Hebrews 8

1Kunyo, ŋolyontet nyewo nye cemwowu acek kunyi kule; Ceponte acek Tisintet nyewo kupoyit manta nye yunyo, nye pure yewutap tay nyepo ŋeceretap Yiyintet nyepo Kamukeywek om torot. 2Mite kwiyisyi kuyu Tisintet nyewo om Otepto Nyetilil nye Pëlisyi, nyoto kunye wemet nyepo manta nye kitec Mokoryontet, nye kipuryo kot kutece ci. 3Cekweye Tisintet ake tokol kule sukuŋet kukoytoy kokotutek oko korosek ce cikocini Yiyintet. Kunyo misyini kuponto mpo Tisintet nyinyo nyewo kito nye koytoy. 4Nto yunye kupo neto koret, nto komoyeku Tisintet mpo kisic, omnye mite tisik ce caŋ ce koytoy kokotutek kuyu wulo mwoytoy Ntarastinekap Yutayek. 5Yisyet nye yiye cekto kuyu tisik kunye kerkeyinto oŋnku rurwet nyepo meset nyetilil nye mite torot. Kerkey wule kiyunto om Moses. Omnye ye kikirik kutec wemet, yoto kumwoci Yiyintet neto kule, “Käs kule ketec kiy ake tokol kuyu wulo kukuciporuŋ om tulwo.’’ 6Ntene kuyu wulo yunto, kicikoci Yesu yisyet nyepo tisyontit nyewo kupël nyimwacek, kuyu wulo topon kirotyet nye kikwiytoy neto om kwenutap Yiyintet oko piko, omnye kiyoŋe kirotyet nyitenyi tukuk ce toponec kupëlis. 7Omnye nto kipuryo kot kuponto lelis kirotyet nyo kipo tayta, nto kipuryo kot kumöce Yiyintet kukon kirotyet nyepo oyeny. 8Ntene kireny Yiyintet pikyi yo kiŋolole kumwowu kule, “Mwowu Mokoryontet kule, mite kukwoni pesyosyek, ye masayiy ani kirotyet nyelel oko pikap Israel oko kotap Yuta. 9Puryo kot kukerkey kirotyet nyoto oko nyo kyoyiye ani oko mpo kukomwa, om pesyet nyo kyokwerune ani cekto kukwane koretap Misiri. Kipuryo kot kurip kuywey kirotyet nyoto kyoyiye ani oko cekto. Kunyo kyayaste ani nye kimolimncini, yunyoto wule mwoytoy Mokoryontet. 10Mwowu Mokoryontet kule, kirotyet nye masayiy ani oko pikap Israel om pesyosyek ce kwoni kunyi, Mosokoci kupurune ntarastinekwani kasoteywekwa orit, mososil mukuleywekwa orit. Mosoyeku ani Yiyintemwa, oŋnkwek cekto pikwani. 11Puryo ci om cekto nye muce kunet citake nto mpo kunet yeyanyi kumwoci kule, ‘Roke nket Mokoryontet.’ Omnye mosukonketo piko tokol, kuceke lekwa nye miniŋ okoy cito nyewo. 12Omnye mosakalye ani leliswekwa, nye kamosoti yec miyotyonikwa.’’ 13Ye kaŋalale Yiyintet kumwoy kule kirotyet nyelel, kuporkey kule sute Yiyintet kule kiyosit kirotyet nyo kipo tay, kunyo kiy ake tokol nye mite kuyositu kunye mosukupot lakwar.

will be added

X\