Galatians 5

1Kikutyacec acek Kristo sukuŋet komo kyiku mutwor. Kunyo oyoŋnkye okwilokisye, monte yec kot tokunämak kutiŋnkyok ŋony mucokit nyepo mutworyontit. 2Ani nyo Paulo nkit nye oŋololwok akwek, kunyo möce alim topon. Ye kocäm akwek kot cewonak, koporukey kule puryo kot kuponto Kristo latik mpo kisic om wule omite akwek. 3Omöce ani kule otosyikey yec akwil ŋolyontoni omwoci citake tokol nye kacäm kot cewon kule, mosukuratakay cito nyoto kurip ŋalek tokol ce mwowu ntarastinek. 4Nto piko alak ce mite wule omite akwek ce syeme kule cerup ntarastinek sukuŋet cesatokisye om wule mite Kristo. Omite akwek piko coto saŋ om wule mite poypoyetap Yiyintet. 5Ŋaleca ku cecemite acek cikeni om Muyet Nyetilil nyepo Yiyintet nye mite kwiyisyi om koyenet nyinyacek. 6Omnye ye kiciyomekey acek oko Kristo, kupuryo kot ku ŋolyo nyewo mpo kisic ye kacewonak nto ye puryo kot cewonak. Ŋolyontet nyewo ku koyenet nye yiyisyi kupunte cömisyet. 7Kyomite akwek oyiyisyi topon! Ŋo nye kikerektak ye marup ŋalek cepo manta? Kiperperak picoto kulene? 8Nka kot kiperperak cito nyoto kwiyisye ŋalek ce yune; kipuryo kot kukwone ŋaleca wule mite Yiyintet nyo kikurok akwek, 9kuyu wulo cemwoytoy kwak kule, “Muce mumarek ce tukusic kukoci kukut pusyek cepo teret nyewo.’’ 10Ntene tomite ani okenenokey akwek kule puryo kot omuci yec kot asot ŋalek alak, omnye kiciyomekey cepoyitu Mokoryontet akenke. Mosukumutyi Yiyintet musankut ci ake tokol nye mosok akwek nka kot ku nye yu ne. 11Mpo yeya, omne yu toce mite citoŋonyo ani okoy kunyi; ye kokomwoytoti ani kule topon wonset. Nto yunye kipo ŋaleca manta, nto puryo kot oponte ani wuyin om ŋalek ce omwoytoti cepo murtowontetap Kristo. 12Kuyu piko co mosok akwek, amöce ani kule kutosyikey cek om aret nyimwa okoy wokulotokis cekto nkit. 13Nto akwek mpo yeya, kicekurok oŋnkityaktak, kunyo monte kyiyisye kalyet nyoto sukuŋet kupaytak corokyinotet nyepo tukuk ce möce porwonik cikwok, kunyo oyiyisye koromun cömisyet okolyoykey akwek kwakwek nkit. 14Omnye ciyomntos ntarastinek tokol kwek akenke om ntarastit akenke nyo mwowu kule, “Cäm lyatyeŋuŋ kuyu wulo cömntoykey nyi nkit.’’ 15Nteye kowuskey kuyu tyoŋin oŋnkataŋanynkey akwek nkit, kumöce oripkey omnye omuci kwayarantekey akwek nkit. 16Ŋolyontet nye omwowok ani akwek kunyi kule, ayaste kwiyis Muyet Nyetilil kupayta soponwek cikwok, ntene monte ciŋerec porto om tukuk ce möce porto nyepo cito. 17Omnye tukuk ce möce porwonikyo kuce toyekey oko tukuk ce möce Muyet Nyetilil. Nto tukuk ce möce Muyet Nyetilil kuce toyekey oko tukuk ce möce porto nyepo cito. Coto tukway kuce punik ce senkerekey, kunyo puryo kot oyiye akwek tukuk ce möce kule kyiy. 18Nteye ntowok akwek Muyet Nyetilil, kupuryo kot omite yec ŋonyutap ntarastinek. 19Tukuk ce toku koromun ce yiye porto nyepo cito kucu, kuyu sakwayanat, simnyo, makatet nye miyat. 20Sayetap ototoywek, ponisyet, puniyontit, wokutyet, corokyinot, cemukuleyo, mucesta, 21oko pokitet, oko tumwonik ce miyotec, oko ŋalek alak tokol cekerkey oko coto. Kunyo osowok ani yawut kuyu wulo kikyasowok ikye kunyo kule, puryo kot kunyoru piko ce yiye ŋaleca poytoyisyetap Yiyintet. 22Ntene konu Muyet Nyetilil, cömisyet, ŋerekwek, kalyet, muytocinotet, poypoyet, toponiyet, cikaseninkey, 23sikenotet oko ripetapkey. Puryo yec ntarastit nye toye ŋalek ceyucutecu. 24Piko cepo Kristo kuce kipakäc soponto nyepo corokyinotet oko tukuk tokol ce möce porto. 25Muyet Nyetilil nye ceponte acek; kunye roke kurip soponwek cicacek. 26Puryo kot kuroke cenyim nto puryo kot kuroke cewuskey acek nkit, nto mpo cecorokyi citake.

will be added

X\