Hebrews 4

1Kunyo ye kikurtowec Yiyintet kule mosicenyoru kamuŋet nyo kimwoy. Kumöce ciyweyisye sukuŋet mente kot cekäs kule kopotyi akenke om akwek nye monyor komuŋnto nyoto. 2Omnye kucelim lokoywek ce toponec kuyu wulo kilime cekto piko cepo keny. Kipuryo kot kunyor cekto latik om lokoywek ce kilim omnye kipuryo kot kuyen. 3Kunyo acek co kicecäm kule mosicenyoru kamuŋet nyo kikurtowec Yiyintet, kuyu wule kimwoy kule, “Kyawalkey akurte om nerekwekwani kule, Puryo kot amuci okoci cekto wule kemuŋe.’’ Kimwoy Yiyintet kuyunyitenyi nka kot kikipok yisyenyi om pesyet nye kitonye neto koret. 4Omnye kimwoy ce nöme pesyetap tisap om komosta ake om silutek kule, “Kimuny Yiyintet ye pesyetap tisap nye puryo kot kwiye yisyenyi ake tokol.’’ 5Mwowu mpo yec om ŋalek ce nöme ŋalecu kule, “Puryo kot amuci kot okoci cekto wule kemuŋe.’’ 6Puryo kot kupa wokomuny oko Yiyintet piko co kinyosyo kulim lokoywek ce toponec omnye kitoyis. Kunyo mite piko alake ce ce cömncini kupa orit oŋnkuwokomuny oko Yiyintet. 7Poru kupoyit manta kule, kikwey Yiyintet pesyet ake nye cekure kule, “Pesyoni.’’ Kimwoy ŋaleca om letut kukatil kenyisyek ce caŋ kupunune wule mite Tauti om silutek ce kicesil kule, “Ye kolim pesyoni kutitap Yiyintet, Monte cekwil mukuleywekwok.’’ 8Nto yunye kikikontoci Yoswa piko okoy kunyor kamuŋet nyepo Yiyintet, nto kipuryo kot kuŋolole Yiyintet ce nöme pesyet ake yec. 9Kunyo tokumite pesyet nye munye pikap Yiyintet kuyu wulo kimunye neto om pesyetap tisap. 10Omnye citake tokol nye kanyor komuŋnto nyo kikurto Yiyintet kunye kemuny om yisyonutekyi kuyu wulo kimunye Yiyintet om yisyonutekyi. 11Kunyo möce cesyem koromun okoy cenyoru komuŋet nyoto sukuŋet kupuryo kot kumite akenke om akwek nye kopotyi, kuyu wulo kiyunto cekto omnye kipuryo kot kunyor kamuŋet. 12Sopot ŋolyontetap Yiyintet oŋnkuponto swamet. Ŋatip kupël ŋatipinto nyepo rotwetap cok. Mute kuwo orit koromun okoy kuponto ye tuytos soponto oko mukuleyto, oko okoy wule tuytos melilok oko mwaytap kowet. Ŋolyontoni kunye syoce topon corokyinotet oko kasoteywek cepo mukuleywek cepo piko. 13Puryo kiy nye muce kuwunynkey om wule mite Yiyintet. Toku kiy ake tokol nye kicitany om konyekyi. Kunyo wociportoykey acek tokol, om tayta nyenyi. 14Kunyo misyini cekwil acek koromun koyenet nye ceponte, omnye ceponte Tisintet nyewo nye kinyosyo kuwo taytap Yiyintet, nyoto ku Yesu Weritap Yiyintet. 15Tisintet nyewo nyoto kunye puryo kot kutoye mekalyec kurirenec om purenotet nye ceponte. Ntene neto kunye kicesyem om aret ake tokol kuyu wulo cesyemntec acek. 16Kunyo misyini cetitir cekwa tay wule mite poypoyet nyepo ŋeceretap Yiyintet sukuŋet cenyoru kokolyoyisyet oŋnkyenyoru poypoyet nye kolyec om pesyet nye ce möce kokolyoyisyet.

will be added

X\