Acts 9

1Ntene om pesyosyecoto, kutosyikey Saulo kutaŋany konomikap Mokoryontet. Yoto kuwo wule mite Tisintet nyewo, 2oŋnkusom parwet nye muce wokuporci kantoyikap korikapkok cepo Tamasko, sukuŋet ye kopunto wuloto oŋnkunyor ci tokol nye rupe ŋalekap Mokoryontet komuc neto kunäm oŋnkurat tokol moronik oko koruk oŋnkukwer cek kupa Yerusalem. 3Nteye kimite Saulo panta kuweti Tamasko kukarikta moŋet, kucone lakweyet parak lakwar nye kikweny komut neto. 4Yoto kuputyi ŋony, oŋnkulim kutit nye kikure neto kule, “Saulo, Saulo! Omne setaŋany ani nyi?’’ 5Kumwoy Saulo kule, “Mokoryontet, nyi ŋo?’’ Kumwoy kutit nye kokursyi kule, “Ani nyo Yesu nyo mite nyi toŋonyi. 6Ntene ŋete ŋony oŋnkinomen iwo okoy moŋet wule mosicemwowuneniŋ nyi kito nye roke yiy.’’ 7Ntene kikikuyoŋ yoto piko ce kipetoykey neto nye puryo kot kuŋolole, omnye kilim cekto kutit nye kikursyi ntene amakäs ci. 8Kuŋete Saulo ŋony oŋnkuŋany konyekyi, ntopere akaste komokuköstoy. Yoto cenäm neto yewut oŋnkyiretot okoy kupunto Tamasko. 9Kuwany Saulo pesyosyek somok nye puryo kot kuköstoy oŋnkupuryo kot kwomisyi omit nto mpo kuyesyo. 10Kimite Tamasko konomintet ake nye cekure Ananiya, yoto kuŋonkyi kuporci Mokoryontet neto kumwoci kule, “Ananiya!’’ Kuwec Ananiya kumwoy kule, “Mokoryontet, amite ani yu.’’ 11Kumwoci Mokoryontet neto kule, “Ŋet oŋnkinomen iwo okoy aretap moŋet nyo rotat okoy punte kotap Yuta oŋnkitepu citake nyepo Taruso nye cekure Saulo nye mite kusome. 12Kunyo koceŋoŋnkyi neto kukäs cito nye cekure Ananiya kuconi kumiŋu ko oŋnkukemer yewuniyekyi sukuŋet kukästa yec konyekyi.’’ 13Ntene kuwec Ananiya kumwoy kule, “Mokoryontet, kumwowo ani piko ce caŋ ŋalek ce miyotec ce nöme cicitenyi ce kikwici pikuk om Yerusalem. 14Kunyo kuco Tamasko kuponto kamukeywek cepo Tisintet nyewo sukuŋet kunäm piko tokol ce rupe kusoye kayneŋuŋ.’’ 15Kumwoci Mokoryontet Ananiya kule, “Iwo nyi, omnye kwakwey ani neto sukuŋet kwiwo, yisyet kuparta ani om wule mite Lamek oko kinkonikwa oko pikap Israel. 16Omnye ani nkit nye mosoporci neto ŋalek tokol ce mosukutaŋany om kaynemwani.’’ 17Yoto kuwo Ananiya okoy koyoto oŋnkukemer yewuniyekyi metitap Saulo oŋnkumwoy kule, “Yeya Saulo, keyokwani Mokoryontet Yesu nkit, nyo kweporunkey nyi nkit om aran yo kwemite coni wuli, kule sukuŋet käste nyi yec oŋnkinyoru Muyet Nyetilil.’’ 18Om yoto pakenke kusuwune konyekap Saulo tukun ce yu taper, oŋnkuŋoŋokis konyekyi kukästa yec. Kuŋet kuyo oŋnkyepatisan, 19oŋnkwomis omik oŋnkunyor swamet. Kopur Saulo kuwany pesyos tukusic kupontokey wanak oko konomik om Tamasko. 20Yoto pakenke kuwo Saulo kowut korikapkok oŋnkumwayta ŋalekap Yesu kutor kumwoy kule, “Yesu kunye Weritap Yiyintet.’’ 21Kokite piko tokol ce kilim ŋalekyi, oŋnkutep kumwoy kule, “Puryo kot ku cicitenyi nyo syeme kule apakäc omis piko co cöme kaynani om Yerusalem? Kunyo kuco wuli kule canäm, picoto oŋnkokwer kupa wule mite tisintet nyewo?’’ 22Ntene kutosyikey Saulo kukimit oŋnkutintentyin oko Yutayek ce kiminye Tamasko okoy kupël, kumwoci neto cekto om swamet kule, Yesu kunye Ŋapanet nyepo manta. 23Nteyu kowo kutil pesyosyek ce caŋ, koruruckey Yutayek kwiy rurumut kule cepakäc Saulo. 24Ntene kusow Saulo konket kito nye kimöce cek kule ceyiy. Kuripso cekto kurkotikap moŋet komoy oko pet kule cepakäc neto. 25Ntene kunäm konomikyi Saulo om kwomowut ake oŋnkukerta cikaput nyewo oŋnkukoyito kupunte pastit nyepo totetap moŋet kuwo saŋ. 26Ntowo kuwo Saulo okoy Yerusalem, yoto kusyem kule oyomekey wanak oko luketap konomik om woloto, ntene kuywey cut tokol neto, omnye kipuryo kot kuyen kule kikwek Saulo konomintet. 27Yoto kukalya Parnapa kukwer neto wule mite kiyokik, oŋnkurorci kuporci cekto wule kikästa Saulo Mokoryontet om aran, oko kule kikiŋololyi Mokoryontet neto. Kumwoci Parnapa cek yec ŋalek ce kimwayta Saulo om nyikanatet om kaynetap Yesu ye kimite Tamasko. 28Kopur Saulo wanak oko cekto oŋnkuwesetote Yerusalem tokol kumwoytoti om swamet kaynetap Mokoryontet Yesu, 29oŋnkutintentyin oko Yutayek co ŋolole ŋelyeptap Kirikik. Kusyem co kule cepakäc neto. 30Ntowo kulim mpo yeya piko co kikoyen ŋalecato, kukwer cek Saulo kurekto okoy kupunto Kaysariya oŋnkuyomis kuwecikey Taruso. 31Yoto kunyor kalyet pikap Yiyintet ce kimite koretap Yuteya tokol oko Samariya. Kutekakay kuner oŋnkutosyikey kucaŋit piko om kakalyayetap Muyet Nyetilil, oŋnkunäm cekto kopurto nye yweye Mokoryontet. 32Kuwesetote Petero koret wulyo tokol om wuloto. Nto mite pesyet ake kuwo kurutoci pikap Yiyintet ce kiminye Lita. 33Wokunyor om wuloto citake nye cekure Ayineya, nye kikiru kwiriri kuwany kenyisyek sisit, omnye kipok kerenkok. 34Yoto kumwoci Petero neto kule, “Ayineya, sopiŋ nyi Yesu Kristo ŋet yony oŋnkisat kwiririŋuŋ.’’ Yoto kuŋete Ayineya ŋony lakwar. 35Kukäs piko tokol ce kiminye Lita oko Syaron cicoto kicisop, yoto kuwekyikey cekto kucäm Mokoryontet. 36Kimite Yopa korket ake nye konomintet nye kicekure Tapisa (kaynenyi om ŋelyeptap Kirikik ku Torkas, nye poru kule, Cepkecey). Kikwiyisyi korokonoto yisyonutek ce toponec kukolyoy pononik okokoy. 37Kumnyan pesyosyecoto okoy kume. Ciwun pornyi oŋnkyikoci kopur koto nye mite koto parak. 38Kipuryo kot ku low kuceke Yopa okoy kupunto Lita. Nteye kotolime konomik ce kimite Yopa kule mite Petero Lita, kuyokto cekto piko oyeny kupa wokumwoci Petero kule, “Co sorukey lakwar okoy punu wuli cemite acek.’’ 39Yoto kuŋet Petero oŋnkunomen wanak oko picoto kiciyoku. Ntowo kupunto, cekwer neto kuwo koto nye kimite koto parak. Korurukyikey wuloto musukik tokol komut Petero kukirtos sukuporcini cekto neto sirok ce kinope Torkas ye kisope. 40Yoto kukwet Petero piko tokol kukwane koyoto, oŋnkukutuny kusom, oŋnkuwekyikey musto kumwoci kule, “Tapisa, ŋet yony.’’ Kuŋany Tapisa konyekyi, nteye kotoköse neto Petero kuŋet kopur ŋony. 41Yoto kukalya Petero neto kunäm kuŋet kuyo, oŋnkukur piko co kikoyen oko musukik oŋnkuporci neto cek Torkas nye kosop. 42Celime ŋalecato koretap Yopa tokol kumukul, yoto kuyen piko ce caŋ Mokoryontet. 43Kopur Petero Yopa kuwany pesyosyek ce caŋ kopurune kaytap Simon nye kikute syerok.

will be added

X\