Galatians 3

1Akwek Kalatiyek solonocu! Kicepanak? Akwek kuce kuciporwok akäs om konyek kule kicewuyitoci Yesu kumeci murtowontet. 2Kunyo omwowo ani pa akwek ŋolyontoni akenke: Kyonyoru Muyet Nyetilil nyepo Yiyintet omnye kyorup Ntarastinek nto omnye kyolim oŋnkocäm lokoywek ce toponec? 3Omuci akwek osolwonken kulene? Kyocece ocäm Muyet Nyetilil nyepo Yiyintet, kunyo omöce yawut kule wociwaŋnte om ŋalek cepo swamet nyimwoŋ nkit? 4Mokwek ŋal cepo püc pate ce puryo kot kuponto latik ŋalek tokol co kyayiy akwek. Ŋalek cepo manta kucu kule, puryo komokomukoktos kot kuyuyit nyo. 5Ye kikonok Yiyintet akwek Muyet Nyetilil oŋnkwiy ŋalek cepo kakitat om wule omite akwek, kuporkey pa kule yiye Yiyintet kuyunyoto omnye orupe akwek ntarastinek nto omnye kyolim oŋnkocäm lokoywek ce toponec. 6Kerkey ŋaleca oko wule mwoytoy silutekap Yiyintet om ŋalek ce nöme Apram ce mwowu kule; “Kiyen Apram kucäm Yiyintet, nto om letut nyepo koyenet nyenyi nyoto, yoto kucäm Yiyintet Apram kwek ci nyepo manta.’’ 7Kunyo yunyoto om wule omite akwek, misyini aŋnket kule, piko ceponto koyenet nyoto kuce mucokoronik cepo Apram. 8Kiŋor silutekap Yiyintet kule mosukusat Yiyintet kunyol lamek om wule mite neto om koyenet. Kumwoy silutekap Yiyintet cepo lokoywek ce toponec ce nöme Apram kule, “Mosukukoci Yiyintet kupeyok piko cepo koret tokol kupunte wule mite nyi.’’ 9Kuyen Apram kucömis yoto cikoci neto kupeyok, kunyo cikocini piko tokol kupeyok ye kocömis kuyu wulo kicikocinto Apram. 10Kunyo piko tokol ce kenekey kule ceripe ntarastinek, kuce kicesoci. Omnye mwowu silutekap Yiyintet kule, “Ci ake tokol nye puryo kot kurupe oŋnkuywey ŋolyo ake tokol nye kicesil kitaputap ntarastinek kunye kicesoci cicoto!’’ 11Porukey yawut topon kule, puryo ci nye muce kusatakay kunyol om wule mite Yiyintet ye karup ntarastinek, omnye mwowu silutekap Yiyintet kule, “Mosicisop ci ake tokol nye nyolunot om wule mite Yiyintet om koyenet pate.’’ 12Ntene puryo kukenekey ntarastinek koyenet omnye mwowu silutek kule, “Ci ake tokol nye yiye ŋalek tokol ce mwowu ntarastinek kunye mosukopurto neto nyoto ntarastinek.’’ 13Kristo kunye kisorwec acek om wule mite cupisyet nyepo ntarastinek, omnye kinum neto nkit cupisyet nyo sutu ntarastinek. Mwowu silutekap Yiyintet kule, “Ci ake tokol nye kiciketyi ketit kunye cupot.’’ 14Kunyo kikwiy Kristo kuyunyoto sukuŋet kupeyokap Yiyintet co kikikurtoci Apram cikoci coto lamek kupunte wule mite Kristo Yesu, oko kule siceŋet mpo acek om koyenet cenyoru kokotutyet nyepo Muyet Nyetilil nyo kikurtoy Yiyintet. 15Mpo yeya, mosoporwok ani ayuye soponto nyepo kwak kule, “Ye kokwicin piko oyenku oŋnkusil kirotyet, kupuryo yec cito ake om picoto nye muce kot kot kwiri kirotyet nyoto; nto mpo kutayi ŋolyontet ake om kirotyanato.’’ 16Kunyo Kikurtoci Yiyintet Apram oko mucokorenyi, puryo kot kumwowu kule, “Oko mucokoronikyi,’’ Nye poru kule pic ce caŋ, mwowu pate kule, “Oko wule mite mucokoreŋuŋ.’’ Nye poru kule akenke pate. Nto nyoto akenke ku Kristo! 17Ŋolyontet nye amöce ani kule omwowu kunyi kule, kikwiy Yiyintet kirotyet oŋnkukurto kumwoy kule mosorip kirotyanato, kunyo ntarastinek ce kikwoni letutap kenyisyek pokolwokik amwan ok sosom kuce puryo kot komuce kot kwiri oŋnkunum kirotyet nyo kikurto Yiyintet keny. 18Kunyo ye nömekey tukuk ce konu Yiyintet oko ntarastinek, kupuryo kot kunömekey oko kirotyenyi. Ntene kikoci Yiyintet Apram kirotyet omnye kikurtoci neto. 19Kunyo omne sicekon ntarastinek? Kicekon cetos sukuŋet kupor wule yunto kawontyontit; ntene kicemöce kule sukopur pate okoy pesyet nye cone mucokoretap Apram nyo kikicekurtoci. Kisut malaykanik ntarastinek. Kiyoŋe citake kwenutap Yiyintet oko malaykanicato. 20Ntene puryo kot cemöce cito nye yiyisyi kuyoŋe kwen omnye mite cito akenke, nyoto ku Yiyintet akenke nkit pate. 21Porukey pa ŋalecu kule toyekey ntarastinek oko kurtoyetap Yiyintet? Puryo kot kuyunyo! Omnye nto kicekon ntarastinek ce ponto kamukeywek ce muce kusop piko, nteporukey kule cimuce cesat kunyol piko om wule mite Yiyintet kupunte wule mite ntarastinek. 22Ntene kimwoy silutekap Yiyintet kule “Kupayta miyotyet koret kumukul, sukuŋet kunyor piko ce kikoyen kokotutyet nyo kicekurto nye cekonu om koyenet nye ponte cito om wule mite Kristo.’’ 23Kutompo kot kuco koyenet, kicemite yoto ciku acek rototin om mopusi om poytoyisyetap ntarastinek cekonye okoy ciŋoŋ koyenet nyitenyi musukuco. 24Kunyo kerkey ntarastinek oko konetintet nye kiripec acek okoy kuco Kristo. Sukuŋet kuco cokusatec cenyolu om wule mite Yiyintet cepunte koyenet. 25Kunyo kipunto yawut pesyetap koyenet, kuporkey kule kimokuripec acek konetintet nyankwe. 26Kyopunte akwek tokol koyenet sukuŋet oyiku lekokap Yiyintet ce kikoyomokey oko Yesu Kristo. 27Omnye kicepatisanak oyomekey oko Yesu Kristo, kunyo kyolac kerkeyinto nyepo Yesu Kristo. 28Kunyo puryo kot kumite pciyatet nyepo Yutayek oko Kirikik, nto nye pciye mutworik oko co puryo ku mutworik, nto nye pciye moronik oko koruk, oyiku akwek tokol akenke om koyenet om wule mite Yesu Kristo. 29Nteyu oyiku akwek tokol pikap Kristo, kuporkey kule oyiku mucokoronikap Apram ce mosonyoru kokotutyet nye kikurto Yiyintet.

will be added

X\