Ephesians 3

1Om ŋolyontoni kuye sukuŋet osomwok Yiyintet ani Paulo nyo mopusyontet nyepo Yesu Kristo kupo Lamek. 2Kwalim akwek kupoyit manta kule kikono ani Yiyintet yisyoni om poypoyenyi kupo toponiyet nyimwakwek. 3Kiŋoŋwo oŋnkuporwo ani Yiyintet yiytayatet nyenyi nye wuŋat. (Kwosil ani ŋalek ce tukusic ce nöme ŋalecato, 4Nteye kosuman akwek ŋalek ce kwosil mosonket wule oŋnketitoy ani ŋalek ce wuŋotin cepo Kristo.) 5Kipuryo kot cemwoci piko ŋalecutecu wuŋotin om pesyosyek co kitil. Ntene kukuporci Yiyintet yawut om Muyet Nyetilil kiyokikyi ce tililec oko workoyik. 6Ŋolyontet nye wuŋat kunyi kule, yomntoskey Yutayek oko Lamek oŋnkunyor tokol kupeyok cepo Yiyintet kupunte lokoywek ce toponec. Kwek cekto piko cepo koto akenke oŋnkunyor tokol kirotyet nyo kimwowu Yiyintet kupunte wule mite Yesu Kristo. 7Kicekono ani oyiku mutworintet nyepo Lokoywek ce toponec om kokotutyet nye pciyat nye kikono om swamenyi nye yiyisyi. 8Oyiku ani miniŋ koromun om wule mite piko tokol cepo Yiyintet, oŋnkurok kikono Yiyintet yisyoni pciyat nye osutyini Lamek lokoywek ce toponec cepo Mokoryontit nyepo Kristo nye mopoku. 9Oŋnkanet okoy kukäs piko tokol wule mokyiyta yisyet nyepo Yiyintet nye wuŋat. Yiyintet nye kitonye tukuk tokol kunye kirip kuwuny yiytayatet nyenyi okoy kutil kenyisyek co kitil. 10Kule sukuŋet konket om pesyosyecu malaykanik oko poytoyik cepo torot wule yunto ŋomnonet tokol nyepo Yiyintet. Ŋomnonet nyoto kunye yomntos pikap Yiyintet. 11Kikwiy Yiyintet kuyunyoto kuyu wule yunto yiytayet nyenyi nyepo keny, coto kuce kikoyitita kupunte Mokoryontenyo Yesu Kristo. 12Om koyomotet nye ceponte acek oko neto, oŋnkupunte koyenet nye ceponte om wule mite neto, kunye kicityacec cimuc cipe taytap Yiyintet. 13Kunyo kosomok ani kule monte komuyok toŋoŋutek cu otoŋonyi ani om kaynemwakwek. Ponto latik ŋalecu tokol om wule omite akwek. 14Kunyo om ŋolyontoni, kuye saŋet akotuŋe taytap Papa. 15Nyoto kunye Papa nye nyortoy kaynet nyepo manta piko tokol cepo koret torot oko cepo koret ŋony. 16Osome ani Yiyintet om Mokoryontit nyepo woyinto nyenyi, kukonok akwek onyoru swamet om mukuleywekwok orit kupunte Muyet nyenyi Nyetilil. 17Sukuŋet kutec Kristo konyi mukuleywekwok orit kupunte koyenet. Osome kule onyoru akwek tikityek ce kwilotin oŋnkonerye om cömisyet, 18saŋet akwek wanak oko pikap Yiyintet tokol onyoru swamet nye oŋnket kule para koromun, oŋnkukoy, oŋnkukoy kuwo parak, oŋnkukoy kuwo ŋony koromun cömisyet nyepo Kristo. 19Osome ani kule oŋnket akwek cömisyet nyenyi, nka kot mocimuce kot cinket topon, kuyunyoto oŋnkonyoru kupeyok ce yemok. 20Wule mite Yiyintet nye muce kwiy tukuk ce caŋ, kupëlis ce cesome nto ce cisoti acek, om swamet nye mite kwiyisyi om wule cemite acek. 21Kopurune woyinto wule mite Yiyintet, kupunte pikap Yiyintet oko Yesu Kristo, kuceke pinta ake okokoy okoy okokoy! Yunyoto.

will be added

X\