Galatians 4

1Ŋalek ce amöce ani omwowu kucu kule, ye tominiŋ wero nye mosikonti tukuk tokol cepo kwan, kwoyecin neto yoto oko mutworintet, nka kot ku neto nyepo tukuk tokol, 2Ye tokuminiŋ weroto kumite piko alake ceripe neto oko tukukyi okoy kupunto pesyet nyo kikwey kwan. 3Om aret nyeyunyoto kiciku mpo acek mutworik cepo poytoyisyet nyepo oyik cepo koret ye kitompo ciku piko cewoyec. 4Ntene ntowo kupunto pesyet nye yiytat topon, yoto kuyok Yiyintet Werinyi nkit nye kiyi korko oŋnkyepayta kuyu wule yunto ntarastinek cepo Yutayek. 5Yoto kutyacec acek piko ce kipaytec ntarastinek sukuŋet ciku lekokap Yiyintet. 6Kito nye poru kule oyiku akwek lekokyi kunye kiyok Yiyintet Muyet Nyetilil nyepo Werinyi kuco mukuleywek cicacek orit. Muyet Nyetilil nyoto kunyo kursyi kule, “Apa,’’ nye mwowu kule, “Papa.’’ 7Kunyo kimo oyiku yawut mutwor, ntene oyiku lekokyi. Nteye ye oyiku lekokyi kuporkey kule oyiku kontiyik. 8Kipuryo kot oŋnket akwek ikye keny Yiyintet, kunyo kyoyiku yoto mutwor cepo oyik ce puryo kot ku yiyik mpo kisic. 9Ntene yawut om pesyosyecu kyonket Yiyintet, nto momwowu kule kikonketok Yiyintet akwek, omne samac yec kule cewekyikey wule mite poytoyisyetap oyik ce moponto swama oŋnkupuryo kot kuponto latik. Omne samac akwek kule ceketyikey ciku mutwor cikwa! 10Toripe ntarastinek cepo pesyossyek oko orok, (oko wule yunto pesyoyek alake cewoyec) oko kenyisyek! 11Kunyo kwasot ani kule mosukupot püc pate yisyet nye kyayiye ataŋany om wule omite akwek. 12Mpo yeya, osomok kule opur kopurto nye kerkey oko nyimwani, omnye akerkeyekey ani oko akwek, tompo oyiwo ani akwek ŋolyo nye miyat. 13Omuci akwek asot omne somwowok ani lokoywek ce toponec om panta nyo kipo tayta; omnye kyomnyoni. 14Ntene kipuryo kot anyila nto mpo ataya ani akwek, nka kot kisyemak kunyikisyok porto nye kyomnyoni. Kyatoroca yoto kuyu wule omuci atorokte malayketap Yiyintet oko kuyu wule omuci atorokte Yesu Kristo! 15Kyoyiku yoto ŋerekotin, kukwiy kulene yawut? Omwowok ani nkit kule, nto kimukoktos yoto, ntokyomuci akwek kot olotu konyek cikwok oŋnkokono! 16Kunyo kwoyiku ani so yawut puniyontet nyimwoŋ omnye omwowok ŋalek cepo manta? 17Mite piko alake ce poru ŋerekwek kucämak akwek, ntene oŋnkupuryo kot kutoponec ŋalek cemöce. Ŋalek cemöce cekto pate ku kule cepciyak akwek om wule amite ani sukuŋet oŋerekyi akwek cekto. 18Ŋolyo nye topon kwak okokoy ye ŋerekyok akwek piko alake om ŋalek ce toponec, nka mpo ye mocepontekey oko akwek. 19Lekokwani ce minkec, otoŋonyi ani om mwoninto kuyu korko nye möce kucämnkey sukuŋet oyiyok akwek om aret nyepo oyeny oŋnkopurune Kristo wule omitowune akwek. 20Amöce ani kule ntokopontekey oko akwek om pantanyi, saŋet oŋnket ŋolyontet nye momwowu. Omnye asotok ani akwek koromun. 21Omwowo ani pa yawut akwek piko co möce kule kupaytec ntarastinek? Puryo kot olime akwek ŋalek ce mwowu ntarastinek? 22Mwowu ntarastinek kule kiponto Apram werik oyeny, kipo werit ake korko nye mutworin, nto werit ake kupo nyo korko nye momutworin. 23Kiceyi werit nyepo korket nyo mutworin kuyu wulo keyitoy piko tokol, ntene werinyi nyepo korket nye momutworin kunye kiceyi nyo om kurtoyet nyepo Yiyintet. 24Tyonkoc nyi nye poru ŋalek cepo orit. Kerkey korucoto oyenku oko kirotyanik oyeny. Korket akenke kunye cone tulwetap Sinai nyoto ku Akar nye yiye lekok ce mutwor. 25Kerkey Akar oko tulwetap Sinai nye mite koretap Arapia nye ciyuye Yerusalem nyepo pesyosyecu, omnye mutworin Yerusalem oko lekokyi. 26Ntene kerkey Yerusalem nyepo torot oko korket nye momutworin, nyoto ku yeyonyacek. 27Omnye mwowu silutekap Yiyintet kule, “Iŋerec korko nye son, nye tompo kot kuyi lekwa! Pol om ŋerekwek, nyi nye tompo kot käs mwonin nyepo lekwa! Omnye mosukuyi korko nye kicetay lekok ce caŋ, kupël korko nyo pontekey santenyi.’’ 28Ntene akwek mpo yeya, oyiku akwek lekokap kirotyet nyepo Yiyintet kuyu wulo kiyunto Isaka. 29Kitaŋany om pesyosyecoto werit nyo kiceyi kuyu wule ceyitoy piko tokol kutaŋany werit nyo kiceyi om swametap Muyet Nyetilil. Kunyo kuyunyoto mpo yawut. 30Ntene mwowu ne silutekap Yiyintet cu mwowu kule, “Kwet korket nyo mutworin oko werinyi; omnye puryo kot komukoktos kot kontiyis kupcicin tukukap kwan werit nyepo korko nye mutworin oko werit nyepo korko nye momutworin.’’ 31Kunyo mpo yeya, puryo kot ciku acek lekokap korko nye mutworin, ntene ciku lekokap korko nye momutworin.

will be added

X\