Acts 4

1Nteye kitokumite kuŋololyini Petero oko Yowana piko, kukwa tisik oko cito nyewo nye poytoy kotap Yiyintet oko Satusayek. 2Kinyer cekto kunerekis omnye kinete kiyokik coto oyenku kumwoci kule kitutune met Yesu, nye poru kule mosukotutune met piko ce kipok. 3Yoto kunäm cek oŋnkukerta mopusi okoy tun kororn, omnye kikikwimen koret. 4Ntene kuyen piko ce caŋ ce kilim lokoywek okoy kapunto coŋintap moronik ce kirice elifunek mut. 5Ntowo kuyec koret, korurukyikey Yerusalem poytoyikap Yutayek oko poyik oko konetikap ntarastinek; 6oko Anas tisintet nyewo oko Kayafa oko Yowana oko Alekisanta, oko piko alak cepo aretap tisintet nyewo. 7Kukwer cekto Kiyokik kukwa kuyoŋe taymwa om kokwet oŋnkutepe kule, “Swametap ŋo, nto kamukeywekap kaynetap ŋo nye oyiye akwek ŋalecu?’’ 8Yoto kunyor Petero swametap Muyet Nyetilil, kuŋalal kumwoci cekto kule, “Akwek kantoyikap piko oko poyik: 9Ye otepenec acek pesyoni ŋalek ce nöme ŋalek ce toponec ce kukyici cito nyo kwemwole oko wule kusopto, 10kuroke oŋnket akwek oko pikap Israel tokol; kule cici keyoŋe yu po taymwakwek kunye kucisop neto kunyol topon om swametap kaynetap Yesu Kristo nyepo Nasaret nyo kyowuyitoy akwek, ntene kuŋet Yiyintet neto kututune met. 11Yesu nyitenyi nyo mwowu silutekap Yiyintet kule, ‘Rwantet nyo kyonyile akwek tekik, kunye kiweckey kwek rwantet nye pële tokol nye tiye koto tapan.’ 12Cenyortoy kosopotet kupunune wule mite neto nkit pate omnye puryo kot kumite yec cito ake koret tokol kumukul nye kikoci Yiyintet kaynenyi piko, nye muce kot kusopec acek.’’ 13Kukite pikap kirwoket yu kowo kukäs cekto nyikanatetap Petero oko Yowana, oŋnkunket kule kipontotikey picutecu Yesu. 14Yoto kupotyi cekto ŋolyontet nye mokumwoy omnye kiköse cito nyo kucisope kumite keyoŋe ye kimite Petero oko Yowana. 15Kumwoci cekto Petero oko Yowana kuŋete kokwet kupa saŋ, oŋnkucec kurwoc kwicek nkit. 16Kutepekey kumwoy kule, “Mokyiye ne acek picu? Omnye kukunket ci tokol nye minye Yerusalem kule, cekto ce kokwiye manta ŋolyontoni po kakitat nye puryo kot cimuce cetinten. 17Ntene ye sicekerekte ŋolyontoni mente kot tokutosyikey kupunto wule mite piko tokol, roke cemwoci cisowu picu kule monte kot toŋalale yec mpo kisic kaynetap Yesu.’’ 18Yoto kukur cekto kiyokik kukwa kokwet oŋnkurwokyi kumwoci kule, “Monte kot toŋalale nto anet yec mpo kisic piko om kaynetap Yesu.’’ 19Ntene kuwekyi Petero oko Yowana kumwoci kule, “Orwoc akwek nkit nye roke ciywey om taytap Yiyintet, ciywey Yiyintet nto ciyweyak akwek? 20Omnye puryo kot cimuci acek cesisie moceŋalale ŋalek ce kicekäs oŋnkyelim acek nkit.’’ 21Kunkolontyi kokwet kukerci cekto koŋ oŋnkutyakta kupecikey omnye kipuryo kot kunyorta lelis nye muce cerate, oko omnye kimite piko tokol om yoto kukostoy Yiyintet om tukuk ce kukwiyokis. 22Kiponto cicoto kicisope om kosopet nyepo kakitat kenyisyek ce kikeytye artam. 23Nteyu kowo cityakta Petero oko Yowana, kunomen kupa lakwar wule kimite lukemwa, oŋnkuwokumwoci ŋalek tokol ce komwoy tisik cewoyec oko poyik. 24Nteye kotolime cut ŋalecato, kusom cekto tokol wanak Yiyintet kumwoy kule, “Ayi Mokoryontetap torot oko ŋony, oko ruretok oko tukuk tokol ce mite koret! 25Kiŋalal nyi om swametap Muyet Nyetilil kupunune kutitap kukonyo Tauti mutworinteŋuŋ yo kimwowu kule. ‘Omne sukunerekis lamek, omne sukuyiytakey piko nyepo püc pate? 26Kuyiytakey kutetkey kinkonikap koret, oŋnkuyomokey poytoyik wanak, kutoye cekto Mokoryontet oko Ŋapanenyi.’ 27Omnye ŋalek cepo manta kucu kule, kiyomokey wanak Erote oko Pontyo Pilato oko lamek oko pikap Israel om moŋoni oŋnkutay cekto Yesu mutworinteŋuŋ nye tilil nye kiŋap nyi kwek Kinko. 28Kururuckey cekto wanak kwiy kiy ake tokol nye kicäm nyi kunyo om swameŋuŋ oko cömisyeŋuŋ kule mosukwiyakay. 29Kunyo yawut Mokoryontet, käs pa komuyotet wule kokomuytec acek, konec acek mutworikuk ceŋalale lokoywekuk om nyikanatet tokol. 30Yite yewuŋuŋ oŋnkikonu kwiyokis ŋalek cepo kakitat om kaynetap mutworinteŋuŋ nye tilil Yesu.’’ 31Nteyu kowo kusom kot kuwany, yoto koriŋriŋ koret om yoto kimite cekto, konyor tokol Muyet Nyetilil oŋnkucec kuŋalal kumwoy lokoywekap Yiyintet om nyikanatet tokol. 32Yoto kuyomokey wanak piko tokol co kikoyen om moyet akenke oko mukuleyto akenke, nye kipuryo ci nye mwowu kule cecu tukuk ce kiponto, ntene kisonkone tukuk tokol ce kiponto cek tokol. 33Kumwaytat kiyokik om swamet ŋalek cepo manta kutor kotutunetap metap Mokoryontet Yesu. Kukoci Yiyintet cekto tokol kupeyok ce caŋ. 34Kipuryo yoto ci mpo akenke nye kimite lukonoto nye kipotyini kiy nye möce. Kwalya piko co kiponto mparosyekwa nto korik oŋnkusut pesanik ce konyor, 35oŋnkwokukoci kiyokik, cepcicin pesanicato kuyem ci tokol kuyu wule kimoktoy. 36Yoto mpo Yosep nye ki Lefintet nye kiceyici Kupro nye kikimulyi kiyokik kukure, “Parnapa’’ nye poru kaynanato kule, “Cito nye kimisyi.’’ 37Kwalya neto mparenyi nye kiponto oŋnkusut pesanik cokukoci kupoy kiyokik.

will be added

X\