Ephesians 5

1Omnye oyiku akwek lekokap Yiyintet ce camanik, kunyo misyini akerkeyitu neto. 2Misyini kurip soponto nyimwoŋ cömisyet kuyu wulo kicämec acek Kristo oŋnkukon soponto nyenyi kupo acek sukuŋet kwek kokotutyet nye poŋu topon nye korosyontet nye ŋerece Yiyintet. 3Kunyo ye oyiku akwek lekokap Yiyintet, kupuryo kuroke kot celimncok sakwayanat nto kopurto nye miyat nto moroŋyantit. 4Puryo mpo kot ku topon oyiyisye ŋalek cepo kawotyontit, nto perperyo nto ŋalek ce somis. Ntene möce akaste Yiyintet pate. 5Möce oŋnket ŋalecu kule, puryo kot komuce kot kunyor kontisyet om poytoyisyet nyepo Kristo oko nyepo Yiyintet ci nye yiye sakwayanat, nto nye ponto kopurto nye miyat, nto nye moroŋya (omnye moroŋyantit kunye poru sayet nyepo kerkeyik) 6Monte kuperperak ci ake tokol kwiyisye ŋalek cepo mwiynan pate omnye ŋalek ceyucoto kuye sukuŋet kunerekyi Yiyintet piko ce puryo kot kulimncini neto. 7Kunyo ayaste kwiyat kwicek nkit piko ceyucoto. 8Kyomite akwek ikye menonet, ntene omite yawut wule mite lakweyet. 9Omnye lakweyet kunye sutu kupuswek wok cecaŋ cepo toponiyet oko tililinto oko ŋalek cepo manta. 10Asyem anetkey ŋalek ce ŋerece Yiyintet. 11Ayaste monte ayiy tukuk cepo menonet ce puryo kot kuponto latik co yiye piko, ntene otoru kukwa wule lakwey. 12Omnye ŋolyo nyepo kalilan koromun mpo ye moceŋalale wule wuŋat ŋalek ce yiye cek. 13Nteye kocipor ceŋany tukuk tokol kukwa wule lakwey yoto kuye cipor kutok topon wule yunto tukucoto. 14Omnye toku topon kiy ake tokol nye kaceŋany kutok, kuyunyoto sukuŋet cemwoy kule, “Ŋet cito nyo mite rwonto! tutune met! Mosukukoniŋ Kristo lakweyet.’’ 15Kunyo möce orip topon wule opurtoy akwek, monte cipur kopurto nyepo piko co perper, ntene opur kuyu piko ce ŋomec. 16Oyiyisye topon poroyinto ake tokol nye oponte, omnye miyotec pesyosyecu. 17Kunyo monte ceperperitu, ntene möce asyem oŋnket kito nye möce Mokoryontet kule ayiy. 18Monte cepokitye komek ce muce kowurtak, ntene möce opiyony Muyet Nyetilil, 19Möce otumncinikey kwakwek nkit om tumwonik cepo kakastayet, oko om tumwonik ce kostoy Yiyintet, oko tumwonik ce tililec. Möce otumnci Mokoryontet tumwonik ce rurtos ce kwone mukuleywekwok. 20Akaste Yiyintet Papa okokoy om kiy ake tokol kupunte kaynetap Mokoryontet Yesu Kristo! 21Möce ayweyikey akwek nkit omnye oyweyi akwek Kristo. 22Möce koruk ayweyi sanik cikwok, kuyu wulo oyweyi akwek Mokoryontet. 23Omnye moron kunye nyewo om wule mite korkenyi, kuyu wulo nyewo Kristo om wule mite pikap Yiyintet, nyoto kunye porto nyenyi, nto Kristo nkit kunye Kosopintet. 24Kunyo misyini kuywey koromun koruk sanik cikwa, kuyu wulo yweye cekto pikap Yiyintet om Kristo. 25Möce moronik acäm koruk cikwok kuyu wulo kicämnta Kristo pikap Yiyintet oŋnkukoyito soponto nyenyi kumeci cekto. 26Kikwiy kuyunyoto kule sukuŋet kowun kutililitu pikap Yiyintet om ŋolyontenyi oko peko, 27kule sukuŋet kukwer pikap Yiyintet kukwa wule mite neto kuponto toponiyet tokol nyetilil nye moponto lelis, oŋnkupuryo kot kuponto tisyet nto nye moponto kiy ake tokol nye miyat. 28Kunyo misyini moronik kucäm korukwa kuyu wulo cömtoy cek porwonik cikwa nkit. Ci nye kacäm korkenyi kunye kacämnkey neto nyoto nkit. 29Omnye puryo ci nye senkere porto nyenyi nkit, ntene poye oŋnkurip topon kuyu wulo riptoy Kristo pikap Yiyintet. 30Omnye ciku acek piko cepo porto nyepo Kristo. 31Kuyu wulo mwowu silutekap Yiyintet kule, “Om ŋolyontoni kuye sukuŋet kupakakta cito kwan oko kamet oŋnkuyomokey oko korkenyi, yoto kwek piko oyenku porto akenke.’’ 32Mite ŋalek ce woyec cepo manta ce wuŋotin om ŋalecu po silutekap Yiyintet. Asoti ani om kasoteywekwani kule nömekey oko Kristo oko pikap Yiyintet. 33Ntene nömekey mpo yec ŋalecu oko akwek, kunyo möce kucäm ci ake tokol om akwek korkenyi kuyu wulo cömtoykey neto nkit, oŋnkumöce konket korko kule oyweyi santenyi.

will be added

X\