Acts 6

1Om letut kuminiŋ ye kimite kutosyinikey kucoŋitu konomik, yoto kucec kaŋunyŋunyet om kwenutap Yutayek co ŋolole ŋelyeptap Kirikik oko Yutayek pikap koret. Kumwoy Yutayek co ŋolole ŋelyeptap Kirikik kule kyostoy musukik cikwa monyor omik co cepciwu pesyosyek tokol. 2Yoto kukur kiyokik co kitaman ok oyeny luketap konomik tokol kukwa kuyomokey wanak oŋnkumwoci kule, “Puryo kot kumisyini kyaste acek mocemwayte ŋolyontetap Yiyintet oŋnkyerip cepciyte pesanik pate. 3Kunyo mpo yeya, akwey akwek om kwenumwoŋ piko tisap ce oŋnket akwek kule ponto swametap Muyet Nyetilil oko ŋomnonet, siceŋet acek cikoci kwiy yisyoni. 4Sukuŋet cenyoru acek poroyinto nye cesome oŋnkyiy yiyset nye cemwoytoy lokoywek.’’ 5Yoto kuŋerekyi luket tokol kasoteywek ce kimwoy kiyokik; cekwey Stefano cito nye kiponto koyenet nyewo oko Muyet Nyetilil, oko Filipo oko Nikolas, oko Nikanor, oko Timon, oko Pamena, oko Nikolas nyepo koretap Antiyok cito nye kikiweckey kwek Yutoyintet. 6Kukwer luket picoto kukwa taytap kiyokik. Yoto kusomnci kiyokik cek oŋnkukemer yewuniyekwa metewokap picoto. 7Yoto kutosyikey ŋolyontetap Yiyintet kutisto om koret oŋnkutosyikey koromun coŋintap konomik om Yerusalem oŋnkucäm tisik ce caŋ koyenet. 8Yoto Stefano cito nye kiponto poypoyet oko swamet oko kamukeywek, kwiy tukuk cepo kakitat oko pelutok ce caŋ om wule mite piko. 9Ntene yoto kutintentyi piko alake ŋalekap Stefano, coto ku piko cepo luketap kokwet nye cekure kotapkokwetap piko ce kikyasta (wule kicekurtoy cekto) ce kipontokey Yutayek cekwone Kurene oko Alekisantaria. Cek coto oko Yutayek alak ce kikwone Silisiya oko Asia, kucec picoto kutintentyin oko Stefano. 10Ntene kukoci Muyet Nyetilil Stefano ŋomnonet nye kiŋalal nye kipuryo kot komuc cek neto. 11Yoto kwal picoto piko alak ce kiŋalal kumwoy kule, “Kucelim acek neto kuŋolole kumwowu ŋalek ce miyotec om wule mite Moses oko Yiyintet.’’ 12Kuŋetŋet cekto kowurur piko oko poyik oko konetikap ntarastinek, kukwa oŋnkunäm Stefano oŋnkukwer taytap kokwet, 13oŋnkukwer piko alak kukwa kwokumwoy ŋalek cepo mwiynanet pate kule, “Ŋolole cici pesyosyek tokol nye memunye ŋalek ce miyotec konyacek nye tilil nyepo Yiyintet oko ntarastinekap Moses. 14Omnye kucelim kumwowu kule, mosukoturpup cicitenyi cekure Yesu nyepo Nasaret kululyi ŋony kotap Yiyintet, oŋnkuwec kopurto nyo kikonec acek Moses.’’ 15Yoto kurotot piko tokol ce kimite kokwet kukäs Stefano, nto pere cekäs kawälkey tokoynyi kukerkeyit tokoytap malayket.

will be added

X\