Hebrews 6

1Kunyo roke cipe tay om konetisyet nyewo nye kilot, oŋnkyepokokyi let konetisyet nyo kinyosyi nyepo Kristo. Puryo kot kuroke yec ce konu konetisyet, nye ciyene Yiyintet oko kuyu wule cerenyntoykey om miyotyonikyo cepo keny. 2Coto ku konetisyet nye nöme Potisonisyet, kakameretap yewuniyek, kotutunetap met oko musankut nye mopoku. 3Kunyo cipe tay! Mosikyiy pate kuyunyoto ye kacäm Yiyintet. 4Omnye cimuce kulene ceketu kot kurenynkey yec piko co kimosokis? Kikinyor lakweyetap Mokoryontet Yiyintet, kikicemcem kokotutyet nyepo torot, oŋnkunyor Muyet Nyetilil. 5Kikonket cekto keny kule topon ŋolyontetap Yiyintet, oŋnkunyor swamet nyepo koret nyin coni. 6Yoto kwasta cekto koyenet nyimwa, komokomukoktos kot cewec cekto yec kot kurenynkey, omnye mite kuwuyitocini murtowontet Weritap Yiyintet oŋnkuparta kunyil piko. 7Kocini Yiyintet kupeyok teŋekap koret kwak ye koropentyi kuye peko, yoto kupityo omik cepo latik om wule mite piko co potisyi. 8Ntene ye kopityo kotok, oko samiyita, kupuryo kot kuponto yoto latik, oŋnkurik kucup Yiyintet, nto nyepo letut cepele mata kuloyo. 9Ntene mpo yeya, nka kot kaceŋalal acek kuyunyi, ntene cikenenokey akwek kupoyit manta. Cinket kule oponte kupeyok cepo kosopotet nyimwoŋ. 10Puryo kot kuwurat Yiyintet, kunyo puryo kot kuyutye yisyet nye kyayiy oko nye tomite oyiye nyo kyoporci om yisyet nye kyokalye pikap Yiyintet. 11Ŋolyontet nyewo nye ce möce acek kunyi kule, kutitir ci tokol om akwek okoy pesyet nyepo letut, sukuŋet kwitita kupoyit manta tukuk ce okeni akwek. 12Mocemöce kule opuren, ntene ce möce kule akerkeyitu piko ce kikoyen oŋnkumuytoy, sukuŋet kunyor tukuk ce kikurto Yiyintet. 13Yo kiwolekey Yiyintet kukurtoci Apram. Kiwalkey neto kwine nkit, omnye kipuryo nyewo nye pële neto nye mokuwolyikey. 14Kimwoy kule, “Mosokoniŋ ani nyi kupeyok oko mucokoronik ce caŋ’’ 15Yoto kumuytoci Apram okoy kunyor tukuk ce kikurtoci Yiyintet. 16Ye kewalkey cito, kuwolyinikey citake nyewo kupël neto, nto kawalet kunye sate kuwany tintenot ake tokol. 17Möce Yiyintet kule oporu kutok topon piko ce mosukunyor tukuk ce kikurto neto kule puryo kuwecwece kenyis kito nye tyikini, yoto kutosyi kawalet nyenyi kirotyet. 18Kunyo kikwiyisye Yiyintet tukuk oyeny, ce mocimuce kot cewec oŋnkupuryo kot kuperperisyi Yiyintet, tukucoto ku kurtoyenyi oko kawalenyi. Kunyo acek co cemwecini wule mite neto kuce möce cekwilokisye om kurtoyet nyo kicikoci taynyacek. 19Ceponte acek kurtoyet nyitenyi kunye kito nye kwile mukuleywekyacek, po manta nye cikenekey, punte siret wule kiceŋar om kotap Yiyintet nyepo torot okoy kupunto otepto nyetilil nyepo orit. 20Kinyosyo Yesu kuwo wuloto om kaynenyacek, omnye kikwek tisintet nyewo nyepo okokoy nye kirupe tisyontitap Melikisantek.

will be added

X\