1 Nto om letutap kenyisyek taman ok amwan onomen ani aketitekey yec Yerusalem cepetekey Parnapa, yoto akwer cepetekey oko Tito. 2 Kyawo alaŋnte omnye kiŋoŋwo kuporwo Yiyintet kule roke awo ani wuloto. Wocetuye acek om kirwoket nye kiwuŋat oko kiyokik cewoyec nkit, oŋnkoporci cekto lokoywek ce kyomwoci ani lamek. Kipuryo kot amöce ani kule kupot pöc pate yisyemwani nye kyayiy, nto yisyet nye kyomite oyiye yoto. 3 Kipuryo mpo yoto kot cisimnci kule cewon Tito nye kicepontekey acek tukway, nka kot ki ci nye Kirikin. 4 Ntene kimöce piko alak kule cewon neto. Kikwa picoto ce kipuryo kot kupo luket nyinyacek oŋnkwokowut orit kuyu wotik kule sukuŋet kuwot oŋnkukäs kalyet nye ceponte acek om Kristo. Kimöce cekto kule cewecwecec acek ciku mutwor. 5 Ntene kipuryo kot cecömnci ŋalekwa mpo kisic, sukuŋet ceripok acek opurte okokoy lokoywek ce toponec. 6 Komwowu kule kantoyik co sutekey kule ciku cewoyec. Akure ani cekto kantoyik. Ntene yoyece Yiyintet piko tokol, omnye puryo kuköse neto kule yunto tontap cito nyepo saŋ. Kunyo kipuryo kot kuneta ani kantoyicoto ŋolyo nyelel. 7 Ŋalek ce kikäs cekto pate om wule amite ani kucu kule, kikono Yiyintet yisyet nye omwoytoti omwoci lamek lokoywek ce toponec, kuyu wulo kicikoci Petero yisyet kumwocinot Yutayek lokoywek ce toponec. 8 Omnye Yiyintet nyo kikocini Petero kwek kiyokintet nyepo Yutayek kunye kikono mpo ani oyiku kiyokintet nyepo lamek. 9 Kunyo Yakopo oko Kefa oko Yowana ce kicinket kule cekto kuce tolocikap piko cepo Yiyintet, kuce kinket kule kikono ani Yiyintet yisyoni pciyat. Yoto cisupaykey oko cekto cenämnkey yewuniyek, oŋnkyelimncine kule ani oko Parnapa mosicipe acek wule mite lamek, kupa cekto wule mite Yutayek. 10 Kimite ŋolyontet akenke nye kicecomncine kule misyini cisoti acek pononik. Ŋolyontet nyoto kunye kyoyisye ani swama okokoy kunyi. 11 Ntene yoto ntowo kuco Petero okoy kupun Antiyok, apolyi ani neto koromun om taytap piko tokol om ŋalek ce kitoku ce kipuryo kot kupo manta ce kikwiye. 12 Kikwomisyi neto kunyo oko mpo yeya cepo lamek kutompo kot kukwa piko ce kiyoku Yakopo; Ntene ntowo kupun picoto, kutoyis Petero nye komokwomisyi oko piko cut, omnye kinyokorit om wule mite piko co kimöce kule roke cewon lamek. 13 Yoto kuyomokey Petero oko Yutayek ce nyokorec oŋnkwiy ŋolyontoni po perperyo okoy kowut mpene Parnapa wule mite cekto picoto kinyokorec. 14 Nteyu kowo akäs ani kule puryo kot kurupe cekto aret nye rotat nyepo lokoywek ce toponec, yoto omwoci ani Petero om taytap piko tokol kule, “Yiku nyi Yutoyin, kunyo kwemite kwak puri kopurto nyepo lamek nye puryo kot kupo Yutayek, omne sesimnci nyi kule misyini kopur lamek kapurto nyepo Yutayek?’’ 15 Po manta kule kiceyiyec acek ciku Yutayek, ntene puryo kot ciku lamek co ponto miyotyonik. 16 Kunyo cinket acek yec kule satoktos cito kunyol om wule mite Yiyintet om koyenet nye keyen pate Yesu Kristo, ntene puryo kot ku kule kocerip ntarastinek; kunyo kiciyen mpo acek Yesu Kristo sukuŋet cesatokisye cenyolu om wule mite Yiyintet kupunte koyenet nye ceponte om wule mite Kristo. 17 Kunyo ye cemite acek cesyeme kule cesatokisye om wule mite Yiyintet om koyomotet nyenyo nye kiciyomekey oko Kristo, oŋnkutok kuporkey yec kule ciku pic ce ponto miyotyonik kuyu wule yunto lamek, kupor pa ŋalecato kule yiyisyi Kristo yisyet nye kolyoy miyotyonik? Puryo kot kuyunyo mpo kisic! 18 Ye kasyem ani yec atec kuyoŋ ntarastinek ce kikyawirte kupotyo, kuporkey kule amite owurtoy. 19 Nto kuyu wule yunto ntarastinek, kyamey om wule mite ntarastinek saŋet arup soponto nyepo Yiyintet. Kicepakäca ani oko Kristo om murtowontenyi. 20 Kunyo kimosope kwani nkit, ntene Kristo kunye mitowune soponto nyimwani orit. Soponto nye osope ani yawut, kunye soponto nye osope om koyenet nye oyentyini Weritap Yiyintet; nye kicäma oŋnkukoyito soponto nyenyi kumeco ani. 21 Puryo kot otoye ani poypoyetap Yiyintet. Ye muce kot kusatokis kunyol piko om wule mite Yiyintet kupunte ntarastinek, kuporkey kule kime Kristo püc pate.
