Ephesians 4

1Kunyo osomok ani akwek. Ani kunye oyiku mopusyontet omnye oyiye yisyet nyepo Mokoryontet. Möce opurte soponto nye oyoyeci oko nyo kikonok Yiyintet ye kikurok. 2Otoloyitu, oŋnkopoypoyitu, oŋnkomuytocini okokoy, sonyoru cömisyet okolyoykey akwek kwakwek nkit. 3Kikoyomok Muyet Nyetilil oyiku akenke, kunyo asyem orip koyomet nyoto, opurte kalyet akwek kwakwek nkit. 4Mite porto akenke oko Muyet Nyetilil akenke, kuyu wulo mite konketotet akenke nye kikurtowok akwek Yiyintet. 5Mite Mokoryontet akenke nkit oko koyenet akenke, oko patisanet akenke. 6Mite Yiyintet akenke nkit nye Papa nyepo piko tokol oŋnku nye Mokoryontet nye poytoy tukuk tokol, nye yiyisyi om tukuk tokol, oŋnkumitowune tukuk tokol wule mite neto. 7Kicikoci ci ake tokol om acek kokotutek ce pciyotin kuyu wule moktoy Kristo. 8Kuyu wulo mwowu silutekap Yiyintet kule, “Yo kiweti torot wule low, kikwer neto yoto oyik ce miyotec. Kikoci piko kokotutek.’’ 9Kunyo poru ne ŋolyontoni mwowu kule, “Yo kiweti neto torot wule low.’’ Poru kule kinyosyo kuco ŋony. 10Kunyo neto nye cito nye kirek kuco ŋony, kunye neto nye kiwo torot wule low koromun sukuŋet kupayta koret tokol kumukul. 11Neto kunye kikoci piko kokotutek, kukwey piko alak kwek kiyokik, kwek alak workoyik, kwek alake mwoytoyik cepo lokoywek ce toponec, kwek alake mesewek, kwek alake konetik. 12Kikwiy kuyunyitenyi sukuŋet kuyiyta piko tokol cepo Yiyintet om yisyet nyepo Kristayek, nyoto kunye yisyet kutec porto nyepo Kristo. 13Kunyo mosiciyomekey acek om koyomotet nyoto akenke om koyenet nyinyo oko ŋomnonet nye ceponte nye conket Weritap Yiyintet. Mosiciku piko cewoyec okoy cepunte koyinto nyepo wule tento Kristo. 14Yoto kuye komo cekerkeyekey acek oko lekoy ce sute yomet kuroye wuli oko wuli, nto yomet nyoto kunye konetisyet nyepo piko ce perperisyi. Piko coto kuce ntocini piko alak kumosokis kwiyisye ŋomnonet nye kitowu cekto nkit. 15Ntene moceŋalal yoto ŋalek cepo manta om mukuleyto nyepo cömisyet, misyini cenerye om aret ake tokol om wule mite Kristo nye metit nye ntowec. 16Yomntos Kristo kutuyo tukuk tokol cepo porto oŋnkupayta. Nomntos tukuk tokol sukuŋet kwek porto akenke. Kunyo ye keyis tukuk tokol topon kuyu wule cemoktoy, yoto kuye sukuner porto tokol topon om cömisyet. 17Kunyo osomwok ani aŋnkasyem asowok om kaynetap Mokoryontet kule ayaste monte yec tocipur kupurto nye kerkey nyepo Lamek co ponto soponto nyepo kasoteywek ce puryo wol. 18Ponto kasoteywek cikwa menonet, puryo kot kuponto cek soponto nyo konu Yiyintet, omnye puryo kot kunkete oŋnkupuryo kot kucöme mpo kisic. 19Kimo kuponto kalilan ake tokol, kicämnta pate kule kyiye ŋalek ce miyotec nye kimokuyweyisyi ye mokwiy ŋolyo ake tokol nye samis. 20Ntene kipuryo kot anetkey akwek ŋalek cepo Kristo ceyucoto! 21Kyolim akwek kupoyit manta ŋalek cenöme Yesu. Kicinetak kuyu konomikyi ŋalek cepo manta ce mite wule mite neto. 22Kunyo awirte kapurto nyimwoŋ nyepo keny nye kiwur nye kipo corokyinotetap koperperisyet. 23Misyini awec kulelakitu mukuleywek cikwok. 24Misyini alac siret nyepo soponto nyelel nye kicitany kukerkeyit oko Yiyintet nye porukey om soponto nyepo manta nye rotat oŋnkutilil. 25Kunyo awirte koperperisyo, möce kuŋalal ci tokol ŋolyo nyepo manta om wule mite yeyanyi, omnye ciku acek tokol luket akenke nyepo porto nyepo Kristo. 26Ye Kotepe kot onyeru, monte kusutwok nyerunotet kot yiy miyotyet, monte cipurte nyerunotet kot kwimen koret. 27Monte cikoci setani nyewo nyepo oyik poroyinto. 28Misyini kwasta cito nyo kicorin corsyet oŋnkucec kwiyis sukuŋet kunyor omik om aret nyepo manta, oŋnkucec kukalya pononik. 29Ye oŋololi, monte kot kukwane kutuwak cikwok ŋalek ce miyotec, oyiyisye pate ŋalek cetoponec ce kolyoy, sukuŋet kukalya ŋalek ce oŋololi akwek piko co lime. 30Monte kot cinerec Muyet Nyetilil nyepo Yiyintet, oŋnkupor kukwil kule mosukupunto pesyet nye mosukutyacak Yiyintet. Omnye Muyet Nyetilil kunye pelutyet nye poru kule opoye akwek Yiyintet. 31Awirte meyintap mo ake tokol oko sokornat oko nerekwek. Monte kyiyisye polot oko cupisyet, awirte senkerat ake tokol. 32Ntene otoloyitu oŋnkopoypoyitu om mukuleywekwok om wule mite ci tokol om akwek. Akalyakey akwek kwakwek nkit kuyu wulo kikalyak. Yiyintet kupunte wule mite Yesu Kristo.

will be added

X\