Hebrews 1

1Kiŋololyi Yiyintet mpo kukonyo om kenyisyek co kitil aret ce caŋ oko om wok ce caŋ kupunune wule mite workoyik. 2Ntene kuŋololwec acek om pesyosyecu po letut kupunune wule mite Werinyi. Kitany Yiyintet koret kupunte Werit oŋnku neto nye kikwey Yiyintet kupayta tukuk tokol cemite koret. 3Lekecece neto om lakweyet nyepo woyintap Yiyintet. Kerkey neto Yiyintet kuwoŋnkyi, kunyo ripe neto koret kumukul om swamet nyepo ŋolyontenyi. Nto om letut yu kowo kowun miyotyonik cepo piko tokol, kopure yewutap tay nyepo Yiyintet nyewo koromun om koret. 4Kikoci Yiyintet Werit kwek nyewo kupël malaykanik, kuyu wulo nyewo mpo kaynet nyenyi kupël nyepo malaykanik. 5Omnye tompo kumwoci Yiyintet kenyis malayket ake tokol kule, “Yiku nyi Werimwani; koyiku ani pesyoni Papaŋuŋ!’’ Tompo mpo kot kumwoci kule, “Mosoyiku ani Papanyi, oŋnkwek neto Werimwani.’’ 6Ye kikirik kuyok Yiyintet Werinyi poretyet kuce koret, kimwoy kule, “ Misyini kusay malaykanik tokol cepo Yiyintet neto.’’ 7Kimwoy Yiyintet ŋalek ce nöme malaykanik kule, “ Yiyintet kunye wece malaykanik kwek yomet, oŋnkuwec mutworikyi kwek ŋelyepik cepo mata’’ 8Ntene mwowu ŋalek ce nöme Werit kule, “Ayi Yiyintet, ŋecereŋuŋ nyepo poytoyisyet kunye pure kenyis okoy kenyis! Poytoy pikuk om poytoyisyet nyepo manta. 9Cöme ŋalek ce tililec, oŋnkitay senker ce miyotec. Kunyo Yiyintet nye Yiyinteŋuŋ kunye kikwey nyi, oŋnkuŋapeniŋ mwayta nyepo ŋerekwek cepo woyinto nyewo koromun, kupël ce kikoci coronutekuk’’ 10Kumwoy mpo kule, “Mokoryontet, nyi kunye kitany koret om yun kipo towunot, Kitanye yewuniyekuk koret torot. 11Mosukupotyo coto, mosukuyosekitu tokol kuyu siroy, ntene meseŋetu nyi; 12Meseriny nyi cekto kuyu kotit. Mpecek mosukuwecweckey kuyu siroy. Ntene yuye nyi nyoto okokoy, nye puryo kupoku soponŋuŋ.’’ 13Tompo kot kumwoci Yiyintet kenyis malayket kule: “Pure nyi yu po yewumwani nyepo tay, okoy okoci punikuk kwek ŋeceret nyepo kerenkokuk.’’ 14Kunyo malaykanik tokol kuce mukuleywek ce muyet pate ce yicini yisyet Yiyintet. Ce yoktoy neto wokukalya piko ce mosukunyor kosopotet.

will be added

X\