Hebrews 2

1Kunyo misyini cekwil topon ŋalek cepo manta ce kicelim sukuŋet mente kot cemosokisye kupotwec aret. 2Kicipor kule po manta lokoywek ce kisutyi malaykanik mpo kukonyo, nto ci ake tokol nye kipuryo kot kurup nto kuywey kunye kinyor nyo citaŋany kuyem. 3Kunyo cimuci acek kulene kot cecilil ye puryo kot ce cöme ŋalek cepo kasopotet nyewo nye tenyo? Mokoryontet nkit nye kinyosyo kupor kosopotenyi, nto piko co kilim ŋalekyi kuce kiporwec acek kule manta ŋalecu kupoyit manta. 4Kunyo kitosyi Yiyintet tukukyi cepo manta ce poru, omnye kikwiy pelutok ceporu swamet oko tukuk wok ce caŋ cepo kakitat. Kipciyta mpo kokotutek cepo Muyet Nyetilil kuyu wule moktoy neto. 5Kipuryo kot kukoci Yiyintet malaykanik kwek poytoyik cepo koret nye mosukuco, koret nyi ceŋolole acek. 6Ntene mwowu om wulyo ake om silutekap Yiyintet kule “Yiyintet! Cito ku kiy ne nye muci nyi kot sot? Nto ci pate kunye kiy ne nye muci nyi kot rire? 7Kitany nyi neto kopur pesyos ce ŋeri kuminiŋ kupël malaykanik, kilokyi nyi neto kutwet nyepo woyinto oko koyweyisyet, 8oŋnkupayta tukuk tokol ce kitany.’’ Mwowu ŋaleca kule, kikoci Yiyintet cito kupayta tukuk tokol, ntene kuyu wule yunto yawut puryo kot ceköse acek kule poytoy cito tukuk. 9Ntene ceköse yawut Yesu Kristo nyo kicirek kuminiŋit kupël malaykanik kuwany pesyos ce ŋeri, sukuŋet kumeci piko tokol kupunte poypoyetap Yiyintet. Ceköse kule kicilokyi Woyinto oko koyweyisyet om met nye kitaŋany. 10Ŋolyo nyepo manta kule Yiyintet nye kitany oŋnkuripe tukuk tokol, kunye kisat kunyol Yesu kupunte toŋoŋutek, sukuŋet kukwer lekok ce caŋ kwokunyor woyinto nyenyi. Omnye Kristo kunye ntocini cekto wokunyor kosopotet. 11Neto kunye söte kutililitu piko om miyotyonikwa, neto wanak oko piko co kicesat kutililitu kuponto Papa akenke. Kuyu wulo puryo kot kunomkyini kalilan Yesu ye mokukure cekto kule mpo yeya. 12Mwowu kule, “Mosomwoci ani mpo yeyamwani kayneŋuŋ, mosakastiŋ nyi om kwenutap luket nyimwa tokol.’’ 13Mwowu mpo yec kule, “Mosokenekey ani Yiyintet.’’ Mwowu mpo yec kule, “Amite ani yu opontekey oko lekok ce kikono Yiyintet.’’ 14Kunyo lekok kuce piko ce ponto porto oko korotik. Kuweckey Yesu nkit kukerkeyit oko cekto nye kiponto porto nye kerkey nyimwa. Kikwiy kuyunyoto kupunte met nyenyi sukuŋet kwaranta setani nyewo nyepo oyik . Setanit kunye kiponto kamukeywek om wule mite met, 15yoto kuye sukuŋet kutyac piko co kikwek mutworik cepo okokoy ye kisoptos, omnye kiyweye met. 16Omnye porukey kupoyit manta kule kipuryo kuco neto cokukalya malaykanik, ntene kuyu wulo mwowu silutek kule, “Kukalya lekokap Apram.’’ 17Kunyo kiweckey neto kukerkeyit mpo yeyanyi om aret ake tokol sukuŋet kwek Tisintet nyewo nye paypay oŋnkupo manta om yisyetap Yiyintet nye kolyoy piko miyotyonikwa. 18Kunyo muce Yesu yawut kukalya piko co cesyeme, omnye kicesyem neto oŋnkyitaŋany.

will be added

X\