Acts 8

1Kucämnta mpeneto Saulo wule kameta Stefano. Kuceke pesyonoto kucec kutaŋany toŋoŋutek ce caŋ koromun luket nyepo pikap Yiyintet om Yerusalem. Kumwey piko tokol co kikoyen kuseretyi koret tokol nyepo Yuteya oko Samariya okoy kuŋet pate kiyokik. 2Kumuyis piko ce kikoyen kumuy Stefano ce kirire neto lokik ce caŋ koromun. 3Ntene yoto kusyem Saulo koromun kule awurte kupotyo pikap Yiyintet, kuwo kowut korik tokol oŋnkocutune orit piko co kikoyen moronik oko koruk oŋnkukerta tokol mopusi. 4Yoto kupa piko tokol co kikoyen kuseretyi koret tokol kumwoytoti lokoywek ce toponec. 5Kunomen Filipo kurekto okoy kupunto moŋetap Samariya oŋnkuwokumwoci pikap wuloto lokoywek ce toponec cepo Ŋapanet. 6Kulim topon piko ce caŋ ŋalek ce kimwowu Filipo, kilum cekto ŋalekyi oŋnkukäs tukuk cepo kakitat ce kikwiye neto wuloto. 7Kuŋetyo kupete oyik ce miyotec piko ce caŋ oŋnkupa kupolot polotet nyewo. Cisop mpo piko ce caŋ, piko ce kipok kuwusyo kerenkok oko ce kikikomwolis. 8Yoto kuŋerec koromun piko tokol cepo moŋetap Samariya. 9Kimite moŋonoto citake nye cekure Simon, nye kikwiye sokeyek ce cikite om pesyosyek alak okoy kukite pikap Samariya tokol koromun. Kisutekey kule oyiku ci nyewo nye tokunot koromun. 10Kiyweye piko tokol neto kuceke lekwa okoy piko cewoyec, kumwowu cekto kule, “Cici kunye swametap Yiyintet nye cekure. ‘Swamet nyewo.’ ’’ 11Kiyweye piko neto omnye kikikwiy sokeyek ce cikite kuwany pesyosyek ce caŋ. 12Ntene yu kuwo kuyen piko lokoywek ce toponec cepo poytoyisyetap Yiyintet oko kaynetap Yesu Kristo ce kimwowu Filipo, yoto cepatisan piko moronik oko koruk. 13Kuyen mpene Simon, nto om letut yu kowo cepatisan Simon kopurcin neto oko Filipo. Kokite koromun yu kowo kukäs pelutok cewoyec oko tukuk cepo kakitat ce kiciye. 14Yoto kulim kiyokik ce kimite Yerusalem kule kulim oŋnkucäm pikap Samariya ŋolyontetap Yiyintet. Kuyokto cekto Petero oko Yowana kupa wule mite picoto. 15Ntowo kupunto Petero oko Yowana wuloto, kusomnci cek piko co kikoyen kule sukuŋet kunyor Muyet Nyetilil. 16Omnye kitompo kot kucontyi Muyet Nyetilil mpo akenke om picoto. Ntene kikicepatisan cekto tokol pate om kaynetap Mokoryontet Yesu. 17Yoto kukemer Petero oko Yowana yewuniyekwa metewokap picoto, kunyor tokol Muyet Nyetilil. 18Ntowo kukäs Simon kule kanyor picoto Muyet Nyetilil omnye kekemer kiyokik yewuniyekwa metewokap picoto, yoto kunam pesanik oŋnkukoci Petero oko Yowana, 19kumwoci kule, “Okono mpo ani swamani sukuŋet kunyor Muyet Nyetilil piko tokol ce kakemer ani yewuniyekyu.’’ 20Ntene kuwekyi Petero kumwoci kule, “Wot pot oko pesanikuk, omnye soti nyi kule omuci ayale pesanik kokotutyetap Yiyintet! 21Puryo kot kunyeŋuŋ yisyoni, omnye puryo kot kurotat mukuleyŋuŋ om konyekap Yiyintet. 22Kunyo renynkey oŋnkicone areŋuŋ nyi miyat, oŋnkisom Mokoryontet sukuŋet kukalyiŋ nyi kasoteywekuk cu yucu. 23Omnye kakäs ani kule ponte nyi corokyinotet nyewo koromun, oŋnkiyiku mopusyontetap miyotyet.’’ 24Kimwoci Simon nyonkey Petero oko Yowana kule, “Osomok ani akwek kule osomwo Mokoryontet sukuŋet mente kot kukwontyo tukucu komwowu akwek kule muce kukwontyo ani.’’ 25Nto om letut yu kowo kumwayta cekto lokoywekap Mokoryontet, kunomen Petero oko Yowana kuweckey kupa Yerusalem. Nteye kimite kupeti om aran kumwaytat lokoywek ce toponec om soŋwek ce caŋ cepo Samariyek. 26Kuŋololyi malayketap Mokoryontet kumwoci Filipo kule, “Ŋet yiytekey, oŋnkinomen tokyikey tö okoy punte aret kacatanet nyo rekte Yerusalem okoy kupunto Kasa.’’ (Aretap surukwenet nyoto.) 27Yoto kunomen Filipo kuwo, okoy wokunyor citake nyepo Esiopiya. Cicoto kunye cito nyewo nye kikonorintetap Kantake nto korko nye Kinko nyepo Esiopiya. Kimite cicoto yoto kucone Yerusalem wule kikiwo toyek wokusay Yiyintet. 28Kunyo kimite poninekyi kuketitoykey Esiopiya kuwete karinyi oŋnkusumonoti kitaput nye kisile workoyontet Isaya. 29Kumwoci Muyet Nyetilil Filipo kule, “Lapat ric apetekey karina.’’ 30Yoto kulapat Filipo okoy ye kimite karinata, kulim neto cicoto kusumone om kutit nyewo ŋalekap workoyontet Isaya. Yoto kutepe Filipo cicoto kule, “Nketi nyi ŋalecutecu sumoni?’’ 31Kuwekyi cicoto kumwoci kule, “Omuci ani oŋnket kulene ye puryo ci nye keporwo?’’ Kumwoci cicoto Filipo kulany karit parak oŋnkupetakey tukway. 32Ŋalekap silutekap Yiyintet ce kisumone cicoto kucu kule: “Kicekwer neto wocetil kuyu keciryet, Kikerkey neto lekwap kecir nye mute cito kororik ntene oŋnkupuryo kot kutwowu, Kunyo puryo kot kuŋany kutinyi. 33Kicewec neto kuminiŋit oŋnkyeyete ŋalek cepo musankut nyepo manta. Puryo ci nye muce kuror kumwoy pikap arenyi, Omnye kicesut soponnyi kuwete koret.’’ 34Kumwoci cicoto Filipo kule, “Mwowo ani nyi pa, ŋolole workoyontet ci ŋo om ŋalecu? Kiŋololekey neto nkit; nto kiŋolole citake?’’ 35Yoto kucec Filipo kumwoci cicoto lokoywek ce toponec cepo Yesu kuceke ŋalecutecu kicesil om kitaputap silutekap Yiyintet. 36Nteye kimite cekto tukway kupeti om aran kukwa okoy kupun ye kimite peko. Kumwoy cicoto kule, “Käs okyu peko, kiy ne nye kerektoy mocepatisana ani?’’ 37Kumwoci Filipo cicoto kule. “Cimuce cepatisaniŋ nyi ye keyen om mukuleyŋuŋ tokol.’’ Kuwec cicoto kumwoy kule, “Koyen acäm ani kule Yesu Kristo kunye Weritap Yiyintet.’’ 38Kuyoŋnto cicoto karit, oŋnkupa tukway oko Filipo kolumntakey peko orit, yoto kupatisan Filipo cicoto. 39Nteyu kowo koluŋune peko, kukwer Muyetap Mokoryontet Filipo kuwecikey arenyi. Kipuryo kot tokukäs cicoto Filipo yec om yoto. Ntene kutosyikey cicoto kuwo poninekyi kuŋerekoti ŋerekwek ce caŋ. 40Wokukose Filipo pate mite wule cekure Asyotot. Yoto kuwo Filipo kupunte moŋosyek tokol kumwoytoti lokoywek ce toponec okoy kapunto Kaysariya.

will be added

X\