Hebrews 13

1Otosyikey acämnkey akwek kwakwek nkit kuyu mpo yeya om Kristo. 2Mente ceyutye moŋerekyi atoroc oŋnkopay toyek. Mite piko alake ce kikwiy kuyunyoto okoy kuŋerekyi malaykanik nye kipuryo kot kunkete. 3Möce asoti piko ce mite mopusi oŋnkosut kuyunye opontekey tokol om mopusi. Möce asoti mpo piko co mite kutoŋonye oŋnkosut kuyunye otoŋonyi mpo akwek oko cekto. 4Möce kuywey piko tokol komütisyet, nye puryo kumisyini kowurta morono nto korko komütisyet nyenyi. Omnye mosukumutyi Yiyintet musankut piko co syepisyi, oko sakwoyotik. 5Monte ciku pic ce corokyini pesan, okany kuyemak tukuk ce oponte, omnye kimwoy Yiyintet kule, “Puryo kot oyostok ani mpo kisic oŋnkupuryo kot owirtiŋ.’’ 6Kunyo sukuŋet cenyoru nyikanatet ceŋalal ce mwowu kule, “Mokoryontet kunye kokolyoyintemwani, puryo kot amuye. Mosukwiyena ani ne cito ake?’’ 7Möce osoti kantoyikwok co kimwowok lokoywekap Yiyintet; Asot topon wule kipurtoy om kopurto nyimwa. Möce otyikyi Koyenet nyimwa. 8Yesu Kristo kunye yunyoto omutun, oŋnkuyunyoto yawut, oŋnku mokuyuyit nyoto okokoy. 9Mönte kot kumasak konetisyonik ce lelac kot ape tapan; Omnye poypoyetap Yiyintet kunye kwile mukuleywek cikwok, puryo ku ntarastinek ce nöme omik ce tompo kot kukalya ci tokol nye rupe ntarastinek. 10Puryo kot kuponto kamukeywek tisik ce yiyisyi om kotap wemet kot kwam korosek ce mite meset nyetilil. 11Sutu tisintet nyewo korotik cepo tyoŋik okoy Otepto Nyetilil nye Pëlisyi, sukuŋet kukoyto kwek korosek cepo miyotyonik, ntene cepele panyekap tyoŋicoto kayta saŋ. 12Kunyo kitaŋany mpo Yesu kuyunyoto kumeci kurketap moŋet saŋ sukuŋet kowun miyotyonik cepo piko om korotikyi nkit. 13Kunyo akente cipe kayta saŋ wecenyoru tokol kalilanta nye kinyor Yesu. 14Omnye puryo kot kumite moŋet nye ceminye acek kenyisyok om wuli po koret, ce mite cecenye moŋet nye mosukuco. 15Kunyo akente cetosyikey cikoci Yiyintet korosek ce cikoste kupunte Yesu, om kutuwak ceŋolole kuŋoŋu kaynenyi. 16Monte ceyutye mayiy tukuk ce toponec oŋnkokolyoykey kwakwek nkit, omnye korosek coto ce ŋerece Yiyintet. 17Ayweyi kantoyikwok oŋnkolimnci ntarastinek ce mwowu. Omnye mite cekto kuripe mukuleywekwok nye memunye, omnye mosukuporci cekto Yiyintet yisyet nye kikwiy. Ye kaywey akwek cekto mosukwiyis topon om ŋerekwek, nteye puryo, mosukwiyisyi kunerekotin. Kunyo puryo kot kukolyok akwek ceyuco. 18Otosyikey osomwec mpo acek, cinketi acek kule ceponte ŋomnonet nye cinketi cepo manta, omnye cemöce kule kyiye okokoy ŋalek cepo manta. 19Otosyinikey ani osoysoyok akwek kule osomwo sukuŋet kuketwo Yiyintet aco lakwar okoy wule omite akwek. 20Yiyintet nye kiŋet kotutune met Mokoryontenyo Yesu Kristo, neto kunye mesewontet nyewo nyepo kecirek, omnye kitata korotikyi ce kikwil kirotyet nyepo kenyisyok. 21Akente kukonok akwek Yiyintet nyepo kalyet kiy ake tokol nye topon nye omöce sukuŋet ayiy ce möce neto. Roke kwiy neto kito nye ŋerekyini kupunte Yesu Kristo. Kunyo kopurune woyinto wule mite Kristo okokoy okoy okokoy! Yunyoto. 22Mpo yeya, osomok kule omuytoci om ŋalecu po kotitirotet. Kosilwok pate parwet nye nwac. 23Omoce ani kule oporwok kule kucityakta yeyanyo Timosewo kuwete mopusi. Ye kotepe kot kupun wuli lakwar, mosocontekey okoy wule omite akwek. 24Osupoywec kantoyikwok tokol oko pikap Yiyintet tokol! Kesupayak mpo yeya cepo Italia. 25Opurte akwek tokol poypoyetap Yiyintet.

will be added

X\