Hebrews 7

1Melikisantek kunye Kinko nye kipo Salem oŋnku tisintet nyepo Yiyintet nyewo nyepo torot. Kunye kituye Apram kucone poryet wule kikiporye kot kukwet kinkonik. Yoto kusomnci Melikisantek neto kupeyok. 2Kukoci Apram neto taman om pokol cepo tukuk tokol ce kikipor. (Ŋolyontet nyepo tayta nye poru kaynani, Melikisantek ku kule, “Kinko nyepo toponiyet,’’ kunyo omnye ki Kinko nyepo Salem, porwec kaynenyi kule, “Kinko nyepo kalyet.’’) 3Puryo kot cinket kwan nto kamet nto mpo kukonyi. Mocinket ye kiceye nto ye kime. Kerkey neto oko Weritap Yiyintet, kunyo tisintet neto okokoy. 4Kunyo möce okäs woyinto nye kiponto. Apram nye kukonyo nyewo kunye kikoci neto taman om pokol cepo tukuk ce kikiporune poryet. 5Kunyo mucokoronikap Lefi ce tisik kuce cömncini Ntarastit koruruc taman om pokol om wule mite pikap Israel. Kunyo ruruce cekto wule mite mpo Yeyamwa pikap Israel nka kot ku mucokoronikap Apram coto. 6Melikisantek kunye kipuryo ku mucokoretap Lefi, ntene kinyor taman om pokol ce kikoci Apram nye kicekurtoci oŋnkusomnci kupeyok nyo kikikurtoci Yiyintet. 7Ŋolyontet nyepo manta kunyi kule, somncini nye miniŋ nyewo kupeyok. 8Nyoru tisik co poku taman om pokol, ntene ce nöme Melikisantek, kinyor cito nye sope taman om pokol kuyu wulo mwowu silutek. 9Omnye cimuce mpo cemwoy kule, Lefi nyo nyoru taman om pokol kunye kikon taman om pokol kupunte Apram, 10omnye kitompo kot ceyi Lefi nye kitokumitowune porto nyepo kukonyi Apram yo kinyoru Melikisantek. 11Kicikoci pikap Israel Ntarastinek kupunte tisyontit nyepo Lefik. Kunyo ntoyunye kinyolunot yisyet nyepo tisik, nto kipuryo kot kuroke kutok yec tisintet ake nye pciyat, nyoto ku tisintet nyerupe Melikisantek nye puryo kot ku Aron. 12Omnye ye kacewecwec tisyontit, kumöce mpo kule cewecwec ntarastinek. 13Mokoryontet nyo nye ceŋolole om ŋalecu kunye po aret ake. Aret nyoto kunye tompo kot kwiyis cito mpo akenke kwek tisintet om meset nyetilil. 14Cinket kutok topon kule kicone Mokoryontenyo kotap Yuta. Kunye kipuryo kot kuŋalale Moses ce nöme tisik cekwone koto nyitenyi po Yuta. 15Kunyo kutok topon koromun kule, kutok Tisintet ake nye kerkey oko Melikisantek. 16Kipuryo kot kwek neto tisintet om ntarastinek cepo piko, kikwek tisintet om swametap soponto nye moponto ye ŋete. 17Omnye mwowu silutekap Yiyintet kule, “Meseyeku tisintet okokoy, om tisyontit nyepo Melikisantek.’’ 18Kunyo kicinum citore tapan ntarastit nyepo keny, omnye puryo kot kuponto swamet oko moponto latik. 19Omnye puryo kot kusat ntarastinekap Moses kunyol kiy ake tokol. Kunyo kucekon yawut kokenotet nye topon nye cimuci cekwa celekityi wule mite Yiyintet. 20Ntene mite kawalet nyepo Yiyintet. Kipuryo kot kumite kawalet yo kiyiku alake tisik. 21Kikwek Yesu tisintet om kawalet yo kimwowu Yiyintet kule, “Kakuwalkey Mokoryontet kunyo puryo kot kuwece kasoteywekyi, ‘Meseyeku nyi tisintet okokoy.’ ’’ 22Kunyo pciyatet nyepo Yesu kunye kwile kule kirotyet nyenyi kunye topon nyepo manta. 23Mite mpo pciyatet ake yec. Ki caŋ tisik coto omnye kipok nye kipuryo kot komuce kutosyikey om yisyemwa. 24Ntene Sope Yesu okokoy. Kunyo puryo kot kuweti yisyenyi oko tisyontit wule mite citake. 25Kunyo muce neto yawut oko okokoy kusop piko co kwoni wule mite Yiyintet kupunte neto, omnye sope okokoy sukuyetyecini cekto om wule mite Yiyintet. 26Kunyo Yesu nye Tisintet Nyewo nye yemekey oko tukuk ce cemöce acek. Kunye Tilil, moponto lelis, nto miyotyo, kweyat om wule mite piko co ponto miyotyet, oŋnkukicilaŋnta kuwo kopurune torot wule low. 27Puryo kot kukerkey oko tisik alak, momöce kule kukoyto kwak korosek cepo miyotyonik kunyosye kunyo cepo ceci nkit ntekere cepo miyotyonik cepo piko tokol. Kikon korosyontet nyepo aret akenke nkit nye yeme. Yoto kuyo kikonukey neto nkit. 28Kweye ntarastinekap Moses piko co puryo kot kutoponec kuwoŋnkyi kwek Tisik. Ntene kurtoyet nyepo Yiyintet nye kiwalkey nye kiconi letutap. Ntarastinek kunye kikweye Werit nyetilil okokoy.

will be added

X\