Jude 1

1Cone parwani wule mite Yuta, nye mutworintetap Yesu Kristo oŋnku mutakwametitap Yakopo. Osilwok akwek piko co kikur Yiyintet, piko coto kuce kikopurto cömisyetap Yiyintet Papa oko ripset nyepo Yesu Kristo. 2Kante opurte akwek kuyemak kokolyoyisyet oko kalyet oko cömisyet. 3Coronutekwani, kwasyem koromun kule osilwok ŋalek ce nöme kosopotet nyo ceponte acek tokol okoy asot kule misyini otitirok akwek yawut sukuŋet oporyeci koyenotet nyo kikokoci Yiyintet kowoŋnkyi pikyi. 4Omnye kukwa piko alake kucorkey okoy kwokowut wule omite akwek. Piko coto kuco wece lokoywek ce nöme poypoyetap Yiyintenyo sukuŋet kwiy ŋalekwa cepo sakwayanat oŋnkutay cekto Yesu Kristo nye konetintenyo oŋnku Mokoryontenyo nye akenke pate. Kiŋor silutekap Yiyintet ikye keny musankut nye mosukunyor cekto. 5Amöce ani kule osotwok akwek ŋalek alak ce kyonket tokol. Ŋalecato kuco kisope Mokoryontet Yiyintet kusor piko kukwane Misiri oŋnkwaranta om letut piko co kipuryo kot kuyen neto. 6Amöce ani mpo yec kule osotwok ŋalek ce nöme malaykanik co kipuryo kot kurip wule ŋete kamukeywek cikwa, yoto kwasta wule kiminye. Kirate Yiyintet cek nyororonik om wule mite menonet nyepo okokoy sukuŋet cewosontyi ye kopunto pesyet nyewo. 7Asot pa Sotom oko Komora moŋosyek ce kilekitec, kuce kikwiy mpecek sakwayanatet; kunyo kinyor toŋoŋutek om wule mite mata nye momise sukuŋet kwek kasowunot om wule mite piko tokol. 8Om aret nye kerkey mpo nyoto, kunye ponto piko cutecu ŋoŋutok ce wece cek sukuŋet kwiy miyotyet kowurta porwonik cikwa. Nyile kamukeywek cepo Yiyintet, cupe cek cewoyec ce mite torot. 9Nka mpo malayket nyewo Mikael om tintenotet nye kiponto oko Setani nyewo nyepo oyik om ŋalek ce nöme kule ŋo nye mosut musto nyepo Moses. Kipuryo kot kusyem Mikael kule acup Setani nyewo nyepo oyik, ntene kimwoy pate kule, “Kuwosontyiŋ Yiyintet.’’ 10Ntene cupe picutecu tukuk ce puryo mpo kot konkete cek nkit, nto mpo tukuk co nket kuyu wulo nketitoy tyoŋik cepo samiyita, kuce tukuk coto ce wurtoy kwaranta cekto. 11Mite picoto kwapi koromun! Kurup cek aret nyo kirupe Kain. Kukukoytokey cek nkit kurup aret nyepo leliswek kuyu wulo kikwiyta Palam. Kwesokyi cekto pesanik. Kutoyis kuyu wulo kitoyisyi Kora, kunyo kukwaran kuyu Kora. 12Kerkey cek simnyontet nye kilekenit om omikwok cepo sakwetap koyomotet. Omisye cekto mesanikwok nye moponto kalilan. Sötekey cek nkit pate. Kerkey oko polik co sute yomet ntene onkupuryo kot kuropene. Kerkey ketik ce puryo kot kwiye omik, kuyu ketik cepo yo karik kwek kemey koret ce kicikor oŋnkuyom. 13Kerkey cekto peko cepo ruretyet ce wuse yomet om ŋalekwa cepo kililan cetoku kuyu pukantet. Kerkey cekto oko kokelik ce mutukey ce kiyiytoci Yiyintet otepto nye mite wule mite menonet nye tuyi. 14Enok nye mucokoretap Atam, pinta nyepo tisap nyepo Atam kunye kiŋor ŋalecu nöme cek kumwoy kule, “Akäs! Kaco Mokoryontet oko malaykanikyi ce tililec 15ce caŋ cokuwosontyi piko tokol. Oŋnkumutyi musankut piko ce menkete Yiyintet ce ponto miyotyonik om yisyonutekwa ce miyotec ce kikwiy, oko om ŋalek tokol ce miyotec ce kiŋalale cekto neto kwapi.’’ 16Picutecu kuce ŋunyŋunye kwak oŋnkureny piko alak. Rupe pate corokyinotet nye miyat nyepo porwonik cikwa. Sutekey kuŋalal ŋalek cepo silotet oŋnkuperper piko alak kule sukuŋet cenyoru aret nye möce cekto nkit. 17Ntene akwek coronutekwani, möce asot ŋalek co kimwowok kiyokikap Mokoryontet Yesu Kristo. 18Kimwowok kule, “Ye kopunto pesyosyek nyepo letut, mosukutok piko ce kencururok, piko coto kuce puryo kot kopunto tini, ntene rupe pate corokyinotet nyepo porwonik cikwa nkit.’’ 19Picutecu kuce sutu pciyatet. Kipayta picutecu corokyinotet nye kiceyito nye puryo kot kupo Muyet Nyetilil. 20Ntene akwek coronutekwani, möce onerye akwek nkit om koyenet nye tilil koromun, oŋnkosom om swamet Muyet Nyetilil. 21Misyini opurte akwek nkit cömisyet nyepo Yiyintet, oŋnkoken soponto nye mopoku nye mosukukonok Mokoryontenyo Yesu Kristo om kokolyoyisyenyi. 22Mite piko alake ce mocömntoy topon, oporci piko coto poypoyet, 23Oporci yec piko alak poypoyet nye oripkey, ntene asenker sirok cikwa ce kimolokonitu om miyotyonik cepo corokyinotet. 24Kunyo om wule mite neto nyo muce kuripok akwek mente kot osute, oŋnkupartak oŋereci nye moponte lelis om taytap woyin nyi. 25Om wule mite Yiyintet akenke kosopintenyo, kupunte wule mite Yesu Kristo Mokoryontenyo. Kopurune Woyinto oko koyweyisyet oko swamet oko kamukeywek om kenyisyek ce kitil oko yawut oko okokoy oko okokoy! Yunyoto.

will be added

X\