Luke 10

1Yoto om letutap ŋaleca, kukwey Mokoryontet Yesu piko alak tomonwokik tisap ok oyeny oŋnkuyokto kuntoye kupetate oyeny oyeny kupa moŋosyek tokol oko komoswokik tokol om wule kimöce Yesu kule sawo om letut. 2Kumwoci Yesu picoto kule, “Wo koromun yisyetap kisisyet, ntene ŋeri pate piko co kisisyi, kunyo osom Mokoryontetap kisisyet sukuŋet kuyokto kisik alak kupa kisisyenyi. 3Ape, koyoktok ani kuyu lekokap kecirek ce kapa kwenutap suyik. 4Monte cenamate munyenku nyepo pesan, nto lol nyepo omit, nto kweyonik, ntene monte cisupay citake tokol om aran. 5Nto koto ake tokol nye konyosye owut orit, omwowu kule, ‘Kopur kalyet koyi!’ 6Nteye mite yoto citake nye ponto kalyet, mosukunyor cicoto kalyemwoŋ, nteye puryo kot kumite yoto, mosukukketkey kalyet wule omit akwek. 7Opurene koyoto, oŋnkoyomisye oŋnkoye kiy ake tokol nye kacekonok, omnye misyini ci nye yiyisyi kunyor musyarenyi. Monte ceŋete koyoto oŋnkape yec wowut koto ake. 8Nteye kopunte moŋet ake tokol oŋnkuŋerekyok piko, oyam kiy ake tokol nye kacekonok. 9Osop piko tokol ce cemnyontos om wuloto; oŋnkumwoci piko kule, ‘Korikyok akwek poytoyisyetap Yiyintet.’ 10Nteye kupunte moŋet ake tokol, oŋnkutay moŋerekyok piko, ape opunte orustunwek ce punte moŋonoto, oŋnkumwowu kule, ‘Puryo kiy nye mokyiwok acek akwek. 11Kunyo mocipukwok tertit nyi kanäm kerenkokyacek om moŋemwoŋ, ntene möce oŋnket ŋolyontoni kule, korikyok akwek poytoyisyetap Yiyintet!’ 12Komwowok ani akwek kule, om pesyet nye cemute musankut, mosukukaykay Yiyintet musankut nyepo Sotom kupël moŋonoto!’’ 13“Oyey! Mesepur kwapi nyi Korasin! Oyey! Mesepur kwapi mpenyi Pesasayita! Omnye nto kitukuk cepo kakitat co kiciwuŋ nyi kuce kicici coto Tiro oko Siton nto kikopur keny pikap wuloto ŋony, oŋnkulac sirok sarkatinek oŋnkuwastekey arek kupor kule karenynkey cek om miyotyonikwa. 14Mosukukaykay Yiyintet musankut nyepo Tiro oko Siton om pesyetap Musankut kupëlok akwek. 15Nto mpenyi Kapernaum! Kimöce nyi kule osutkey awo torot? Mosicewirciŋ wule mite mata nye momise!’’ 16Kumwoci Yesu konomikyi kule, “Ci tokol nye kolimwok akwek konomikwani; kulimwo ani cicoto, nto ci tokol nye katayak akwek, kutoyo mpo ani cicoto, nto ci nye toyo, kukatay cicoto neto nyo kiyokwo ani.’’ 17Yoto kuweckey piko co kitomonwokik tisap ok oyeny kuponto ŋerekwek ce caŋ, oŋnkwokumwoy kule, “Mokoryontet, kulimwec mpo acek oyik ye kucepolyi om Kayneŋuŋ!’’ 18Kuwekyi Yesu kumwoci cek kule, “Kyakäs ani Setani kosuwune torot kuyu ilet. 19Olim pa! Kwokonok ani ani kamukeywek ce omuci atyic erenoy, oko keneyisyek; oŋnkotirtir swamet tokol nyepo puniyontet, ntene oŋnkupuryo kot komuce kot kunyerenak akwek. 20Ntene monte ceŋerec omnye kolimwok akwek oyik, ntene aŋerec pate omnye silotin kaynokwok om wulin po torot.’’ 21Om yoto pakenke kunyor Yesu ŋerekwekap swametap Muyet Nyetilil kumwoy kule, “Ayi Papa, okostiŋ ani nyi Mokoryontetap torot oko koret, omnye kiwuŋe nyi tukucu piko ce ŋomec oko ce sumonotin, oŋnkiporci piko ce minkec. Yunyoto Papa, kiyiy kuyunyoto omnye kikwey ŋerekyi nyi nkit. 22Kikono Papa tukuk tokol, kunyo puryo ci nye nkete kule Werit ku ŋo, toskoy pate Papa nye nkete, oŋnkupuryo mpo ci nye nkete kule Papa ku ŋo, toskoy pate Werit nye nkete oko ci nyo kakwey Werit kule aparte.’’ 23Yoto kuwekyikey Yesu konomik; oŋnkuŋololyi möt kumwoci kule, “Ponto kupeyoy konyek ceköse tukuk ceyucu oköse akwek. 24Komwowok ani akwek kule, caŋ workoyik oko kinkonik ce kimöce kule nto cekäs tukuk ceyucutecu oköse akwek, ntene kipuryo kot komuc cek kot kukäs, nto kule celim ceyucutecu olim akwek, ntene kipuryo kot kulim.’’ 25Yoto kuŋet kuyo konetintet ake nyepo ntarastinek, oŋnkulot kutepe Yesu kumwoy kule, “Konetintet, mosayiy ne ani ye saŋet anyoru soponto nyemo poku?’’ 26Kuwekyi Yesu kumwoci neto kule, “Kicesil kulene om ntarastinek? Sumoni nyi mwowu kulene?’’ 27Kuwec cicoto kumwoy kule, “Misyini cäm Mokoryontet Yiyinteŋuŋ om mukuleyŋuŋ tokol, oko soponŋuŋ tokol oko swameŋuŋ tokol, oko kasoteywekuk tokol, oŋnkicäm latyeŋuŋ kuyu wulo cömntoykey nyi nkit.’’ 28Kumwoci Yesu cicoto kule, “Kewec topon, iwo weyiy kuyunyoto mesenyoru soponto.’’ 29Omnye kimöce cicoto kule ayetkey onyolu kutepe neto Yesu kule, “Latyemwani ku ŋo?’’ 30Kuwekyi Yesu kumwoci neto kule. “Kinomene citake Yerusalem kurekto kuwo Yeriko, kunyor corik om aran ce kiporye kunumene sirok, onŋkupir neto koromun, oŋnkupakakta kumilekey karik kume. 31Kuwete kurekte aranato mpo yec tisintet ake, nteye kotoköse cicoto kumur aret tapan. 32Kuco yec Lefintet om aranato okoy kupun yoto kimite cicoto, nteye kotoköse kumur mpene aret tapan. 33Ntene kuco Samariyantet ake nye kiweti pan nyi om aranato okoy kupun yoto kimite cicoto, nteye kotoköse kurire kukalya koromun. 34Kuwo okoy ye kimite cicoto, oŋnkunäm oŋnkuyile mwayita oko finyonik oŋnkurotyi mwoyokyi, oŋnkunäm kulany sikiryenyi oŋnkukwer okoy kupunto kotap toyek wokunyaye wuloto. 35Ntowo kuyec koret om pesyetap oyeny, kunum silinkinek oyeny oŋnkukoci cito nye ripe kotap toyek oŋnkumwoci kule, ‘Nyay cici, nteye kenyaye kot kutil tukuk cu kokoniŋ ani, mosucoyokuŋ ye kaweckey.’ ’’ 36Kutepe Yesu neto kule, “Ŋo om picoto somok nye soti kule kilatyetap cicoto kipire corik?’’ 37Kuwec cicoto kumwoy kule, “Neto cito nyo kikwici cicoto tukuk ce toponec.’’ Kumwoci Yesu neto kule, “Mpenyi iwo weyiy kuyunyoto.’’ 38Nteye kimite Yesu oko konomikyi kupeti panmwa, yoto kukwa okoy kupun kayta ake, kuŋerekyi korket ake nye cekure Marisa neto oŋnkupay. 39Kiponto korkonoto cekwam nye cekure Mariyam nye kipure yepo kerenkokap Mokoryontet Yesu kulimntoy ŋalek ce kimwowu. 40Yoto kutaŋany Marisa yisyonutek ce kimite kwiye, kuco ye mite Yesu oŋnkumwoci kule, “Mokoryontet, puryo kot köse nyi kule kokwoso ani yeyamwani ayiy yisyonutek nkit? Mwoci kuco cokukalya ani!’’ 41Kuwekyi Mokoryontet kumwoci kule, “Marisa, Marisa! Soti nyi koromun, oŋnkitaŋänkey om tukuk ce caŋ, 42ntene ce möce kiy akenke pate. Kunyo kakwey Mariyam kiyoto topon nye komocimuce kot cinumune neto.’’

will be added

X\