Hebrews 5

1Cekweye tisintet nyewo ake tokol kucone kwenutap piko oŋnkyikoci kwiy yisyet nyepo Yiyintet om kaynetap piko. Sukuŋet kukoytoy kokotutek oko korosek ce tise miyotyonikwa. 2Omnye puryo kuponto neto swama om aret ake tokol, komuce kupaypayit om wule mite piko ce menket kiy oŋnkwiye leliswek. 3Omnye puryo kot kuponto swamet neto nkit, kumisyini kukoytoy korosek cepo miyotyonik ceci nkit oko miyotyonik cepo piko tokol. 4Puryo ci nye kweyekey nkit kwek tisintet nyewo. Ntene Yiyintet nkit nye kure sukwek tisintet nyewo kuyu wulo kikurto Aron. 5Kunyo kipuryo kot kusutkey Kristo nkit sukwek tisintet nyewo, ntene Yiyintet kunye kikwey neto nyo kimwowu kule, “Yiku nyi Werimwani, koyiku ani pesyoni Papaŋuŋ.’’ 6Kimwoy om komosta ake kule: “Yiku nyi tisintet nyewo okokoy kenyis, nye rupe tisyontitap Melikisantek.’’ 7Ye kimite Yesu koret kisome kukurtoy om kutit nyewo oko lokik kusome Yiyintet nye muce kot kusorune neto wule mite met. Celimnci neto omnye kiyweye Yiyintet. 8Kunyo nka kot ki Weritap Yiyintet, ntene kinetkey kuyweyis kupunte toŋoŋutek ce kitaŋany. 9Nteyu kowo cesat kunyol, yoto kwek neto wule lukune kosopotet nyepo piko tokol co yweye neto. 10Yoto kukwey Yiyintet neto kwek tisintet nyewo, nye rupe tisyontitap Melikisantek. 11Ceponte acek ŋalek ce caŋ ce mocemwowu ce nöme ŋolyontoni, ntene korom ye mocerorwok omnye oyiku wuyec ye monket. 12Omnye nka kot kwoyiku akwek pesyosyecu konetik, ntene omöce yec cito nye kenetak ŋalekap Yiyintet cepo tayta. Ye koto oyome omik ce wuyec, kunyi tolwe ceko. 13Omnye lekwa ci tokol nye luwe ceko, omnye menkete cepo manta oko ce puryo kot kupo manta. 14Po omik cewuyec piko ce woyec co kikonetkey oŋnkonket ŋalek ce miyotec oko ce toponec.

will be added

X\