Galatians 6

1Mpo yeya, ye kacenäm citake tokol kwiye ŋolyo nye miyat, roke asat akwek piko co oponte mukuleywek ce toponec cito nyoto kawur, ntene roke ayiy kuyunyoto om aret nye topon, oŋnkosyem oripkey akwek nkit sukuŋet mente cesyemak mpo akwek kuyu cicoto. 2Otorcikey akwek kwakwek nkit terekok, omnye om aret nyeyunyoto kuye mosorup akwek ntarastinek cepo Kristo. 3Omnye ye sotekey citake kule oyiku nye tokunot oŋnkurok kupöc pate, ku keperperkey cicoto nkit. 4Ntene roke kukäskey ci ake tokol wule yunto neto nkit, nteye köse kule oyiye ŋalek ce toponec, kumöce kusilkey om tukuk ce kikwiy nye puryo kot kuyoyece ce kikwiy cito ake. 5Omnye ponto ci ake tokol terekwet nyenyi nkit nye tore. 6Möce cito nyo cinete lokoywek ce toponec kupcicin mokoryontit nye ponto oko konetintet nyenyi. 7Monte ciperperkey akwek kwakwek nkit, omnye puryo kot ciperpere Yiyintet. Tukuk ce kole cito; kuce tukuk ce mosukukis cicoto. 8Ye kakol cito mparet nyepo corokyinotet nyepo porto nyenyi, ku mparanato nye mosukukise omik cepo met. Nteye kakol cito mparet nyepo Muyet Nyetilil, ku mparanato nye mosukukise omik cepo soponto nye mopoku. 9Kunyo puryo kuroke cecosye acek mokyiy ŋalek ce toponec. Omnye ye kakyiy yisyonutek ce toponec, mosukupunto pesyosyek ce mocekisisye acek omikyo. 10Omnye om pesyo tokol nye kacenyoru poroyinto, kumisyini cikalye piko tokol, ntene kupëlis mpo yeya co kikoyen. 11Akäs pa akwek nyukutanik cewoyec ce kosilwok ani om yewumwani nkit. 12Piko tokol ce möce kule cesilkey ciporu momitek cepo porwonik cikwa kuce syeme kule cisimncok cewonak akwek. Kunyo yiye kuyunyoto pate kule sukuŋet mente citaŋanyec kupo murtowontetap Kristo. 13Omnye nka mpo picoto cewone, kuce puryo kot kurupe mpecek ntarastinek, kunyo möce cek kule cewonak akwek sukuŋet kusilkey om momitek nye mite porwonik cikwakwek. 14Ntene puryo kot osilekey ani om kiy ake tokol, tos pate om murtowontetap Mokoryontenyo Yesu Kristo. Omnye om murtowontet nyenyi, kunye asute kule kipok ŋalek cepo koret om wule amite ani oŋnkyamey om wule mite ŋalek cepo koret. 15Puryo kot ku ŋolyo nyewo ye kacewon cito nto ye puryo kot cewon. Ŋolyontet nyewo koromun pate, kuye ketililkey cito. 16Nto om wule mite piko co rupe ŋalecu om porwonik cikwa, osomncini ani cekto kule opurte kalyet oko kokolyoyisyet wanak oko Israel nyepo Yiyintet. 17Mawaŋnte omwowu kule, kuceke yawut kuwo tay, mente kot tokutaŋanya yec ci ake tokol; omnye momitek ce oponte om porto nyimwani kuce pelutok ce poru kule ayiku ani mutworintetap Yesu. 18Mpo yeya, osomwok kule opurte akwek poypoyetap Mokoryontenyo Yesu Kristo. Yunyoto.

will be added

X\