Hebrews 9

1Kiponto kirotyet nyo kipo tay ntarastinek cepo sayet oko otepto nye tilil nye kikweye cito. 2Kicetec yoto wemet saŋ nye cekure Otepto Nyetilil. Kimite orit kito nye yoŋe tarit, oko meset, oko mukatyantet nye kacesoci kupoyit Yiyintet. 3Otepto nyepo oyeny kunye kiceŋare siret. Kumite otepto nye cekure. Tilil wule po Cetililec. 4Nye kimite meset nyepo Saput nye kicepele korosek ce poŋu oko santukut nyepo kirotyet nye kicilume Saput, oko teret nyepo Saput nye kimite orit Mana, oko koroktap Aron nye kiponto sokek ce kipityo, oko rwontok oyeny ce kicesil ntarastinek. 5Kimite parak om yoto tyoŋik alake ce cekure Cerupin ce poru woyintop Yiyintet, ce kiponto kepepok ce keyene otepto nyepo yo cikolye miyotyonik. Ntene puryo kot kumite yawut poroyinto nye cimuce cerorune wule kiyunto tukucoto tokol. 6Kiceyiyta tukucoto kuyunyoto. Kunyo kiwute tisik pesyosyek tokol wemet nyepo saŋ wokwiye yisyonutekwa. 7Ntene Tisintet Nyewo nkit pate kunye kiwute wemet orit nyepo oyeny aret akenke om kenyit akenke. Kisute yoto korotik ce kikoytoy kwek korosek cepo leliswek ceci nkit oko leliswek ce kikwiye piko nye puryo kot kunkete kule kyiye miyotyet. 8Nete Muyet Nyetilil kupor kutok topon om tukucutecu kule tompo kuyatakay aret nye weti Otepto Nyetilil nye Pëlisyi, ye tokumite kutekat Wemet nyepo saŋ. 9Pelutyet nyitenyi nye poru wule yunto pesyosyecu. Poru kule kokotutek oko korosek cepo tyoŋik ce kocikoci Yiyintet kuce puryo kot kusöte kunyol mukuleytap cito nyo soye. 10Omnye nömekey coto tokol oko omit, oko ce ceye, oko sokwonutek wok tokol ce cipukte simnyo. Ntarastinek coto kuce nöme wule po porto saŋ ce mite kwiyisyi okoy kupunto pesyet nye mokusat Yiyintet tukuk tokol. 11Ntene kico Kristo kuyu Tisintet nyewo nyepo tukuk ce toponec ce mite yawut. Wemet nye yicini neto kunye nyewo oŋnkusatat nye pëlisyi, nye puryo kot ku wemet nyo kikwiye piko. Kunye puryo kot kupo koroni kicitonye. 12Yo kiwute Yesu Otepto Nyetilil nye Pëlisyi aret akenke kuwany kupok, kipuryo kot kusut yoto korotik cepo warek nto tuka wokukoyto kwek korosek, ntene kiweto korotikyi nkit oŋnkukonec acek kosopotet nye mopoku. 13Kunyo nteye korotikap warek oko cepo yeyik oko aryantet nyepo rorta nye kacepel kuce ye kocitotoci piko ce puryo kot kutililec, komuce kowun kutililitu om miyotyonikwa. 14Kunyo, omnye manta coto, ku aret cetya nyun ce muce kowun korotikap Kristo nye kikonnkey kupunte Muyet nye mopoku kwek korosyontet nye nyolunot om wule mite Yiyintet. Korotikap Yesu kuce wece kutoponitu kasoteywek cicacek sukuŋet kyiy yisyet nyepo Yiyintet nye sopot. 15Kunyo, Kristo kunye söte kirotyet nyelel sukuŋet kunyor piko co kikur Yiyintet soponto nye mopoku nyo kikurto. Muce kwiyakay ŋolyontoni omnye kime Kristo sukusop piko kukwane miyotyonikwa co kikikwiy ye kitokupoytoy ntarastit nyepo keny. 16Ye mite kirotyet nye kiwalkey cito, kumöce cinket kule kime cicoto. 17Omnye puryo kwiyisyi ŋolyo nyepo kirotyet ye tokusope nyo kiwölekey kukurto. Yiyisyi pate ye kame cito nyo kikurtoy. 18Kuyunyoto omne sukuŋet ciyisye korotik cekwil kunyol kirotyet nyepo tay. 19Kinyosye Moses yoto kumwoci piko ntarastinek tokol kuyu wule kiyunto. Nto om letut kunäm korotikap tuka oko warek oŋnkutankware peko, oŋnkutotoci kitaputap ntarastinek oko piko tokol kwiyisye ketit nye mwa koromun nye cekure Isop oko putekap kecirek ce murwonec. 20Kimwoy kule, “Koroticu kuce kwile kukwilakay kirotyet nyo kukonok Yiyintet kule orip.’’ 21Om aret nye yunyoto kutotoci Moses korotik wemet oko kiy ake tokol nye kyiyisye ye cesoye. 22Kito nyepo manta kuyu wulo yunto ntarastinek kunyi kule, korotik kuce wune kutililit kiy ake tokol. Kunyo puryo kot cimuce cikalya miyotyonik ye puryo kot citata korotik 23Kunyo tukucutecu ce akerkeye oko tukuk cepo torot kuce kicesat kutililitu om aret nye yunyitenyi. Ntene tukuk cepo torot kuce möce korosek ce pëlisyi. 24Omnye kipuryo kot kowut Yesu Otepto Nyetilil nye kicitanye yewuniyek, nye kerkeyinto nyepo manta. Ntene kiwo torot, wule mitowune yawut kuporyewec acek om taytap Yiyintet. 25Kiweti Tisintet nyewo aret akenke om kenyit akenke Otepto Nyetilil, kisute yoto korotik cepo tyoŋik, ntene kipuryo kot kokoytokey Kristo kuwo orit aret ce caŋ, 26omnye nto kikwiy kuyunyoto nto kimuce kutaŋany aret ce caŋ kuceke ye kicitany koret. Ntene wule kikwiyta kunye kiporkey yawut aret akenke om pesyosyecu po letut, sukuŋet kunum miyotyonik, omnye kikoytokey nkit kwek korosyontet. 27Mosukume ci tokol aret akenke, nto om letut kuco musankut. 28Kuyunyoto kicekon Kristo aret akenke kwek korosyontet nye numu miyotyonik cepo piko ce caŋ. Mosukuco aret nyepo oyeny, nye puryo kot kuconi kule casat miyotyet, ntene coni cokusop piko ce mite kukonye neto.

will be added

X\