Luke 1

1Mokoryontet nye cekonyite Teyopilo, Kuyu wulo kusyem piko ce caŋ kusil ŋalek ce kikwiyokis om kwenunyacek. 2Kisil cekto ŋalek co kimwowec acek piko muncururwanik kosik co kiköse ŋalecutecu kuceke ye kicece, oŋnkumwaytat lokoywecutecu. 3Kunyo Mokoryontet nye cekonyite, omnye kwokir ani topon oŋnkasuman topon wule kicekta ŋalecutecu, asot mpo ani kule misyini asat topon oŋnkosiluŋ nyi. 4Sukuŋet nket mpenyi kule po manta ŋalek tokol co kicinetiŋ. 5Om kenyisyek ce kipoytoy Kinko Erote koretap Yuteya, kimite tisintet nye kicekure Sakariya nye kipo neto luketap Apiya. Kicekure kaynetap korkenyi Elisapet nye kipo aretap mpo Aron. 6Ki pic cek tukway ce kikwiye ŋalek ce toponec om taytap Yiyintet oŋnkurupe kuyweye ntarastinek oko ŋalek tokol ce möce Mokoryontet; nye kipuryo kot kowurtoy mpo kisic. 7Ntene kipuryo kot kuponto lekoy omnye kison Elisapet oŋnkukikiyosekitu tukway. 8Om pesyet ake ye kimite Sakariya kwiyisyi yisyenyi nyepo tisyontit kuyu kwak om taytap Yiyintet, omnye kinyenyi pesyet kwiyis, 9kuyu wule yunto yisyonutekap tisik, kikicekwey neto om kirotyet kupel korosek ce poŋu om otepto Nyetilil. Yoto kuwo neto kotap Mokoryontet. 10Kimite yoto piko ce caŋ kusome om saŋ om sawet nyo cepele korosek ce poŋu. 11Kuporcikey malayketap Mokoryontet Sakariya. Kimite malayket kukeyoŋe yewutap tay om otepto nye nyo cepele korosek ce poŋu. 12Nteye kotoköse Sakariya malayket, kulipil oŋnkumuy koromun. 13Ntene kumwoci malayket neto kule, “Sakariya! Mente omuy. Omnye kucelim somseŋuŋ, kunyo mosukuyiwuŋ nyi korkeŋuŋ Elisapet werit, oŋnkirut cekure kaynenyi Yowana; 14meseŋerec nyi koromun, oŋnkuŋerec mpo piko alake om pesyonoto koceye neto. 15Omnye mosukwek ci nyewo koromun om taytap Mokoryontet. Puryo kot kuroke kuye finyonik nto tukun alak tokol ce cepokite. Mosicikoci neto kunyor swametap Muyet Nyetilil kuceke pesyonoto koceye. 16Mosukuwec pikap Israel ce caŋ kuwekyikey wule mite Mokoryontet Yiyintemwa. 17Mosukuwesetot kwek kiyokintetap Mokoryontet kuponto nyikanatet oko swamet kuyu workoyontet Eriya. Mosukuwec poyik oŋnkotuyo kuyomokey wanak oko lekokwa, oŋnkuwec ŋomnonetap piko co kitoyis kumosokis kurup aret nye sote ŋalek ce toponec, oŋnkusat kopur topon kukenisyi pikap Mokoryontet.’’ 18Kumwoci Sakariya malayket kule, “Mosonkete ne kule po manta ŋalecutecu? Omnye oyiku ci nye kyayositu; nto mpo korkemwani kiyosit mpene kutil kenyisyek!’’ 19Kuwekyi malayket kumwoci neto kule, “Oyiku ani Kapuryel nye oyoŋe taytap Yiyintet; kunyo kociyokwani coŋololuŋ osutuŋ nyi ŋalecutecu toponec. 20Ntene omnye ketay meyen ŋalekwani ce mosukupoyit manta om pesyet nye kicekwey, kunyo mesesis nye puryo kot ŋololi okoy kupunto pesyet nye yiyoktos ŋalecu komwowuŋ ani nyi.’’ 21Kimite piko yoto kukonye Sakariya ntene kukite kumwoy kule, “Omne sukulilennkey nye tenyi om koto orit?’’ 22Nteyu kowo kumiŋ saŋ, kipuryo kot komuc yoto Sakariya kot kuŋololyi piko ŋolyo, ntene kuŋololyi cek kwiyisye yewuniyek pate omnye kanamakay kutit. Yoto kusowu piko kunket kule kakäs neto ŋoŋutyet om kotap Yiyintet. 23Ntowo kupok pesyosyekyi cepo yisyet om kotap Yiyintet, kuwecikey Sakariya kanyi. 24Yoto om pesyos ce ŋeri, kukoyakay Elisapet oŋnkuwunyenkey koto orit kuwany orok mut kumwoy kule, 25“Kunyo om yawut letut kakukalya ani Mokoryontet kuyunyi, omnye kokunumuneno nyilatet nyo kunyilo piko!’’ 26Om arawetap lö kuceke kakoyakay Elisapet, kuyokto Yiyintet malayket Kapuryel kuwo moŋet nye cekure Nasaret om koretap Kalilaya, 27wule kimite cepto ake nye kimukul nye kitompo kot kunket moron nye kimöce komüt citake nye cekure Yosep nye kipo aretap mpo Tauti. Cekure kaynetap cepoto Mariyam. 28Yoto kucontyi malayket Mariyam oŋnkumwoci kule, “Takwenyo! Ponte nyi kupeyok koromun; pontekey nyi Mokoryontet.’’ 29Nteye kotolime mariyam ŋalekap malayket, kulipil oŋnkumuy, oŋnkusot kumwoy kule, “Mwowu ne katakwesani.’’ 30Kumwoci malayket neto kule, “Mariyam, mente omuy, omnye kwenyoru nyi kupeyok om wule mite Yiyintet. 31Mesesic lekwet oŋnkiyi werit oŋnkirut cekure kaynet Yesu. 32Mosukwek nyewo koromun, oŋnkyekure Weritap Yiyintet nye mite torot koromun. Mosukukoci Mokoryontet Yiyintet neto kopure ŋeceretap kukonyi Tauti. 33Mosukwek Kinko nye mosukupayta aretap Yakopo okokoy, nto poytoyisyenyi kunye puryo kot kuponto ye ŋete!’’ 34Yoto kumwoci Mariyam malayket kule, “Muce kwiyakay ŋolyontoni kulene? Omnye oyiku mukul nye puryo kot öŋnket moron.’’ 35Kuwekyi malayket kumwoci neto kule, “Mosukucontyiŋ nyi swametap Muyet Nyetilil, oŋnkuyeneniŋ atotoytap swametap Yiyintet nye mite torot koromun. Kunyo mosiceyi lekwet nye mosicekure Nyetilil Weritap Yiyintet. 36Käs pa Elisapet cekwomet nye kicekure kule kisonen oŋnkukiyosit, kunyo ponto yawut orok lö kukoyat lekwa nye wero. 37Omnye puryo kiy ake tokol nye purune Yiyintet nye memuce kot kwiy.’’ 38Kumwoy Mariyam kule, “Oyiku ani mutworintetap Mokoryontet, kunyo kany kwiyokis ŋalek co kemwowu om wule omite kuyu wule kemwayte nyi.’’ Yoto kunomen malayket kuwecikey. 39Om pesyosyecoto, kuyiytakey Mariyam oŋnkunomen kusartakey om ŋerekwek kuwo moŋet nye mite lakomosyekap koretap Yuta. 40Yoto kuwo okoy wokumiŋnto kotap Sakariya oŋnkutakwes Elisapet. 41Nteye kotolime Elisapet katakwesetap Mariyam, kuwecweckey lekwet om moyenyi, yoto kunyor Elisapet swametap Muyet Nyetilil. 42Kuŋalal kupol om kutit nyewo kumwoy kule, “Ponte nyi kupeyoy om wule mite koruk! Oŋnkuponto kupeyoy mpo lekwet nye mite moyeŋuŋ nyo meyiy nyi! 43Omne sukwiyakay kiy nye yunyi om wule omite ani, akäs kule muce kuco wule omite kametitap Mokoryontenyu? 44Omnye yu kowo alim ani katakweseŋuŋ, kuwecweckey lekwet om moyemwani om ŋerekwek. 45Ponte nyi kupeyoy yen oŋnkiyen ŋolyontetap Mokoryontet kule mosukupoyit manta om wule mite nyi!’’ 46Kumwoy Mariyam kule, “Kostoy mukuleymwani Mokoryontet, 47oŋnkuŋerekat soponmwani om wule mite Yiyintet kosopintenyu. 48omnye kukusot topon wule ayunte ani mutworintenyi nye miniŋ! Kuceke yawut pesyoni. Okokoy mosukukureno ani piko cepo pinutek tokol nye ponto kupeyoy. 49Omnye kokwiwo ani Yiyintet nyepo kamukeywek tokol tukuk cewoyec. Kunyo Tilil kaynenyi. 50Porcini tolosyet pikyi tokol co yweye neto, kuceke piko cepo pinta ake okokoy cepo pinta ake. 51Kokuyito yewunyi nye ponto swamet; Oŋnkuseret piko co silekey om kasoteywekwa. 52Kokonumune poytoyik cewoyec ŋecerokwa; oŋnkutoror piko co cenyile kupa torot. 53Kapaye piko ce ponto rupet tukuk ce toponec, oŋnkukwet mokorenik kupeta yewuniyek pate. 54Kirip kirotyet nyo kikurtoci neto mpo kukonyo, kunyo kaco cokukalya mutworintenyi Israel; 55Oŋnkusot kule oporci tolosyet mutworintenyi Apram oko wule mite mucokoronikyi tokol okokoy!’’ 56Kopur Mariyam oko Elisapet kuwany kurikta orok somok, ntowecekey kuwo konyi. 57Yoto kuponto pesyosyekap Elisapet ce cömekey lekwet, kucämnkey werit. 58Kulim latosyekyi oko tilyonutekyi kule kakukalya kukoci Mokoryontet Elisapet kupeyok, yoto kuŋerec cekto tokol wanak oko neto. 59Ntowo kupunto pesyetap sisit cewon lekwet, kumac piko kule cerut kaynet cekure Sakariya kaynetap kwan. 60Ntene kumwoy kamet kule, “Puryo kot kuyunyo! Mocekure kaynenyi Yowana.’’ 61Kumwoci piko Elisapet kule, “Puryo ci mpo akenke nyepo aremwoŋ nye cekure kaynanato.’’ 62Yoto kuŋololyi piko kwanitap lekwet kwiyisye yewuniyek kutepe kaynetap lekwet. 63Kusom kwan rwantet nye cesile oŋnkusil kule, “Kaynenyi Yowana.’’ 64Om yoto pakenke kuyatakay kutitap Sakariya, oŋnkucec kuŋalal topon kukasta Yiyintet, 65Kumuyo latosyek koromun, yoto kuseret ceŋalalate lokoywek ce nöme ŋalecutecu tokol okoy kupunte lakomosyekap Yuta tokol. 66Nto piko tokol ce kilim ŋalecutecu, kuripe montuwokwa oŋnkutep kumwoy kule, “Mosukwek ne lekwani?’’ Omnye porukey kupoyit manta kule ponto lekwani swametap Mokoryontet. 67Yoto kunyor kwan Sakariya swametap Muyet Nyetilil, kuŋalal kuŋorsyo kumwoy kule: 68“Akany cikaste Mokoryontet nye Yiyintetap Israel! Omnye kaco korutoci cokukalya kutyac pikyi. 69Kakutororwec acek kosopintet nyepo swama, Nyoto ku nyepo aretap mutworintenyi Tauti. 70Kuyu wulo kikurtoci keny kupunune wule mite workoyikyi ce tililec, 71kikurtoci kule mososorwec acek om wule mite punikyo oko wule swametap yewuniyekap piko tokol co senkerec acek. 72Kimwoy kule mosoporci poypoyet mpo kukonyo, aŋnkusot kirotyenyi nye tilil. 73Kirotyet nye kiwolcikey kukonyo Apram, 74kuwalkey kule mososorwec acek om wule mite swametap yewuniyekap punikyo, oŋnkukonec acek ceyici Neto yisyet nye puryo kot ceponte muyot, 75om tililinto oko toponiyet om pesyosyek tokol cepo soponwekyacek. 76Ntenyi lekwenyu, mosicekureniŋ workoyontetap Yiyintet nye mite torot koromun; omnye mesentoci nyi Mokoryontet yiyitoci neto arenyi. 77Meseporci mwoci pikyi kunket kule mocisop cikalya cekto miyotyonikwa. 78Omnye kokolyoyin oŋnkutala Yiyintenyo. Mosukukon kuyec kolucec acek lakweyet nyepo soponto, 79nye luwu kucone torot cokoluwuci piko tokol ce mite menonetap met, oŋnkuketwec acek cerup aret nyepo kalyet.’’ 80Yoto kuner lekwet Yowana kunyor swamet om porto oko ŋomnonet nyepo Muyet Nyetilil, kuminy koretap kitela okoy kupunto pesyet nyo porcinekey neto pikap Israel.

will be added

X\