Colossians 3

1Kyotutune met akwek oko Kristo, kunyo misyini asat mukuleywek cikwok kukäs tukuk ce mite torot wule mite Kristo kukepure ŋecerenyi om yewutap tay nyepo Yiyintet. 2Okoci kukäs pate kasoteywek cikwok tukuk ce mite torot, ntene monte cekäs tukuk ce mite koret ŋony. 3Omnye kyopoku akwek, kunyo kiwuŋokis soponwek cikwok oko Kristo om wule mite Yiyintet. 4Kristo kunye soponto nyimwakwek nyepo manta, nteye coni kuporukey neto, mpo akwek mosoporukey oko neto oŋnkonyoru woyinto nyenyi! 5Kunyo misyini apakäc corokyinotet nyepo koret nyo mite kwiyisyi om wule omite akwek, kuyu sakwayanat, simnyo, corokyinot nye samis, oko sayet nye miyat (Omnye sayet nye miyat kunye kacesay kerkeyik) 6Omnye mosukukwontyi nerekwekap Yiyintet piko co puryo kot kuyweye cek neto om tukuk ceyucutecu. 7Kyomite akwek ikye pesyosyek alak opurtoy soponto nye yunyoto oko piko alak ce kyominye tokol. 8Kunyo oyiku akwek yawut Kristayek, misyini ayaste tukucu tokol, kuyu nerekwek, nyerunotet, kowotyontit, oko mwiynanet, oko ŋalek ce somis ce kwone kutuwak cikwok. 9Monte ciperperkey akwek kwakwek nkit om ŋal cepo mwiynan, omnye kyowirte akwek soponto nyo kipo keny kupetakey kopurto nye miyat. 10Kunyo kyolac soponto nyelel. Nyoto kunye cito nye mite cilelite okokoy sukuŋet oŋnket Yiyintet nyo kitonyok akwek akerkeyitu oko neto. 11Om soponto nyitenyi lel kunye puryo kot kumite pciyatet om wule mite Yutoyintet oko Kirikintet, nto cito nye wonat oko cito nye mawonat, nto cito nye lomin, nto piko ce Lamek alak tokol, nto ci nye mutworin oko cito nye momutworin, ntene Kristo kunye po ŋalek tokol, oŋnkumitowune kiy ake tokol wule mite Kristo. 12Kunyo ye kikweyak akwek Yiyintet oyiku pikyi ce cämanik, kumisyini opurte moyet oko mukuleyto nye kolyoyisyi, oko tolosyet oko poypoyet oko muytocinotet. 13Okolyoykey akwek nkit, nteye ponto ci ake tokol om akwek ŋolyo nye ŋunye om wule mite citake, kumisyini kumuyta oŋnkukalya nyin, kuyu wulo kikokalyak akwek Mokoryontet. 14Ntene ce pëlisyi om ŋalecu tokol ku cömisyet; Omnye cömisyet kunye kwile kuyomntos sukuŋet kutoponitu tukuk tokol kwek akenke. 15Kalyet nye konu Kristo kunye roke kwek ketintet om mukuleywekwok orit. Kikurok akwek Yiyintet sukuŋet onyoru kalyet nyitenyi soyiku pic ce kikwek porto akenke, kunyo okostoyisyi. 16Lokoywekap Kristo wanak oko mokoryontit tokol nye ponto kuce roke kopurune mukuleywekwok orit. Onetisye oŋnkorwokyikey akwek nkit om ŋomnonet tokol. Otumnci Yiyintet tumwonik cepo kakastayet oko tumwonik cepo ŋerekwek oko tumwonik cetililec, okostoy Yiyintet om mukuleywekwok orit. 17Kunyo tukuk tokol ce oyiye akwek, nto ŋalek ce oŋololi; kuce roke oyiye om kaynetap Mokoryontet Yesu ye omite akwek okostoy Yiyintet Papa kupunte wule mite Yesu. 18Misyini aywey akwek koruk sanikwok, omnye roke ayiy kuyunyoto kuyu kristayek. 19Misyini acäm moronik korukwok, monte cewuse. 20Akwek lekok, yisyemwakwek kuyu Kristayek aywey okokoy mpo kon oko mpo komet, omnye ŋerece ŋalek ceyucoto Yiyintet. 21Akwek poyik oko cepyosok, monte cewuse lekokwok, omnye sutyini ŋalek ceyucoto kumuyo pate. 22Akwek mutworik, aywey mokorenikwok cepo koret om ŋalek tokol, monte oyiyisyi pate ye mite cek kukosök sukuŋet kukastak. 23Ntene oyiye kiy ake tokol oyicini Mokoryontet kukowoŋnkyi om mukuleywekwok tokol ntene nye puryo kot oyicini piko. 24Misyini oŋnket kule mosukuyokwok akwek Mokoryontet, mosonyoru musyaret nye kikonorci neto pikyi, omnye Kristo kunye Mokoryontet nye oyicini akwek yisyet. 25Nto ci ake tokol nye yiye ŋalek ce miyotec, nka kot ku cito nye yune, mosicikoci nyoto musyaret nyepo tukuk ce miyotec ce kikwiye; omnye yoyece Yiyintet piko tokol.

will be added

X\