ani workoyik oko kiyokik alak kupa wule mite cekto, mosukupar cek alak om picoto, oŋnkutaŋany alak.’ 50Kunyo mosicitaŋany pikap pintap pesyosyecu kuyok korotikap workoyik co kicepakäc kupok kuceke ye kicitany koret. 51Kuceke korotikap Apel okoy korotikap Sakariya nyo kiceporci kwenutap otepto nye cepele korosek oko otepto nyetilil. Komwowok ani ŋalek cepo manta kule, mosicitaŋany pikap pintap pesyosyecu om ŋalecato tokol! 52“Omite akwek kwapi konetikap ntarastinek! Omnye kyokonor akwek funkuwet nyo yote kotap ŋomnonet; oŋnkupuryo kot awut akwek orit, ntene oŋnkokerekte piko alak ce syeme kule ciwut orit!’’ 53Nteye kinomene Yesu om wuloto, kunyer koromun Farasayek oko konetikap ntarastinek, kutepe cek Yesu om swama ŋalek ce caŋ; 54kusyem kule cetec neto sukuŋet cenäm om ŋolyo ake tokol nye cone kutinyi nye miyat nye mosukumwoy.

will be added

X\