Acts 7

1Kutepe Tisintet nyewo Stefano kule, “Po so ŋalecutecu manta?’’ 2Kuwec Stefano kumwoy kule, “Mpo yeya, oko mpo Papa, olimwo ani pa akwek! Kiporcikey Yiyintet nye ponto woyinto kukonyo Apram ye kimite kuminye koretap Mesopotamia, kutompo kot kuwu wokuminy koretap Aran, 3kimwoci kule, ‘Ŋet pakakte komwoŋ oko koreŋuŋ oŋnkiwuyi iwo koret nye mosoporuŋ ani nyi.’ 4Yoto kuwuye Apram koretap Kalitayek oŋnkuwo wokuminy Aran. Nto om letut yu kowo kume kwan, kuntoci Yiyintet Apram kukwer kucone wuloto okoy kupun koronitenyi omite akwek yawut. 5Ntene kipuryo kot kukoci Yiyintet Apram kereryantetap maswetap koroni nka mpo kisic pate kwek nyenyi, ntene kukurtoci pate kumwoci kule mosokoniŋ kwek nyeŋuŋ oko kesenisyekuk, nka kot kipuryo kot kuponto Apram lekwa om pesyosyecoto. 6Kimwoci Yiyintet neto kule, ‘Mosukupa kesenisyekuk wokumiŋis koretap piko alak wule mosokwek cekto mutwor oŋnkyitaŋany koromun om wuloto kuwany kenyisyek pokolwokik amwan.’ 7Kumwoy Yiyintet kule, ‘Mosomutyi musankut ataŋany picoto mosukutaŋany cekto, nto om letut okweru kukwane koronoto kukwa kwokusaya ani om koronitenyi.’ 8Yoto kukoci Yiyintet Apram sakwetap wonset kwek pelutyetap kirotyet. Kuwon Apram werinyi Isaka kuponto pesyosyek sisit kuceke koceyi. Kuwon Isaka werinyi Yakopo nto om letut kurupkey kuyunyoto kuwon Yakopo mpo kukonyo co kitaman ok oyeny. 9“Kucorokyi mpo kukonyo Yosep oŋnkwalya neto kuwo Misiri wokwek mutworin, ntene kurip Yiyintet neto om wuloto, 10oŋnkukalya kupunte toŋoŋutek tokol ce kinyor. Nteye kimite Yosep kaytap Farawo Kinko nyepo Misiri, kukoci Yiyintet neto kopurto nye topon oko ŋomnonet okoy kukwey Farawo neto kwek poytoyintet nye poytoy pikap koronoto wanak oko pikap kaytap Kinko nyepo Misiri. 11Yoto kuco rupet nye kisut toŋoŋutek ce caŋ om koretap Misiri tokol oko koretap Kanan tokol, okoy kupotyi mpo kukonyo omik ce mokwam. 12Ntene kulim Yakopo kule mite omik Misiri, sukuŋet yoto mpo kukonyo kupa wuloto om panta nye kipo tay. 13Nto om Panta nyepo oyeny kuporcikey Yosep mpo yeyanyi okoy letut kunket Farawo pikap Yosep. 14Yoto kuyokto Yosep ŋalek kupa wule mite kwan Yakopo kumwoci kule kuwu neto wanak oko pikap kanyi tokol kupa Misiri. Kipuntoy coŋintap picoto tokol tomonwokik tisap ok mut. 15Yoto kuwu Yakopo kuwo Misiri wule kiwo kumeci neto oko mpo kukonyo tokol. 16Cesut muswek cikwa okoy kupun Sekem wule kikwocemuci mwenet nyo kyole Apram pesanik kwale werikap Amor. 17“Ntowo kupunto pesyet kuyitita Yiyintet kirotyet nyo kikurtoci Apram, yoto kutosyikey kupit kucaŋit pikyo om Misiri. 18Om letut kupoytoyis Kinko ake nye kipuryo kot konket nyoto Yosep. 19Kuŋet Kinko nyoto kumutyi ŋomnon kuŋom pikyacek kutaŋany mpo kukonyo kukerci koŋ kunumune lekokwa ce timinkec kumwoci kule kiwirci saŋ sukuŋet kupok. 20Om pesyosyecoto kuye kiceyiye Moses, kwek lekwa nye topon koromun nye kiŋerece Yiyintet. Ntene cepaye kaytap kwan kuwany orok somok, 21nto cinumu cewirta. Yoto kunyor ceptap Farawo, kunäm nyo kwek werinyi. 22Cinet neto ŋomnonet tokol nyepo pikap Misiri, yoto kutok neto kwek ci nyewo koromun om ŋalek ce kiŋolole oko yisyonutek ce kikwiye. 23“Nteye kiponto Moses kenyisyek artam, kusot kule mawo orutoci mpo yeyanyi pikap Israel. 24Wokunyor cito akenke nyepo Misiri nye kimite kupire kutoŋonye cito nyepo Israel, kuwo yoto wokuyetyeci citap Israel nyo kicitoŋonye. Kupir Moses citap Misiri kupakäc kume. 25Kisote Moses kule toskoy mokusow pikyi pikap Israel kule mite Yiyintet kuweti kule wosoru cekto kupunte wule mite Moses. Ntene kipuryo kot kusow cut. 26Ntowo kuyekune om pesyet nyepo oyeny, kunyor yec Moses pikap Israel oyeny ce kiportos kwicek nkit. Yoto kusyem kule aket kumwoci kule, ‘Merekyo, alim pa, nteyu otupce akwek! Omne soporye akwek nkit?’ 27Ntene kuwunukto cito nyo kitoŋonye nyin Moses kuwo tapan oŋnkutepe kule, ‘Ŋo nye kokoniŋ nyi kule paytec nto ketec acek? 28Möce kule apakäc ani kuyu wulo kwepoköci citap Misiri?’ 29Ntowo kulim Moses ŋalecato, kumwey kuwete Misiri wokuminy koretap Mitian wule kiwo kuyici werikyi oyeny. 30“Yoto ntowo kupok kenyisyek artamu, kucontyi malayket neto oŋnkuporcikey om rukututwet nye kiloye om koretap kitela ye lekite tulwetap Sinai. 31Kukite Moses kito nye kikäs oŋnkuwo kunokyi wule wakäs topon rukututwet nyi loye, yoto kulim kursetap Mokoryontet, 32nye kimwoy kule, ‘Ani nyo Yiyintetap mpo kukoŋuŋ, Yiyintetap Apram, Yiyintetap Isaka, Yiyintetap Yakopo.’ Yoto kumuy Moses kupotan nye kipuryo kot tokomuc kukäs. 33Kumwoci Mokoryontet neto kule, ‘Numune kweyonik kerenkokuk omnye tilil koret yo koyeŋe nyi! 34Kwakäs manta toŋoŋutek ce ponto pikwani om Misiri, kwalim rirekwa, kunyo kaco oreku cesoru osop cekto, amöce kule oyoktiŋ nyi iwo Misiri.’ 35“Moses nyitenyi neto nyoto kitoye pikap Israel yo kimwowu kule, ‘Ŋo nye kokoniŋ nyi kule paytec nto ketec acek?’ Moses kunyo kiyoku Yiyintet cokwek poytoyintet nyewo oŋnkwek kosopintet om kakalyayetap malayket nyo kiporcinikey neto om rukututwet nye loye. 36Kukwerune Moses pikap Israel kukwane Misiri oŋnkwiy pelutok cepo kakitat om Misiri oko ruretyet nye arra oko om koretap kitela kuwany kenyisyek artam. 37Moses kunyo kimwoci pikap Israel kule, ‘Mosukuyokwok akwek Yiyintet workoyontet ake kuyu wulo kiyokwo ani, mosukucone neto nyoto wule omite akwek pikap Israel nkit.’ 38Moses kunyo kipontokey mpo kukonyo luketap pikap Israel yo kirurucekey om kitela, yo kiŋololyini Malayket neto om tulwetap Sinai ye kicikocini lokoywek cepo soponto nyepo okokoy sukuŋet kukonec acek. 39“Ntene kutay mpo kukonyo kulimnci Moses, kuwunukto kuwo tapan oŋnkusot kule keroke ceketitekey cipe let koretap Misiri. 40Yoto kuyoŋ oŋnkumwoci Aron kule, ‘Toŋwec acek oyinotik alak ce sekuŋet kuntowec, omnye puryo kot cinket kito nye kukwam Moses nyo kikwerunenec acek koretap Misiri.’ 41Yoto kuye kitonye cekto kerkeyinto nye kerkey moyita, oŋnkupel kwici korosek kiyoto, oŋnkwiy sakwet nyewo kwici kiyoto kitonye cek om yewuniyekwa nkit. 42Yoto kutay Yiyintet cek oŋnkwasta kusay kokelikap parak, kuyu wulo kicesilyo om kitaput workoyik kule: ‘Pikap Israel! Puryo kot ku ani nyo kyotilyini tyoŋik oko korosek kuwany kenyisyek artam om kitela. 43Ki wemetap Yiyintet Moloc nyoto nyo kyotoroti akwek, oko kerkeyintap kokelyantetap Yiyintemwoŋ Repan; coto ku kerkeyik ce kyotany akwek om yewuniyekwok oŋnkosay, kunyo mosakwetak ani ape okoy akeyitye Papulon.’ 44“Kiponto mpo kukonyo wemet om kitela nye poru kule mite Yiyintet, wemanato kunye kicitany kopur kuyu wule kimwoci Yiyintet Moses kuyiyta, oŋnkukiciyoyec kuyu wule kikiciporci neto wule tento. 45Nto om letut kukoci mpo kwan mpo kukonyacek kutorat wemanato yo kipontotikey cekto Yoswa, oŋnkusut okoy kupun koretap pikap lamek alak co kikwete Yiyintet. Kopur wemanato wuloto okoy pesyosyekap Tauti. 46Yoto kucäm Yiyintet Tauti koromun okoy kucömnci kutec koto nye minye Yiyintetap Yakopo. 47Ntene Solomon nye kitekyi Yiyintet koto. 48Kunyo puryo kot kuminye Yiyintet nyewo nye mite torot koromun korik ce tece piko; kuyu wulo mwoytoy workoyontet kule. 49‘Mwowu Mokoryontet kule, torot kunye ŋecerenyu nyepo mokoryontit, nto koret ŋony ku wule yoŋe kerenkokyu. Kunyo koto nye yu ne nye otekwo ani akwek? Ono otepto nye momuŋe ani? 50Puryo kot ku yewumwani ne nye kitonye tukucu tokol?’ 51“Oyiku akwek pic ce kyorat kotwo! Oyiku pic ce puryo kot kuwonotin mukuleywekwok, oŋnkumiŋotin yitikwok nye molime ŋalek cepo manta! Okerkeyekey mpo kukomwoŋ! Okerektoy mpo akwek okokoy Muyet Nyetilil! 52Mite pa nyun workoyonto mpo akenke nye kipuryo kot kutaŋany mpo kukomwoŋ? Kipar cek kupakäc piko ce kisutu lokoywekap Yiyintet ce kicemwoy keny kule coni mutworintet nyepo manta. Kunyo yawut kyoŋomnte akwek neto nyoto apakäc kume. 53Oyik akwek piko ce kikonok malayket ntarastinekap Yiyintet, oŋnkurok otay akwek mocäm orip ntarastinecoto.’’ 54Ntowo kulim piko tokol om kokwet ŋalek ce komwoy Stefano, kunyiy cek kelak kunyerci neto koromun. 55Ntene kunyor Stefano Muyet Nyetilil, yoto kunyal torot okoy kukäs woyintap Yiyintet oko Yesu kumite kukeyoŋe yewutap tay nyepo Yiyintet. 56Komwoy kule, “Akäs pa! Kakäs ani kayatakay wulin po torot, kunyo oköse Weritap cito nye kuyoŋe yewutap tay nyepo Yiyintet.’’ 57Yoto kupol piko tokol om kutit akenke nyewo oŋnkuker yitikwa, oŋnkurotyi Stefano, 58kocutune moŋet kuwo saŋ oŋnkuwire rwontok. Kupokokyi piko muncururwanik ce kimite yeto sirokwa oyiperyontet ake nye cekure Saulo. 59Nteye kimite cekto kuwire neto rwontok, kusom Stefano kumwoy kule, “Mokoryontet Yesu Näm mukuleymwani.’’ 60Yoto kukutuny oŋnkukurto om kutit nyewo kule, “Mokoryontet mente oyityi cekto miyotyoni!’’ Kumwoy kuyunyoto oŋnkuru ŋony kume.

will be added

X\