Colossians 2

1Kunyo akany omwowok wule kyotitirte ani oyiwok akwek yisyet oŋnkoyici piko ce mite Laotisea oko mpo piko alak tokol ce tompo kot kukäsa ani om konyekwa. 2Ayiye kuyunyoto sukuŋet kutosyikey kutitir mukuleywekwa ce toponec oŋnkuyomokey cekto kwek akenke om cömisyet, oŋnkunket mokoryontit tokol nye konu ŋomnonet nyepo ŋaleca, oŋnkunyor ŋalekap Yiyintet ce woŋotin, nyoto ku Kristo. 3Kristo kunye Funkuwet nye yote wule kiwuŋekey Mokoryontit tokol nyepo ŋomnonet oko kokenotetap Yiyintet. 4Komwowok ani akwek ŋalecu sukuŋet mente kot tokuperperak citake om ŋalek alak cepo tintenot nyepo mwiynan nka kot ku ŋalek ce toponec ceyune. 5Omnye nka kot mopontekey ani oko akwek om porto ntene cepontekey oko akwek om kasoteywek. Kunyo ayiku ŋerekat koromun akäs kopurto nye kwilat oko koyenet nye oponte akwek om wule mite Kristo. 6Kuyu wulo kyocäm akwek Yesu Kristo kwek Mokoryontet, kunyo misyini oyomekey oko neto. 7Opur kuyu pic ce kwilotin tikityet cekwok om wule mite neto; atec kuneryo soponwek cikwok om wule mite neto, oŋnkokwilokisye okokoy om koyenet nyimwoŋ kuyu wule kicinetitak, oŋnkotosyikey akaste okokoy Yiyintet nyewo. 8Misyini oripkey akäs kule mente kot kumasak citake om konetisyet nyepo ŋalek cepo mwiynan ce moponto latik ce kwone konetisyet nye kirup piko kuceke keny, oko ŋomnonetap oyik cepo koret, ce puryo kot kukwone wule mite Kristo nkit. 9Omnye mitowune soponto tokol nyepo Yiyintet wule mite Kristo kuyu cito. 10Kunyo kicekonok akwek soponto tokol, oŋnkyiyomok oyiku akenke oko neto. Neto kunye nyewo nye poytoy poytoyik oko kamukeywek alak tokol. 11Yo kyoyomntosikey akwek oko neto kuye yoto ye kicewonok akwek. Ntene puryo kot ku wonset nyo wone piko porto, ntene wonset nyepo Kristo nkit, nyoto kunye sorunet nye kicityacec cekwane swamet nyepo porto nyi ponto miyotyet. 12Omnye yo kicepotisonok akwek kuye kicemuyok yoto oko Kristo. Nto patisanet yec kuye kyotutune met oko Kristo kupunte koyenet nyimwoŋ om swamet nyepo Yiyintet nye yiyisyi nye kiŋet Yesu Kristo kotutune met. 13Kikipok ikye soponwek cikwok om wule mite Yiyintet om miyotyonik ce kyoponte, oko yec omnye kyoyiku akwek Lamek ce kyomite saŋ om ntarastinek. Kunyo kikwerwok akwek yawut Yiyintet kwonyoru soponto kuyu Kristo! Kikukalyec Yiyintet acek miyotyonikyo tokol. 14Kupël neto ntarastinek, oŋnkunum wule kicesil pesenutek cicacek ce miyotec, oŋnkukwertoci murtowontet kupok. 15Nteye kimite Yesu Murtowontet, kutyacekey nkit kucone wule mite poytoyisyet nyepo oyik oko kamukeywek ce kinöme neto. Kipël neto oyik oŋnkunam kuyu sira oŋnkuwesetot kupartat kukäs piko tokol. 16Kunyo puryo kot kurok kwiwok akwek citake ntarastinek ce nöme omik ce moyam, nto yisyet, nto ce nöme pesyosyek ce tililec, nto ce nöme sakwet nyepo arawet nye kolel, nto ce nöme pesyetap Sapat. 17Ŋaleca tokol kuce rurwet nyepo ŋalek ce mosukukwa, nto ŋalek cepo manta ku Kristo. 18Monte kot acäm kot kumutwok musanku citake tokol nye sutekey kule oyiku nyewo opëlisye, omnye köse neto ŋoŋutok ce kweyotin. Kusyem kukerekey ŋalek cepo mwiynan oko soyutek cepo malaykanik. Kwontos cicoto pöc pate om kasoteywek cepo koret. 19Kikwasta neto nye kimo kurupe Kristo nye metit nye poytoy oŋnkupoye porto tokol oŋnkotuyo om wule kicituye om melilok oŋnkuner kuyu wulo moktoy Yiyintet kule kuner. 20Kyopoku akwek oko Kristo, kicityakenak poytoyisyet nyepo oyik cepo koret! Kunyo omne sopur akwek kuyunye opoye koroni? Omne sacäm akwek cirwokwok kule, 21“Monte kot anäm kiyi? Monte kot acemcem kiyin? Monte kot otiny tukuk alak?’’ 22Puryo kot kuponto tukuco latik ye kokyiyisye. Ntarastinecoto kuce kikwiye oŋnkunet cito. 23Porukey manta kuyunye ponto ŋaleca ŋomnon om ŋalek ceponto ce ceripekey oko muyotet nyepo kopreperisyet nyepo portap cito. Ntene oŋnkupuryo kot kuponto latik cepo manta ce muce kot kurip tukuk ce möce porto.

will be added

X\