Acts 3

1Nto om pesyet ake ye kimite Petero oko Yowana kupeti kuloŋntoy kotap Yiyintet wokusome om sawetap somset ye kimite sawet sokol nyepo kosoleny. 2Kimite citake nye kikomwal kuceke ye kiceyi, nye kicesutu pesyosyek tokol cokopure kurketap kotap Yiyintet nye kicekure, “Kurket nye karam.’’ Sukuŋet kusome pesanik piko ce peti kowute orit. 3Nteye kotoköse cicoto Petero oko Yowana kupeti kotap Yiyintet, kusom neto cekto kakalyayet. 4Kurotot cekto tukway cicoto topon, oŋnkumwoci Petero cicoto kule, “Käsec acek pa nyi!’’ 5Yoto kukäs cicoto cekto kusotyini kule tos musukukono kitake. 6Ntene kumwoci Petero neto kule, “Moponte ani pesya tokol, ntene mosokoniŋ kito nye oponte, om kaynetap Yesu Kristo nyepo Nasaret, komwowuŋ kule, ŋet wesetote!’’ 7Yoto kunäm Petero yewutap tay nyepo cicoto oŋnkukalya kuyo. Yoto pakenke lakwar kuculokis kusopco kerenkok oko kutuŋokap cicoto, 8Kuŋet lakwar kuyo oŋnkucec kuwesetot kowut kotap Yiyintet wanak oko cekto kuŋerekoti kuronoti kukostoy Yiyintet ye kimite kuweti. 9Kukäs piko tokol cicoto kuwesetoti oŋnkukostoy Yiyintet. 10Ntowo kukäs piko oŋnkunket kule cicoto ku somintet nyo kwepure kurketap kotap Yiyintet nye cekure, “Kurket nye karam.’’ Yoto kumuyo tokol oŋnkukite kito nye keyakay om wule mite cicoto. 11Nteye kitokunomoti cicoto Petero oko Yowana, kukite piko tokol oŋnkurway kupa wule mite cekto om tekewut nye cekure, “Tekewutap Solomon.’’ 12Ntowo kukäs Petero piko, kuŋololyi kumwoci kule, “Pikap Israel, omne sokite akwek koromun ŋalecu, nto omne sorototec acek kuyunyi. Osoti akwek kule om swamet nto om toponiyenyacek nkit kunye kekoci cici kuwesetot? 13Yiyintetap mpo kukonyo nye kwelaŋnta kukoci woyinto mutworintenyi Yesu, neto nyo kyoŋomntoy kunäm piko ce ponto kamukeywek, yo kyotoye taytap Pilato, nka mpo om letut yo kimöce Pilato kule atyakte kuwecikey. 14Ki cito neto nye tilil nyepo manta, ntene otay akwek neto. Yoto osom Pilato kwiwok ce toponec kutyokwok rumintet, 15Akany akwek cepar kume neto nyo konu soponto, nyo kiciŋet kotutune met. Ciku acek muncururwanik ce kicekäs ŋalecu. 16Om swametap kaynenyi kunye kekoci swamet oŋnkusop cici kimwole nye oŋnketi akwek topon. Ŋalecu oköse kuce kakyiy om koyenet oko cömisyetap kaynenyi. Om koyenet nyewo nye ceponte acek om Yesu kunye kesop cici kuyu wule oköstoy akwek kumite yu po taymwoŋ kuyunyi. 17“Kunyo yawut, mpo yeya oŋnketi ani kule kyayiy akwek coto oko pikwok cewoyec nye kipuryo oŋnketi. 18Kikurto kumwoy Yiyintet keny kupunune kutuwakap workoyik tokol kumwoy kule mosukutaŋany Ŋapanenyi; kunyo kakwiy kuyitita coto kuyu nyitenyi. 19Kunyo arenynkey, oŋnkowekyikey wule mite Yiyintet, sukuŋet kopukto miyotyonikwok, 20sukuŋet Mokoryontet komuc kukonok pesyosyek ce omuŋe kupoypoyitu mukuleywekwok, oŋnkuyokwok kukonok Ŋapanet, Nyoto ku Yesu nyo kicekwewok akwek kuceke keny. 21Kunyo misyini kopur neto torot okoy pesyet nye cewece tukuk tokol kulelakitu, kuyu wulo kikurto Yiyintet om kenyisyek cepo keny kupunune wule mite Workoyikyi ce tililec. 22Omnye kimwoy Moses kule, ‘Mosukukonok kuyokwok akwek Mokoryontet Yiyintemwoŋ workoyontet nye mosukucone kwenumwakwek nkit, kuyu wulo kikweyo ani. Misyini olimnci kiy ake tokol nye komwowok. 23Ci tokol nye puryo kot kulime ŋalek ce mwowu workoyontonoto, mosicekwey cito nyoto kucone wule mite pikap Yiyintet oŋnkyaranta.’ 24Mpo workoyik, kuyu Samuel oko cerupe neto kikurto tokol ŋalecu po pesyosyecutecu. 25Kunyo oyiku akwek kontiyikap workoyik, oŋnkopoye kirotyet nyo kikwiy Yiyintet oko po Papamwoŋ kuyu wulo kimwoci Apram kule, ‘Kupunune wule mite kesenisyekuk, mosokoci ani kupeyok pikap koret tokol kumukul.’ 26Kunyo kunyosyo Yiyintet kukwey oŋnkuyokwok kuco wule omite akwek mutworintenyi cokukonok kupeyok oŋnkuwecak akwek tokol apakakte kopurwek ce miyotec.’’

will be added

X\