Acts 5

1Ntene kimite citake nye kicekure kaynenyi Ananiya oko korkenyi Safira, yoto kwalya Ananiya mparenyi nye kiponto, 2oŋnkuwuny kukonor pesanik alak kunkete korkenyi, oŋnkusut ce koŋet wule mite kiyokik. 3Kumwoci Petero neto kule, “Ananiya, omne sekoci Setanit kupayta mukuleyŋun kuweciŋ perper Muyet Nyetilil, omnye kwewuny pesanik kererya ce kwenyorte mparet nyo kweyalye? 4Ki cekuk tukuk tokol kutompo yalye, mpo yu koweyalye kutokucekuk pesanik. Kunyo omne secäm nyi om mukuleyŋuŋ kot yiy kiy nye yunyi? Puryo kot perper nyi piko ntene keperper Yiyintet.’’ 5Nteye kotolime Ananiya ŋalecato kuputyi ŋony kume. Yoto kumuyo piko tokol ce kilim ŋalecato. 6Yoto kukwa oyiperik oŋnkurate musto sirok oŋnkusut kuwo saŋ wokumuy. 7Nto om letut kukatil sawanik somoku, kuco korkenyi nye kipuryo kot kunkete kiy ake tokol nye kakwiyakay. 8Kutepe Petero neto kule, “Mwowo ani pa, pesanik tokol so cutecu ce kyonyoru akwek oko santeŋuŋ om mparet nyo kyoyalye?’’ Kuwec kumwoy kule, “Manta tokol cutecu.’’ 9Yoto kumwoci Petero neto kule, “Omne sacäm akwek oko santeŋuŋ kule cesyem celotu Muyet Nyetilil nyepo Mokoryontet? Käs pa piko ce kowokomuye santenüŋ, mosukusutiŋ mpenyi iwo aranato!’’ 10Om yoto pakenke koputyi yepo kerenkokyi kume. Kukwa oyiperik koto orit kwokunyor kame, kanäm oŋnkusut neto kuwo saŋ wokumuy kurupkey oko santenyi. 11Yoto kunäm muyotet nyewo koromun pikap Yiyintet oko piko alak tokol ce kilim ŋalecutecu. 12Kwiy Kiyokik tukuk cepo kakitat oko pelutok om wule mite piko, kuyomokey wanak piko tokol co kikoyen kwek luket akenke sukutuytos tekewutap Solomon. 13Kipuryo ci mpo akenke nye kipuryo kot kupo lukonoto nye kisyem kule nto owut wule kimite piko co kikoyen, ntene kuŋolole piko alake cut ŋalek ce toponec kucömntoy cekto koromun. 14Yoto kutosyikey piko ce caŋ moronik oko koruk kucäm Mokoryontet oŋnkuyomokey oko luketap piko co kikoyen Yiyintet, 15okoy cesutu mpo piko ce mnyontos cesutune kwiririnek oko tempok oŋnkwocimukontyi arastunwekap moŋet kule sukuŋet nteye kopunte Petero ye lekite cekto kuyen atotoynyi picoto alak ce kimnyontos. 16Kukwa mpo piko ce caŋ ce kiminye moŋosyek ce lekitec ce kimut Yerusalem, kusut cekto piko ce kimnyontos oko ce kiponto oyik ce miyotec, cisop tokol kusopco. 17Yoto kuŋet Tisintet nyewo oko pikyi ce kikolyoy neto, coto ku luketap kereryantetap Satusayek. Kunerekis cekto koromun kukocorok om wule mite kiyokik, oŋnkucömncin kule mocenäm citaŋany kiyokik. 18Yoto kunäm cek kiyokik oŋnkukerta mopusitap piko tokol. 19Ntene om kwomowunoto kwen, kuyat Malayketap Mokoryontet kurketap mopusit, oŋnkukwer kiyokik kukwa saŋ oŋnkumwoci kule, 20“Ape woyoŋe kotap Yiyintet orit, oŋnkomwoci piko ŋalek tokol cepo soponitenyi lel.’’ 21Yoto kucäm kiyokik. Ntowo kuyec kororn kupa kotap Yiyintet oŋnkucec kunetis. Yoto kukur tisintet nyewo pikyi co kolyoy neto oko kokwet nyepo poyikap Yutayek tokol cepo Israel, oŋnkuyokto cepa wocekwerune kiyokik mopusi kukwa kokwet wule kimite cekto. 22Nteyu kowo kupunto piko cewoyec co kiciyoktoy, munowokunyor yoto kiyokik kumite mopusi, kuweckey cek oŋnkwokumwoci kokwet kule, 23“Kowocepunte acek mopusit kumite kukerat topon oŋnkumite sikarek kuripsi topon om kurket, ntene yu kowo ceyat kurkotik puryo kot cenyorte ci orit.’’ 24Nteye kotolime cito nyewo nye poytoy kotap Yiyintet oko tisik ŋalecato kukite kumwoy kule, kukwam ne kiyokik. 25Yoto kuco citake oŋnkucokumwoci kule, “Mite piko co kwokertoy akwek mopusi keyoŋe kotap Yiyintet orit kunete piko!’’ 26Yoto kunomen cito nyewo nye poytoy kotap Yiyintet oko sikarek wokukwer cekto, ntene ye kipuryo kot kukwerune swama omnye kiywey kule mente kuwirenec piko rwontok. 27Kukwer cek kiyokik kukwa oŋnkukoci kuyoŋe taytap kokwet. Kucec tisintet nyewo kutepe kule, 28“Kucisowok cinkolonwok akwek kule, monte tocinetisye mpo kisic om kaynetap cici, kunyo akäs pa ŋalek ce kwayiy! Kwonetisye kunäm Yerusalem tokol, omöce akwek kule cesutwec acek miyotyetap korotikap cici!’’ 29Kuwekyi Petero oko kiyokik kumwoy kule, “Misyini celimnci acek Yiyintet kusir ye mocelimnci piko. 30Yiyintetap mpo kukonyacek nye kiŋet Yesu kotutune met om letut yu kowo okwertoci akwek murtowontet apakäc. 31Kunyo kikolaŋnta Yiyintet neto kuwo wokopure yewutap tay kwek kantoyintet nyewo oŋnkukosopintet, sukuŋet kukoci pikap Israel poroyinto kurenynkey om miyotyonikwa. 32Ciku acek muncururwanik ce cinketi ŋalecutecu, acek oko Muyet Nyetilil nye kokotutyetap Yiyintet nye kocini piko co limncini neto ŋalek.’’ 33Nteye kotolime pikap kirwoket ŋalecato kunyer koromun okoy kurwoc kutilta kule cepakäc kiyokik. 34Ntene kuyo cito akenke om kirwoket, nyoto ku Farasoyintet nye kicekure kaynenyi Kamaliel, nye kikonetintetap ntarastinek, nye kiyweye piko tokol. Yoto kumwayta cekwer kiyokik kupa saŋ kuminiŋ, 35oŋnkuŋalal kumwoy kule, “Merekyo pikap Israel, oripkey om kito nye omöce akwek kule ceyiye picu, 36Omnye om kenyisyek ce ŋeri co kutil, kitok cito nye kicekure Seuta oŋnkusutkey kule oyiku ci nyewo koromun, yoto kulukyi luketap piko ce rice pokolwokik amwan, ntene cepakäc neto kume, kuseret piko tokol ce kirupoti, yoto kupok lukenyi. 37Om letut yec, kutok Yuta nyepo koretap Kalilaya om pesyosyek co kiciyite piko tokol, yoto kururuc mpene piko ce caŋ kulukyi neto, ntene cepakäc kume oŋnkyiseret piko tokol co kirupoti. 38Kunyo om ŋolyontoni mite yawut yu, komwowok ani kule monte ceyiye picu kitake, oyaste kwiyat cek nkit, omnye ye ŋalecu oko yisyoni mwacek kunye kiy nye kweye piko, mosukupot om letut; 39ntene ye cone wule mite Yiyintet kupuryo kot omuci akwek kot opël cekto mpo kisic, omnye monte oporukey akwek kule omite oporye Yiyintet.’’ 40Cekur Kiyokik kukwa kokwet orit, oŋnkyepas oŋnkyemwoci cinkolontyi kule monte toceŋalale onet piko om kaynetap Yesu, oŋnkyasta kupecikey. 41Kuŋete konomik kokwet kupunto ŋerekwek ce caŋ omnye kakonket kule misyini kutaŋany toŋoŋutek om kaynetap Yesu. 42Kunetisye cekto pesyosyek tokol kotap Yiyintet oko korikap piko kumwoytoy lokoywek ce toponec cepo Yesu nye Ŋapanet.

will be added

X\