Hebrews 10

1Ntarastinekap Yutayek kuce poru pate kuyu rurwet nyepo wule yunto kerkeyinto nyepo tukuk ce toponec ce mite tay, nye puryo kot kuporu wule yunto tukucoto kupoyit manta. Kunyo komuce kulene ntarastinek kot kusat kunyol piko ce kenekey korosek pate, cekyicini Yiyintet kila kenyit? 2Nto yunye piko co soye Yiyintet, kuce kiciwun miyotyonikwa kupoyit manta nto puryo kot konkete kule mite miyotyet. Nto kiciyoŋnto nye mokyiye korosek. 3Kunyo kuyu wule yunto korosek co cikoytoy kila kenyit kuce sowu kunket piko miyotyonikwa om kenyit ake tokol. 4Omnye puryo kot komuce kenyis kot kowun miyotyonik korotik cepo yeyik oko warek. 5Omnye ye kikirik kuco Yesu koret, kimwoci Yiyintet kule: “Puryo kot möce nyi korosek oko kokotutek, ntene kiyiytowo ani nyi porto. 6Puryo kot ŋerekyini korosek ce cepele kumukul, nto kokotukek ce numu miyotyonik. 7Yoto omwowu kule, ‘Yiyintet omite yu kule ayiy kito nye möce nyi kule ayiy ani, kuyu wulo kicesilyo ŋalek ce nömo ani om kitaputap Ntarastinek.’ ’’ 8Kimwoy nyepo tayta kule, “Kipuryo kot möce nyi nto ŋerekyini korosek oko kokotutek oko mpo korosek cepo tyoŋik ce cepele.’’ Kimwoy kuyunyoto nka kot cikoytoy korosecutecu tokol kuyu wulo mwoytoy ntarastinek. 9Oŋnkumwoy yec kule, “Yiyintet amite yu saŋet ayiy kiy tokol nye möce nyi kule ayiy ani.’’ Kunyo kinum kuwec Yiyintet korosek tokol co kipo tay, sukuŋet kuker yeto korosyontet nyepo oyeny. 10Omnye Yesu Kristo kunye kiwany yisyet nye kimokyini Yiyintet. Omnye kisatec acek cetililitu om miyotyonik aret akenke om porto nye kime, kuyem nyoto. 11Yonye tisintet Yutoyintet ake tokol kila pesyo oŋnkwiy yisyet nye koytoy kokotutek ce caŋ ce kerkey, ntene puryo kot komuce kot konum kokotutecoto miyotyonik. 12Ntene Kristo kunye kikon kokotutyet akenke nyepo okokoy nye numu miyotyonik oŋnkopure yewutap tay nyepo Yiyintet. 13Kunyo mite kopure wuloto okokoy pesyet nye mokukoci Yiyintet kwek punikyi ŋecerok cepo kerenkokyi. 14Kunyo om korosyontenyi akenke, kunye kisat kunyol okokoy piko ce kimo kiponto miyotyo. 15Kwile mpo Muyet Nyetilil kumwowu nyepo tayta kule, 16“Mwowu Mokoryontet kule, Mosayiy ani kirotyani oko cekto om pesyosyecoto, mosokoci kopurune ntarastinekwani mukuleywek cikwa, mososil kowut kasoteywekwa orit.’’ 17Oŋnkumwoy yec kule: “Yoto kuye komosoti yec miyotyonikwa oko ŋalek ce miyotec ce kikwiy.’’ 18Kunyo, ye kicikalya pic miyotyonikwa kupuryo kot kutocemöce yec kokotutek ce numu miyotyet. 19Kunyo mpo yeya, cimuci yawut ciwut Otepto Nyetilil nye puryo kot cemuytosi, omnye kime Kristo kupo acek. 20Neto kunye kiyotwec aret nyelel nyepo soponto nye cepunte totetap siret, nyoto kunye porto nyepo Kristo nkit. 21Ceponte Tisintet nyewo nye poytoy kotap Yiyintet. 22Kunyo akente cekwa celekite wule mite Yiyintet nye ceponte mukuleyto nyepo manta, oko koyenet nye kwilat, oko mukuleywek ce kicesit cinum kasoteywek ceponto leliswek, oko porwonik ce kiciwune peko ce tililec. 23Möce kule cekwil kokenotet nye ceponte, omnye cinket kupoyit manta kule mosukoyitita Yiyintet kurtoyet nye kikurto. 24Möce kule cisot wule moceriptekey. Cikalyekey acek kwacek nkit om cömisyet oŋnkyiy yisyet nye topon. 25Monte kyaste nye komo cetuytosi om kirwoket kuyu wulo yiytoy piko alake yawut. Ntene möce cititirkey koromun kuyu wule kokäs kule karik Pesyetap Mokoryontet. 26Omnye ye kocetosyikey kyiy miyotyet cinketi oŋnkurok yec kicinket ŋalek cepo manta. Kupuryo kot kumite yec korosyontet ake nye muce kunum miyotyonik. 27Kito nye koŋet pate ku cemuye om kito nye mokwiyakay, nyoto ku musankut nyepo mata nye loye nye mokwaranta piko co toye Yiyintet! 28Cepoköce kume nye mocesoye ci ake tokol nye koyiri ntarastinekap Moses, ye mite piko oyenku nto somok ce kiköse ye kiyiye cicoto ŋolyontonoto. 29Kunyo asot pa, mosukutaŋany kulene cito nyo nyile Weritap Yiyintet? Ŋo nye nyile kule puryo kot kupo latik korotik cepo kirotyet nyo kisope neto miyotyet? Ŋo nye cupe Muyet Nyetilil nyepo poypoyet? Sot pa misyini cicoto kunyor taŋanynta nye tya? 30Omnye cinket cito nye kimwowu kule, “Mosoyoku ani,’’ Oŋkumwoy yec kule, “Mosukumutyi Mokoryontet pikyi musankut.’’ 31Ŋolyo nyepo muyot koromun ye kesuci cito yewuniyekap Yiyintet nye sopot! 32Möce asot wule kyoyunte akwek om letut yu kowo kulucok lakweyet nyepo Yiyintet. Kyotaŋany om tukuk ce caŋ oŋnkurok otitir nye kipuryo kot kupëlok wuyinwek. 33Kicecupok pesyosyek alak om taytap piko tokol oŋnkyitaŋanyak oŋnkoyomekey mpo oko piko alak ce kicitoŋonye kuyunyoto. 34Kyotaŋany mpo oko piko ce mite mopusi, oŋnkomuytoci om ŋerekwek cenyapan tukukwok tokol, omnye kyonketi kule ceponte kito ake nye topon nye pëlisyi nye pure okokoy. 35Kunyo monte kyaste titirotet nyimwoŋ omnye mosukukonok kokotutyet nyewo. 36Möce omuytoci sukuŋet ayiy kito nye möce Yiyintet, oŋnkonyoru kito nyo kikurto neto. 37Kuyu wulo mwowu silutekap Yiyintet kule, “Om poroyinto nye miniŋ yawut, ye mosukuco neto nyo coni, puryo kot kulilenekey. 38Ntene mosokuyen oŋnkusopco pikwani co yiye cepo manta. Nteye kotepe kot kuketitakey ake let, kupuryo kot oŋerekyini ani nyoto.’’ 39Puryo kot ciku acek piko co ketitoykey let okoy kupotyo. Ntene ceponte koyenet, kunyo mosicisopec.

will be added

X\