James 1

1Ani nyo Yakopo nye Kiyokintetap Yiyintet oŋnkupo Mokoryontet Yesu Kristo. Osupoyi pikap Yiyintet cepo arosyek taman ok oyeny ce kiseretyi koret tokol. 2Mpo yeya, möce aŋerec akwek ye kokwontyok syemutok wok ce caŋ, 3omnye oŋnketi kule ye kacesyem koyenet nyimwoŋ yoto kuye omuytoci. 4Ntene möce akäs kule komuytoci nye puryo kot osutoy okoy pesyet nyepo letut, sukuŋet opoyitu manta owoŋnkyi nye puryo kot kupotwok kiy. 5Ye moponto ci ake tokol om akwek ŋomnonet, kumöce kusom Yiyintet nye mosukukoci. Omnye kocini Yiyintet piko tokol poypoyet nye puryo kot kukweye. 6Ntene möce kusome kuponto koyenet nye puryo kot kuponto montuwok oyeny. Omnye cito nye ponto montuwok oyeny, kunye kerkey nyo oko peko cepo ruretyet ce wuse yomet kuroye wuli oko wuli. 7- 8Cito nye yunyoto kunye puryo kot kuwoŋnkyi om kasoteywekyi, nye potpotone om kiy ake tokol nye yiye, kunye mente kot kusot kule mosonyoru kiy kucone wule mite Mokoryontet. 9Möce kusilkey yeya nye panan ye kelaŋnta Yiyintet nyoto. 10Oŋnkuŋerec mpo yeya ake tokol nye kocirekto. Omnye mesukupot Mokoryontit kuyu taptet nyepo ketit. 11Omnye mwoku asista oŋnkulay kupel ketit okoy kosuto taptet oŋnkupot toponiyet nyenyi. Kunyo mosikyaranta kuyunyoto cito nye mokoryo ye mite kwiyisyi yisyonutekyi. 12Ŋerekat kuponto kupeyoy cito nye kwilat om koyenet ye kacesyem, omnye ye kacesyem kot komukta; mosukunyor soponto kwek kokotutyet nyo kikurtoci Yiyintet piko ce cöme neto. 13Ye kacesyem cito kuyunyoto, kupuryo kot kuroke kumwoy kule, “Kasyema Yiyintet.’’ Omnye memuce setanit kot kusyem Yiyintet, oŋnkupuryo kot komuce Yiyintet kot kusyem ci ake tokol. 14Ntene cesyeme cito ye kuperperit oŋnkocut cerokyinotet nyenyi nkit. 15Yoto kuye mosukusic cerokyinotet kupuswek okoy kuyi miyotyet, nteye kaner miyotyet kuwoyit, yoto kuyi met. 16Mpo yeya camamnik koromun! Monte ciperperak. 17Kokotutyet nye tilil tokol kunye cone torot wule mite Papa Yiyintet, nye kitoŋintet nyepo lakweyet nyepo torot, nye puryo kot kuwecwecekey, nto mpo kusut menonet, omnye kamilkey. 18Kicitanyec acek cenyoru ŋolyontenyi nyepo manta, sukuŋet cepoyitu manta om otepto nyepo tayta om tukuk tokol ce kicitany. 19Mpo yeya, möce oŋnket ŋalecu! Möce kulimntoy ci tokol lakwar, ntene nye mosorcini ye mokuŋalal, oŋnkupuryo kot kunyeru lakwar. 20Omnye mosutu nerekwek cepo cito tililinto nyepo Yiyintet. 21Kunyo möce owirte soponto ake tokol nye samis oko kopurto ake tokol nye miyat. Ocäm Yiyintet ake ŋolyontenyi nyo kicekol mukuleywekwok. Ŋolyontonoto kunye muce kusopok. 22Ntene möce oyiku pic ce yiyisye ŋolyontet, nye puryo kot olimntoy pate kulimntan nye opeperisyi. 23Omnye cito nyo lime ŋolyontet pate oŋnkupuryo kot kwiyisye kukerkey nyo oko cito nye kosekey ciyoyit, kukäskey wule yunto neto nkit. 24Kösekey yoto wule yunto nkit oŋnkuwo, yoto pakenke lakwar kuyutye wule koyunto neto. 25Ntene ci tokol nye kakäs topon ntarastinek cepo manta co tyoce piko, oŋnkurip nye puryo kot kulimntoy pate ntene yiyisye ŋalek ce lime, mosukunyor nyoto kupeyok om kiy ake tokol nye yiye neto. 26Ye sote cito kule opoye tini, ntene oŋnkupuryo kot kuripe ŋelyepta nyenyi, kupuryo kot kuponto tinit nyenyi latik oŋnkuperperisyi nyoto. 27Tinit nye tilil nyepo manta nye puryo kot ciwurta om taytap Yiyintet nye Papa kunyi kule: Ye kocerutoci ceköse lekok pononik oko musukik om toŋoŋutek ce ponto, oŋnkuripkey cito om wule mite simnyontet nyepo koret.

will be added

X\