Ephesians 1

1Cone parwani wule amite ani Paulo nye kiyokintetap Yesu Kristo om cömisyetap Yiyintet. Osilwok akwek pikap Yiyintet ce minye Efeso ce kikoyen soponwek cikwa Yesu Kristo. 2Kante onyoru poypoyet oko kalyet nye cone wule mite Papanyo Yiyintet oko Mokoryontet Yesu Kristo! 3Kante cikaste Yiyintet oŋnku kwanitap Mokoryontenyo Yesu Kristo! Omnye kikonec acek kupeyok om koyomet nye ceponte oko Kristo, omnye kikonec kokotutekyi tokol cepo wulin po torot. 4Kikweyec acek ciku pikyi om Kristo kutompo kot citany koret sukuŋet ciku piko ce tililec ce moponto lelis om tayta nyenyi. 5Kicäm Yiyintet keny kule masawecec acek cekwa wule mite neto ciku lekokyi cepunte wule mite Yesu Kristo. Kicäm om ŋerekwekyi oko yiytayatet nyenyi nkit. 6Kikwiy ŋolyontoni kule sukuŋet cinket acek kokotutekyi ce woyec ce kicekonec püc pate kupunte Werinyi cämenet. 7Kicityacec acek oŋnkyikalyec miyotyonikyo kupunte met nyepo Kristo. Ponto Yiyintet poypoyet nyewo koromun, 8kikonec acek kuyemec kuyunyoto om ŋomnonet nyenyi tokol oko kuyu wule nketitoy. 9Kikwiy Yiyintet kito nye kimöce kuporwec acek yiytayet nye wuŋat nye kiciyta keny kule mosawaŋnte aponune Kristo. 10Yiytayet nyepo Yiyintet nye mosukuwaŋnta ye kopunto pesyet nye topon; kunye mosukoyomo yoto tukuk tokol ce kicitany cepo torot oko ŋony oŋnkwek Kristo kantoyintet nyewo. 11Kikyiy tukuk tokol kuyu wule kikikwiyta oŋnkutilta Yiyintet. Kunyo kikweyec Yiyintet acek Yutayek ciku pikyi om koyomotet oko Kristo nye kikwiyta oŋnkutilta neto nkit kutompo kot citany koret. 12Kunyo misyini acek Yutayek co ciku piko cepo tayta ce cikeni Kristo, cikaste woyinto nyepo Yiyintet. 13Kunyo yunyoto mpo om wule omite akwek lamek co kyoyen Kristo yo kicemwowok lokoywek cepo manta, coto kuce lokoywek ce toponec ce kisutwok akwek kosopotet. Kikoci Yiyintet pelutyet nye poru kule oyiku akwek pikyi, pelutyet nyoto ku Muyet Nyetilil nye kikurto. 14Muyet Nyetilil kunye poru kukwile kule mocenyoru acek tukuk co kikurtoci Yiyintet pikyi, oŋnkuporwec kupoyit manta kule mosukutyakta piko ceci. Kunyo akente cikaste woyinto nyenyi. 15Kunyo kuceke ye kyalim koyenet nyimwoŋ om wule mite Yesu Kristo oko cömisyet nye ocöme akwek piko tokol cepo Yiyintet, 16tompo kot ayaste ani kuceke yoto nye mokostoy Yiyintet osomwok akwek ye osome sayutekwani. 17Osome Yiyintetap Mokoryontenyo Yesu Kristo, Papa nyepo woyinto, sukuŋet kukonok Muyet Nyetilil nyepo ŋomnonet nye muce kuŋoŋwok Yiyintet sukuŋet oŋnket neto. 18Osome kule kuyotokis kasoteywek cikwok okäs lakweyet oŋnkonket kokenotet nyo kicekurcok, oko mokoryontit nyewo koromun nye cikite kuce kupeyok ce kikurtoci neto pikyi. 19Oŋnkonket kule cemosi nyewo koromun swamet nyenyi nye mite kwiyisyi om wule cemite acek co ciyeni. Swamet nye ceponte kunye kerkey oko swamet nyewo 20nye kikwiyisye neto yo kiŋete kotutune met Kristo oŋnkukoci kopure yewunyi nyepo tay om torot. 21Poytoy Kristo om wuloto poytoyik tokol cepo torot, oko mokorenik ce ponto kamukeywek oko swamet. Kaynenyi kunye nyewo kupël kaynok tokol cepo koroni oko cepo koret nyin ake. 22Kikoci Yiyintet kupayta Kristo tukuk tokol, oŋnkukoci Yiyintet neto metit nyepo porto. 23Porto nyoto ku pikap Yiyintet. Neto kunye kocini kupeyok

will be added

X\