Galatians 1

1Cone parwani wule amite ani Paulo; kiyokintet nye kipuryo kot kukweya ani piko nto kukweya cito, ntene kikweya Yesu Kristo nkit oko Papa nyo kiŋet Yesu kotutune met. 2Ani oko mpo yeya ce cepontekey kuce cesilwok akwek pikap Yiyintet ce mite koretap Kalatiya. 3Cesomwok onyoru poypoyet oko kalyet nye cone wule mite Papanyo oko Yesu Kristo. 4Kristo nye kiywey cömisyetap Yiyintenyo oŋnku Papanyo oŋnkukoytokey neto sukuŋet konum miyotyonik cicacek om pesyosyecu miyotec. 5Kunyo kante kupoyit woyinto wule mite Yiyintet okokoy okoy okokoy. Yunyoto. 6Kwakitenak ani akäs kule omoce akwek kule kyaste lakwar Yiyintet nyo kikurok om poypoyetap Kristo, oŋnkolimnte yec lokoywek alak. 7Ŋalek cepo manta kucu kule, puryo kot kumite yec lokoywek alake ce toponec. Komwowu kuyunyoto omnye mite piko alake ce mosok akwek ce syeme kule cewecwec piko cepo Kristo. 8Ntene nka mpo acek nto mpo malayket nye cone torot, oŋnkusyem cokumwowok akwek lokoywek ce pciyotin ce puryo kot kukerkey oko lokoywek co kicemwowok acek, kuporkey kule misyini kucup Yiyintet cicoto. 9Kicemwowu acek ŋalecu kunyo om tay, kunyo omwowu ani yec otosyini kule, ye komwowok akwek ci ake tokol lokoywek ce toponec ce puryo kot kukerkey oko lokoywek co kyocäm akwek, misyini kucup Yiyintet cicoto. 10Poru ra yawut ŋalekwani cutecu kuyunye asyeme kule sukuŋet kucäma piko? Puryo kot kuyunyo! Amöce kule kucämnta Yiyintet! Osoti akwek kule asyeme ani kule aŋerec piko? Nto kwosyeme kule aŋerec piko pate, nto puryo kot oyiku mutworintet nyepo Kristo. 11Omwowok ani akwek mpo yeya kule, lokoywek ce toponec co kyomwowok akwek kuce kipuryo kot kutowu cito. 12Kipuryo mpo kot kukono nto kuneta ani ci ake tokol. Ntene Yesu Kristo nkit nye kiŋoŋwo kuporwo ŋaleca. 13Kyolim akwek ŋalek cepo manta cepo kopurto nye kyoponte ani ye kitorupe ntarastinek tokol cepo Yutayek. Oŋnketi akwek wule kyotoŋoŋntoy ani pikap Yiyintet, nye kipuryo kot omuye, nye kyosyeme kule opot kupotyo. 14Kyopëli ani piko cepo pinta nyimwani om aret nye kyorupe tinitap Yutayek oko om aret nye kyorupe ntarastinek cepo mpo kukunyo. 15Ntene Yiyintet nkit om poypoyenyi nye kikweya ani kutompo kot ceyiyo, nto om letut kukono oyici neto yisyet, 16oŋnkuporwo kuŋoŋwo Werinyi kule saŋet womwoci lamek lokoywekyi ce toponec. Kipuryo kot awo wule mite ci ake tokol watepe kukono ŋomnonet nyepo kito nye mayiy. 17Kipuryo mpo kot awo ani Yerusalem wakäs kiyokik co kinyosyo kwek kiyokik. Puryo kot kuyunyo. Kyanyosye awo Arapia, nto om letut oketukey yec Tamasko. 18Yoto om letutap kenyisyek somok, onomen ani awo Yerusalem orutoci Petero, kule saŋet kukono lokoywek. Wopur oko neto awany pesyosyek taman oko mut. 19Ntene kipuryo kot amuc ani yoto kot akäs kiyokik alak. Kyakäs pate Yakopo mutakwametitap Mokoryontenyo. 20Owolikey ani om taytap Yiyintet kule po manta ŋalek tokol cu osile nye puryo kot ku mwiynan. 21Nto om letut, onomen awo okoy opunte koretap Siriya. 22Ntene kipuryo kot konketo Kristayek cepo Yuteya om pesyosyecoto tokol. 23Kilime cek pate kumwowu piko kule, “Citye kisyeme kule ataŋanyec acek kunyi mite yawut kumwoytoti koyenet nye kisyeme neto ikye kule opot kupot.’’ 24Kunyo kukasta cekto Yiyintet om wule amite ani.

will be added

X\