Hebrews 3

1Mpo yeyamwani ce tililec, ce kikur Yiyintet kunyor woyinto nyepo torot! Asot pa akwek Yesu Kristo, nye kiyok Yiyintet kwek Tisintet nyewo nyepo koyenet nye ciyeni acek. 2Kiywey kukenekey neto Yiyintet nyo kikwey neto kwiy yisyenyi kuyu wule kiywey mpo Moses Kotap Yiyintet tokol. 3Cito nye tece koto kunye nyoru kakastayet kupël koto nkit. Kuyunyoto ponto Yesu cikasta koromun kupël Moses. 4Cito kunye kitece koto ake tokol nye tekat. Ntene kitece Yiyintet tukuk tokol. 5Kikwiye Moses cepo manta tokol om kotap Yiyintet orit kuyu mutworintet, kuŋalale yoto tukuk ce mosukumwoy Yiyintet om pesyosyek ce kwoni. 6Ntene Kristo kunye po manta kuyu weritap Yiyintet nye ponto kamukeywek kupayta kotap Yiyintet. Kunyo ciku acek konyi ye kacenäm cekwil koromun kokenotet nyoto nye mite cikeni. 7Kunyo kuyu wulo mwowu Muyet Nyetilil kule, “Ye kolim pesyoni kutitap Yiyintet, 8monte cekwil mukuleywekwok, kuyu wulo kikwiyta mpo kukomwoŋ, ye kitoye cekto Yiyintet, kuyu wulo yo kyomite kitela, yo kyosyem Yiyintet. 9Wuloto ku wule kisyemeno ani mpo kukomwoŋ, mwowu Yiyintet, okoy kukäs cekto yisyonutekwani ce kyayiy awany kenyisyek artam. 10Kunyo kyonerekyi ani piko ce kipo pesyosyecoto, okoy omwowu kule, ‘Kimosokis cekto okokoy om mukuleywekwa, puryo kot konkete arosyekwani.’ 11Kyonyeru okoy awalkey okurtoci kule, ‘Puryo kot amuci kot okoci cekto wule kemuŋe.’ ’’ 12Mpo yeya, oripkey sukuŋet mente kot kumite kwenumwakwek cito nye ponto mukuleyto nye miyat nye yunyo nye muce kutay Yiyintet nye sopot. 13Ntene kito nye möce kule ayiy akwek nye tokunömec om ŋolyontoni mwowu kule, “Pesyoni’’ Kunye möce kule cititirkey acek kwacek nkit om pesyo ake tokol oŋnkyekäs kule puryo kot kumite ci ake tokol om akwek nye kapayta miyotyet okoy kunyekerit kutay Yiyintet. 14Omnye ciku tokol akenke oko Kristo, ye kacekwil ce nöme ŋolyontet nye topon nye kiceponte kunyo okoy kupunte pesyet nyepo letut. 15Mwowu silutekap Yiyintet kule; “Ye kolim pesyoni kutitap Yiyintet, monte cekwil mukuleywekwok, kuyu wulo kyoyunte yo kyotoye Yiyintet’’. 16Mpo ŋo piko co kilim kutitap Yiyintet, oŋnkurok kutoyis? Coto ku piko tokol ce kikweru Moses kukwane koretap Misiri. 17Mpo ŋo piko co kinyercini Yiyintet kuwany kenyisyek artam? Picoto kuco kiwurta kwiy miyotyet okoy kupok kuwoŋnkey kuŋetune muswek cikwa kitela. 18Piko oŋnkoco co kiwolcinikey kukurtoy Yiyintet kule, “Puryo kot okoci cekto wule kemuŋe?’’ Picoto kuco kitoyisyi. 19Kunyo ceköse yawut kule kipuryo kot kowut cekto orit omnye kipuryo kot kuyen.

will be added

X\