Hebrews 12

1Nto acek kuce ceponte luket nyewo nyepo muncururwanik ce kimutwec. Kunyo akany cewirte acek kiy ake tokol nye muce kukerektec, oko miyotyet nyo kinämec kukwilec. Okany cirway ŋweyek nye kacemuytoci om kamwenet nyi ceponte. 2Akente cirotote cetokyikey Yesu nye kicece koyenet nyinyacek oŋnku neto kunye mosukoyitita. Kupo ŋerekwek ce kimite kukonye neto, kunye kikoci neto kumuytoci om murtowontet nye kipuryo kot kolilan. Kunyo kikopure yewutap tay om yepo ŋeceretap Yiyintet. 3Asot pa wuyinto nye kipunte Yesu, kimuytoci senkeratet nyewo nyepo piko ce miyotec! Kunyo monte cecosye nto mpo kwilyo mukuleywekwok. 4Omnye om wuyinto nye oporye akwek miyotyet, kunye tompo oporye okoy cepakäcak awaste korotik. 5Kwoyutye akwek so ŋalek cekwilok ce kimwowok Yiyintet kuyu lekokyi? Mwowu kule, “Lekwenyu, mente kot areny kataŋanyetap Mokoryontet, Mente anyokoritu ye kapolyiŋ. 6Omnye toŋonye Mokoryontet ci tokol nye cöme, oŋnkunyolile ci tokol nye kacäm kwek lekwenyi.’’ 7Omuytoci toŋoŋutek kuyunye kopirok Papa, omnye toŋoŋutek ce otoŋonyi akwek kuce poru kule sutok Yiyintet kuyu Lekokyi. Mite pa lekwa nye puryo kot kupire kwan? 8Ye puryo kot cepirok akwek kuyu wule yunto lekokyi, kuporukey kule puryo kot oyiku lekokyi cepo manta, ntene oyiku pate pantayek. 9Ceponte acek mpo papa cepo koret ce kiyec cepirec, ntene ciyweyi cekto. Kunyo puryo kot kuroke ne ciyweye acek kupëlis Papa nyepo torot sukuŋet cesopce! 10Kipirec acek mpo papa kisic kuyu wule kostoy kule topon. Ntene pirec acek Yiyintet kupo toponiyet nyinyacek sukuŋet cenyoru tililinto nyenyi. 11Puryo kot kutopon pirotet om pantanyi, ntene mwa nye puryo kot kutopon, ntene om letut mosukunyor kalyet oko tililinto co kicepire. 12Kunyo onömnci torot yewuniyekwok ce nyelnyeltos oŋnkokwil kutuŋokwok co potontos. 13Otosyikey apesetate arup aret nye rotat, sukuŋet mente kumnyan kerenket nye mwole, ntene kusop . 14Otyikyi opurte kalyet oko piko tokol oŋnkopurte soponto nyetilil, omnye puryo ci nye muce kot kukäs Mokoryontet ye moponto soponoto. 15Oripkey mente kwasta ci tokol poypoyetap Yiyintet. Oripkey mente kot kupitenak akwek ketit nye mwa nye muce kowurta piko ce caŋ om mwonet nyenyi. 16Oripkey mente kusekweyan nto nye moponto tini ci ake tokol om akwek kuyu Esawu nyo kikwalya poretyantit nyenyi kuyu werit nyewo kwale omik cepo aret akenke. 17Oŋnket akwek kule kimac om letut kule onyoru kupeyok ce kosomnci kwan, ntene ceyete omnye kipuryo kot kurenynkey om ŋalek ce kikwiy nka kot kisyem kurir lokik kule anyoru. 18Puryo kot akwa akwek kuyu pikap Israel ye kikwoni tulwetap Sinai, nye kiponto mata nye loye oko menonet nye tuyi mis oko yomet kisonet, 19oko kontit nye ciye oko polotet. Nteyu kowo kulim piko polotet, yoto kusom kule mente kot tocelim ŋolyo ake, 20omnye kipuryo kot komuce kumuytoci ntarastit nye kimwowu kule, “Mpo ye karik kutiny pate tyony tulwet mosicewire rwontok kume.’’ 21Ki ŋolyo nyewo koromun nye kicekäs yoto okoy kumwoy Moses kule, “Komuyi oŋnkapotan.’’ 22Ntene omite akwek yawut kukoyoŋe taytap tulwetap Siyon oŋnku moŋet nyepo Yiyintet nye sopot nye Yerusalem nyepo torot, wule kerurukyikey malaykanik ce caŋ ce mociyite. 23Kakwa akwek wule mite koyomotet nyepo poretokap Yiyintet ce kicesil kaynokwa om torot. Kakwa wule mite ketintet nyepo piko tokol, wule mite mukuleywek cepo piko cepo manta ce kicesat kunyol. 24Kakwa wule mite Yesu Kristo nye kisat kirotyet nyelel om korotikyi ce kicitata ce porwec ŋalek ce toponec kupël co kipo Apel. 25Kunyo, möce oripkey mente kot otay malim ŋalekap nyo ŋololwok, kuyu cekto co kitay molimnci neto nyo kisowu cek om wuli po koret, kuce kipuryo kot kusopco. Cimuci acek kulene cesopce ye kacetay mocelimnci neto nyo sowec kucone torot! 26Kitimtim polotet nyenyi yoto koret, ntene kukurto yawut kumwoy kule, “Mosotimtim koret yec, ntene puryo kot ku koret nkit pate, mosotimtim mpo torot.’’ 27Ŋolyontoni mwowu kule, “Yec’’ Kunye poru kutok topon kule, tukuk ce kicitany kuce citimtime oŋnkyinum sukuŋet kuŋet co mocitimtime. 28Kunyo misyini cikostoyisyi acek omnye kicenyoru poytoyisyet nye mocimuce kot citimtim. Kunyo akany cikaste cikoci Yiyintet sayet nye misyini nye yeme ceponte koyweyisyet oko muyotet. 29Omnye Yiyintenyo kunye mata nye orontoy.

will be added

X\