Ephesians 6

1Akwek lekok, yisyemwakwek kuyu Kristayek aywey poyik co kiyok, omnye yisyet nyoto nyepo manta. 2Ntarastit nyi kule, “Ywey kon oko komet.’’ Kunye po tayta nye ponto kurtoyoni kule, 3sukuŋet kunyol kiy ake tokol om wule mite nyi, oŋnkipur koret wany kenyisyek ce caŋ. 4Poyik, monte cesut lekokwok om aret nye miyat nye muce kusutyi kunerekis, ntene möce anet kuneryo kuyweyis topon kuyu Kristayek. 5Akwek mutworik, möce aywey mokorenikwok om muyotet, möce oyiyisye mukuleyto akenke nye topon kuyu nye ayweyi Kristo. 6Monte kyiye kuyunyoto ye mite cek kukösok kuyu piko ce möce kule ciŋerece piko, ntene oyiye yisyet nye möce Yiyintet om mukuleyto akenke kuyu mutworikap Kristo. 7Oyiye yisyonutek om ŋerekwek kuyu nye oyicini Mokoryontet nye puryo kot ku kule oyicini piko. 8Möce oŋnket kule mosukukoci Mokoryontet musyaret ci ake tokol nka mpo mutworin nto nye puryo ku mutworin; kupo yisyet nye topon nye yiye. 9Akwek mokorenik, möce oyiye mpo akwek kuyunyoto om wule mite mutworikwok, mönte cimuyi cekto, möce oŋnket kule opoye akwek, oko mutworikwok Mokoryontet akenke nye mite torot, nye mutyini musankut ci ake tokol kuyoyec kukerkeyit. 10Ŋolyontet nyepo letut, möce otitir om koyomotet oko Mokoryontet oŋnkoyiyisye swamet nyenyi nyewo. 11Anäm loŋet nyepo Yiyintet, sukuŋet amukte tekutek ce miyotec cepo setani nyewo nyepo oyik. 12Omnye puryo kot cepoye acek piko, ntene cemite ceporye oyik ce miyotec ce motoku ce mite koret torot, oko ce poytoyisyi, oko ceponto kamukeywek, oko ceponto swamet nyewo, om kenyisyecu po menonet. 13Kunyo anäm yawut loŋet nyepo Yiyintet sukuŋet amukte pesyet nye miyat, nteye koporye kot awany, yoto kuye anyoru ye koyoŋe. 14Kunyo oyoŋnkye topon, okoci kwek ŋalek cepo manta porowet nye orote suwenutek cikwok, oŋnkolac tililinto kwek loŋet nyepo karnet nye kerektoy teket. 15Akante kukwilakay yiytayatet nye omwoytoy lokoywek ce toponec cepo kalyet kwek kweyonik cikwok cepo kerenkokwok. 16Anämate okokoy koyenet kwek loŋet, sukuŋet kukerekta kotyek tokol ce loyotin ce wutu oyinoto nye miyat. 17Acäm kasopotet kwek nyo kutwetap karnet nyimwoŋ oŋnkwek ŋolyontetap Yiyintet rotwetap cok nye konu Muyet Nyetilil. 18Ayweye ŋalecu tokol om somset nye osome kokolyoyisyet nyepo Yiyintet. Osome om pesyo ake tokol om swamet nyepo Muyet Nyetilil. Kunyo otitir, monte kyaste, osomnci pikap Yiyintet okokoy. 19Osomwo mpo ani sukuŋet kukono Yiyintet lokoywek ce ye kaŋalal amuc aŋalal om nyikanatet aparte lokoywek ce toponec ce wuŋotin. 20Oyiku ani kiyokin nyepo lokoywek ce toponec nka kot omite mopusi. Osomwo sukuŋet aŋalal om nyikanatet kuyu wulo misyini aŋalalye. 21Tekiko yeya nyacek oŋnku mutworintet nyepo manta om yisyetap Mokoryontet kunye mosukumwowok akwek ŋalek tokol ce nömo ani, sukuŋet oŋnket akwek wule opurtoy ani. 22Kunyo koyoku kuco cokumwowok wule cipurtoy acek om wuli oŋnkutitirok. 23Kante kukoci Yiyintet Papa oko Mokoryontet Yesu Kristo kalyet oko cömisyet mpo yeya tokol om koyenet. 24Opurte poypoyet piko tokol co yene Mokoryontenyo Yesu Kristo om cömisyet nye puryo kot kupoku.

will be added

X\