Ephesians 2

1Kikyopoku akwek ikye om leliswek oko miyotyonik ce kyoyiye. 2Kyorupe yoto soponto nye miyat nyepo koret. Kipoytok yoto muyet nyepo swametap oyinot nyepo parak, nyoto kunye poytoy mpo yawut piko ce meyweye Yiyintet. 3Kicekerkeyekey acek tokol oko cekto. Kicipuri kopurto nye kicerupe corokyinotet nyenyo nyepo tukuk cepo koret oko tukuk ce möce porwonikyacek. Kunyo kuyu wulo yunto sopontap koret, misyinec mpo acek kumutwec Yiyintet musankut. 4Ntene ponto Yiyintet poypoyet nyewo koromun nye mociyoyece nye cömec acek. 5Omnye nka kot kikicepoku acek om miyotyonik ce kiceponte, ntene kukonec Yiyintet soponto citutu oko Kristo. Kunyo poypoyetap Kristo kunye kisopok akwek. 6Kiciŋetec acek citutune met oko Kristo oŋnkuyomec oko neto sukuŋet cepoytoyisye oko neto om poytoyisyet nyepo torot. 7Kikwiy ŋolyontoni sukuŋet kupor kuwany kenyisyek ce caŋ cekwoni poypoyenyi om cömisyet nye kipor Yesu Kristo. 8Omnye kicisopok akwek om cömisyetap Yiyintet kupunte koyenet nye oponte. Kipuryo kot kukule om yisyet nyimwakwek nkit, ntene om kokotutyetap Yiyintet. 9Puryo kot kumite ŋolyo nye roke cesilekey omnye puryo kot ku yisyet nyimwakwek nkit. 10Kityacec Yiyintet acek sukuŋet kyiy yisyonutek ce toponec om koyomotet nye ceponte oko Yesu Kristo, kiyiytowec keny kuyunyoto kule kyiy. 11Möce asot akwek wule kyoyunte ikye, akwek Lamek co kicekurok kule, “Mowonotin’’ Kikurok akwek kuyunyoto piko co kurekey kule, “Ciku wonotin.’’ Ntene wonset kunye po porto nyepo saŋ pate. 12Kyoyiku yoto kweyotin om wule mite Kristo. Kyoyiku toyek ce kipuryo kot opoye pikap Yiyintet ce kweyanik. Kipuryo kot oponte akwek kirotyet nye kikyiy om kurtoyet nye kikurtoci Yiyintet pikyi. Kyomite yoto ominye koret nye kipuryo kot oponte kokenotet oŋnkipuryo mpo kot oponte Yiyintet. 13Ntene om koyomotet nye oponte yawut oko Kristo akwek piko co kyomitowune wule low, kuce kicekurok olekititu om korosyontetap metap Yesu Kristo. 14Yesu Kristo nkit kunye kisutwec acek kalyet, omnye kikoyomo Yutayek oko lamek kwek akenke. Kikoturpup neto totet nye kipciye picoto kwek punik; omnye kikwiyisye porto nyenyi. 15Kinum ntarastinek oko ŋalek alak tokol ce ponte ntarastinek cepo Yutayek. Kikwiy kuyunyitenyi kule sukuŋet kuyomokey Yutayek oko Lamek kwek aret akenke. Yoto kuye kisutu kalyet. 16Kimeci neto murtowontet kule sukuŋet kunum puniyontit. Murtowontet kunye kiyomo neto Yutayek oko lamek kwek porto akenke oŋnkuwec kukwa wule mite Yiyintet. 17Kunyo kico Kristo cokumwayta lokoywek ce toponec ce kipoyit piko tokol, Lamek co kimite wule low, oko Yutayek co kilekite wule mite neto. 18Acek Yutayek oko lamek cepunte tokol wule mite Kristo om koyomotet oko Muyet Nyetilil siceŋet cepunte taytap Yiyintet Papanyo. 19Kunyo, kimoyiku akwek Lamek toyek ce punonik alak, ntene oyiku pikap koret wanak oko pikap Yiyintet, coto kuce piko cepo kanyi. 20Oyiku akwek kereryantet akenke nyepo koto nye mite cetece, koto nye kicece kiyokik oko workoyik. Nto Yesu Kristo nkit kunye tolocta. 21Yesu kunye tiye kuyoŋnto koto tokol oŋnkukoci kutekakay okoy kwek koto nyetilil om Mokoryontet. 22Om koyomotet oko neto kunye omite akwek cetecok wanak oko piko alak tokol sukuŋet oyiku koto nye minye Yiyintet kupunte Muyet Nyetilil.

will be added

X\