Colossians 1

1Cone parwani wule amite ani Paulo nye kikwey Yiyintet kwek kiyokintetap Yesu Kristo. Oŋnkucone wule mite yeyanyo Timosewo. 2Cesilyini pikap Yiyintet mpo yeya ce cikenekeny om Kristo cepo koretap Kolosaya. Kante kukonok Yiyintet Papanyo poypoyet oko kalyet. 3Cikostoy acek okokoy Yiyintet kwanitap Mokoryontenyo Yesu Kristo ye ce mite cesomwok. 4Omnye kicelim koyenet nye oponte akwek om wule mite Yesu oko cömisyet nye ocöme piko tokol cepo Yiyintet. 5Kwone ŋalecutecu tukway kokenotet nyo kicekonorwok akwek om torot. Kokonotet nyoto kunye po ŋalek cepo manta cepo lokoywek ce toponec co kyolim akwek kunyo. 6Mite lokoywecoto toponec kukonu kupeyok oŋnkutosyinikey om koret tokol kuyu wulo yunto om wule mite akwek, kuceke pesyet nyepo tay nyo kyolime poypoyetap Yiyintet oŋnkonket ŋalecato kuyu ŋalek cepo manta. 7Mutworintet nye kerkey oko acek Epafra oŋnku cämanenyacek kunye kinetak akwek ŋaleca. Neto kunye cito nye kikoyen nye yicin yisyet Kristo om kaynenyacek. 8Kico neto cokumwowec acek cömisyet nye oponte akwek nyo kikonok Muyet Nyetilil. 9Kunyo, kuceke pesyet nye kicelim acek ŋaleca, munakyaste mpo pesyo akenke nye mocesomwok. Cesome acek kule roke oŋnket akwek topon cömisyet nyepo Yiyintet oŋnkonyoru ŋomnonet om mukuleywekwok orit saŋet oŋnket ŋalek tokol ce konu Muyet Nyetilil. 10Cesome kule otosyikey akwek opurte okokoy soponto nye ponto latik om wule mite Yiyintet, oŋereci akwek neto koromun, saŋet ayiy yisyonutek wok tokol cepo toponiyet, oŋnkotosyikey anetkey ŋalek ce caŋ cepo Yiyintet. 11Cesome kule roko kukwilak akwek Yiyintet om woyinto nyepo swamenyi nyewo, sukuŋet amuc otitir om swama oŋnkomuytoci oŋnkoŋerec om kiy ake tokol nye kacontyok. 12Oŋnkokaste Papa Yiyintet nye kikonok ayem onyoru otepto nyimwoŋ om koret nyepo lakweyinto om wule mite pikyi cetililec. 13Omnye neto kunye kisorunenec acek wule mite poytoyisyet nyepo menonet, oŋnkukwerwec cekwa okoy wule mite poytoyisyet nyepo Werinyi Camanet. 14Kunyo Werit nye kikalyec acek miyotyonikyo oŋnkutyaktec. 15Kristo kunye tonto nye toku nye kerkey oko Yiyintet nyo puryo kot kutoku. Neto kunye Werit poretyet nyewo nye poytoy tukuk tokol ce kicitany om koret tokol. 16Om wule mite neto kunye kitany Yiyintet tukuk tokol ce mite koret torot oko koret ŋony, cetoku oko cemotoku wanak oko swamet nyepo oyik oko poytoyik oko kamukeywek. Kitany Yiyintet koret tokol kupunte wule mite neto, oŋnkwek nyenyi. 17Kimite neto om towunot kutompo kot citany kiy ake tokol, neto nye nöme kuyomo kwek kiy akenke koret tokol. 18Neto metitap porto, nto porto nyoto ku pikap Yiyintet ce kikoyomekey. Neto kunye lukune soponto nyepo porto, sukuŋet kopoyit tay om tukuk tokol. 19Yiyintet nkit kunye kicäm oŋnkukwey kule mokunyor Werit tonto nyepo Yiyintet. 20Kunyo kicäm Yiyintet kupunte wule mite Werit, sukuŋet kuket kuwec koret kuco wule mite neto. Kisut Yiyintet kalyet om metap Werinyi nyo kimeci murtowontet, kunyo kiwec tukuk tokol kukwa yec wule mite neto. Tukucoto tokol kuce mite koret tokol torot oko ŋony. 21Kyomitowune akwek ikye wule low om wule mite Yiyintet, kunyo kikyawecekey akwek oyiku punik cepo Yiyintet om tukuk cemiyotec ce kyayiy oŋnkasot. 22Kunyo kikweyak akwek yawut Yiyintet aketitekey wule mite neto kupunte metap porto nyepo Werinyi, nye kiceyi, oŋnkume sukuŋet kuwecak akwek otililitu oŋnkotoponitu nye komoponte miyotyo mpo kisic. 23Kunyo misyini otosyikey om koyenet nye kwilat nyepo manta nyo kyonyoru, monte kyastekey ciluclucak kot akwane kokenotet nyo kyonyoru nyo kyolim akwek lokoywek ce toponec. Lokoywecutecu toponec kuce kicemwaytate koret tokol kumukul. Kunyo ani Paulo kunye kicekweya oyiku mutworintet nyepo ŋalecu. 24Kunyo oyiku ani yawut ŋerekat om toŋoŋutekwani. Omnye om toŋuŋutek cikwani cepo porto nyimwani kuye okolyoy awaŋnte toŋoŋutek cepo Kristo ce kiŋet kupo porto nyenyi, coto ku luketap Yiyintet. 25Kunyo kikweya Yiyintet oyiku mutworintet nyepo pikap Yiyintet. Kikono ayiy yisyoni kupo toponiyet nyimwakwek. Yisyet nyoto kunye omwoytoti topon lokoywekyi. 26Ŋalecutecu kuce kikiwuŋe Yiyintet piko cepo pinutek tokol kuwany kenyisyek ce caŋ ntene kuŋoŋ om letut kuporci pikyi. 27Omnye kikwiy Yiyintet kuyunyitenyi kule oporci pikyi ŋalekyi ce wuŋotin, ŋalecutecu kuce po mokoryonti oko woyinto ce mokyini Yiyintet piko tokol, nto ŋalecoto kucu kule mitowune Kristo wule omite akwek orit, nye poru kule mosonyoru akwek woyintotap Yiyintet. 28Kunyo cemwocini acek piko tokol ŋalek cepo Kristo. Cisowu oŋnkyinet ci ake tokol om ŋomnonet ake tokol nye mukoktos, sukuŋet cekweru ci ake tokol kuco wule mite Yiyintet. Kukokwek cito nye kikil nye ponto koyomotet oko Kristo. 29Otitiri ani aŋnkataŋany ye sukwiyokis ŋalecutecu, oyiyisye swamet nyewo nye konu Kristo nye mite kwiyisyi om wule amite ani.

will be added

X\