Acts 27

1Nteyu kowo kecäm kule roke celany acek rapet cepete okoy Italia. Yoto cikoyto Paulo oko mopusinek alak cikoci Yuliyo nyewo nyepo sikarekap luketap Romek ce cekure sikarekap Kinko Nyewo. 2Yoto celany acek rapet nye kicone Atramito nye kirikik kunomen kuwo kupunte moŋosyek ce mite tapantap ruretyet om koretap poytoyisyetap Asia. Cenomen cepete rapet. Kicepontotikey acek yoto Aristariko citap Maketoniya nye cone Sesolonika. 3Nto ye pesyetap oyeny cepunte Siton. Kicöme Yuliyo Paulo, yoto kucömncini kuwo wokukäs coronutekyi oŋnkyikoci kiy ake tokol nye kimöce. 4Cenomene wuloto celany rapet cipe cerup ruretyet tapan cekerektekey Kupro nye koret nye kikwen peko omnye kiwuse yomet ye kicone tay. 5Yoto cipe kyay ruretyet ye lekite Silisiya oko Pampiliya okoy cepunte Mura moŋetap Lukiya. 6Kunyor nyewo nyepo sikarek om yoto rapet nye kicone Alekisantaria nye kikirik kunomen kuwo Italia, kulanyec acek rapanato. 7Cenomene wuloto cipe möt ciwany pesyos ce caŋ om wuyinto nyewo okoy cepunte Kunito moŋet nye mite ruretyet tapan. Yoto kucis yomet yemo cipe tay. Cerekte cerup tapantap koretap Kurete nye kikwen peko nye tokyintos oko Salmone. 8Cipe möt om wuyinto cerup ruretyet tapan tapan okoy cepunte ye cekure loyta nye topon. Kilekite yoto moŋetap Laseya. 9Cipur wuloto ciwany pesyos ce caŋ okoy kukoromit kucis ye mocetosyikey cipe poninekap ruretyet, omnye kikikeyta pesyet nyo cekure, “Cekire Omik.’’ Yoto kumwoci Paulo cekto ŋomnononi kule, 10“Merekyo, kakäs ani kule miyat pantap ruretyet, kuceke yuteyu, omnye mosukuwuryo tukuk ce mite rapet oko mpo rapet oŋnkupotyo soponwekap piko.’’ 11Ntene kucäm nyewo nyepo sikarek ŋalekap cito nye poytoy rapet oko citap rapet kupël ŋalek ce kimwoy Paulo. 12Kipuryo kot kutopon ruretyet yoto nye kimuce kot cipur okoy ciwany pesyosyekap koyitityet tokol. Yoto kucäm piko ce caŋ kule roke cenomen cesyem kyay ruretyet okoy cepunte Foyinike ye kemukakay, sukuŋet cekto wokukerektekey loytap ruretyet om koretap Kurete, nyoto ku Loyta nye mite ruretyet tapan nye tokyinikey kwenutap tö oko raraktay, oko kwenutap makentany oko raraktay wule kimuce cek wokopur kuwany pesyosyekap koyitityet om wuloto. 13Yoto kucec kuwus yomet nye kisic nye cone tö, kusot piko kule konyol kacenyoru kito nye kocemöce. Kunum cek kito nyo ciyoŋnte rapet oŋnkupa kurup kulekityi koretap Kurete tapan tapan. 14Ntene yoto pakenke nye mnoloyit, kuwus yomet nyewo nye cekure, “Yometap kwenutap makentany oko koŋasis’’ nye kicone koret. 15Kuket kuyoŋnto rapet okoy kucis ye mocipe cetokyikey yomet, yoto kyaste kusutec. 16Cipe okoy wocekerektekey tapantap koret om komostap tö nyepo koret kisic nye kikwen peko nye cekure Kawuta. Cesyem om wuyinto nyewo koromun okoy ciyoŋnte rapet nye miniŋ. 17Nteyu kowo kuloŋune cek rapet nye miniŋ, kunäm porok co cikolye oŋnkurate komut rapet nyewo; omnye kikimuyo kule muce cek kupa kot wokuryac ŋaynet om tapantap koretap Lipiya. Yoto kurek cek siret nyo sute rapet oŋnkwasta kusut yomet rapet. 18Kutosyikey kuwus yomet nyewo koromun, nto om pesyetap oyeny, kucec cek kunum terekok ce kimite rapet oŋnkuwirci peko. 19Nto om pesyet nye kirupe, kunum cek tukuk ce kiciyisye om rapet om yewuniyekwa oŋnkuwirci peko. 20Ciwany pesyosyek ce caŋ nye kipuryo kot ceköse asista nto mpo kokelik. Kutosyikey kuwus yomet nyewo koromun okoy cisot kule komocesoptosi. 21Nteyu kowo kopur piko kuwany pesyosyek ce caŋ nye puryo kot kwome omit, yoto kuyoŋe Paulo yepo taymwa oŋnkuŋalal kumwoy kule, “Merekyo, kiroke olimwo ani akwek nto kipuryo kot cenomen cekwane koretap Kurete, nto puryo kot cenyoru miyotyo oko potyet nyeyunyi. 22Kunyo osomok akwek kule, otitir! Akwil mukuleywekwok omnye komo kume ci mpo akenke om akwek, rapet pate nye mosukwaran. 23Omnye kucontyo ani laŋat komoy Malayketap Yiyintemwani nyo osoye oŋnkuco kuyoŋe ye amite, 24oŋnkumwowo kule, ‘Paulo, mente omuy! Mesewo okoy weyoŋe taytap Kinko Nyewo. Kunyo käs pa kakoniŋ nyi Yiyintet om toponiyenyi soponwekap piko tokol cu opontekey om rapet.’ 25Kunyo, merekyo otitir! Omnye Oyeni okenekey ani Yiyintet, kunyo mosukwiy ŋalek cepo manta kuyu wule kucemwoytowo. 26Ntene mosukusutec yomet okoy cepunte koret ake nye kikwen peko.’’ 27Nteye kipesyetap kwomowutap taman oko amwan kumite kusutec yomet kutokyec wulin oko wuli om ruretyetap Metiterenian. Ntowo kupunto komoy kwen om pesyonoto kusow kunket piko co sute rapet kule yunye kacerikte cepunte koret. 28Yoto kurate rwantet porowet oŋnkukoyito kuwo peko orit kuyoyec, ntowo ciyoyec cekäs kule mite peko koyinto nyepo kokwoyutek artam kuwo ŋony. Cipe kuminiŋ, ciyoyec, nteye pere cekäs cekäs kule mite peko koyinto nyepo kokwoyutek sosom kuwo ŋony. 29Yoto kumuyo piko ce sute rapet kule muce kuwo rapenyacek kot wokuryac rwontokap ruretyet tapan. Kukoyito cek karik amwan co ciyoŋnte rapet let, oŋnkusom kule kuyec koret pate. 30Kusyem piko co sute rapet kule cemwey cewuŋatekey, kunäm cek rapet nye miniŋ aŋnkukoyito kuwo peko orit kwiyiytakey nye yunye möce kule wocetosyi cikoci rapet tay karik co ciyoŋnte. 31Kumwoci Paulo nyewo nyepo sikarek kule, “Ye puryo kot kopur orit piko co sute rapet, kupuryo kot omuci akwek kot osopce mpo akanke.’’ 32Yoto kumüt sikarek porok ce nöme rapet ye miniŋ oŋnkwasta kuwo peko orit. 33Ntowo kurik kuyec koret, kusom Paulo piko tokol kwomis omik kumwoci kule, “Pesyoni kuye pesyetap taman ok amwan omite akwek okoŋisyi osoti pate nye moyome kiy mpo kisic. 34Kunyo osomok akwek kule oyomisye, omnye möce soponwekwok omik ye sosopce. Omnye komokupote putyontetap metitap ci ake tokol om akwek.’’ 35Nteyu kowo kuwany neto kumwoy ŋalecato kunam mukatyantet oŋnkusomnci kukasta Yiyintet om taytap piko tokol, oŋnkupetec kwam. 36Yoto kutitir ci tokol, oŋnkwomis omik. 37Kicemite acek piko tokol rapet orit ce kicepuntoy pokolwokik oyeny ok tomonwokik tisap ok lö. 38Nteyu kowo kwomis piko tokol okoy kupiyoŋ kunäm cekto nkanuk ce kimite rapet orit oŋnkuwirci ruretyet sukuŋet kukuskusit rapet. 39Ntowo kuyec koret, kipuryo kot konket piko co sute rapet kule koret oŋnkono tapantap koronoto. Ntene kukäs cekto loytap ruretyet ye kimite ŋaynet, kusot kule ye kemukakay komuce kusut rapet okoy kupunto yoto. 40Yoto kumüt porok co kacerate karik co yoŋntoy rapet oŋnkupokokyi karik peko orit, oŋnkutyac porok co rote nkwatyet nyo cesute rapet oŋnkuyoŋnto siret nyepo rapet tay kutokyikey yomet sukuŋet kusut yomet rapet kuwo ruretyet tapan. 41Ntene kuwo rapet okoy kuryac tulwetap ŋaynet nye mite peko orit, kunam rapet wule po tay ŋaynet nye puryo kot kutwoyekey oŋnkumite kolucluce kupetece yomet rapet wulo po let om swama. 42Yoto kurwoc sikarek kule roke cepakäc mopusinek tokol sukuŋet mente kot kupir peko mpo akenke kway okoy kupunto koret oŋnkumwey kupecikey. 43Ntene kimöce nyewo nyepo sikarek kule osoru kusop Paulo, yoto kuyete neto sikarek mokwiy kito nye kimöce kule ceyiy. Kumwoci nyewo nyepo sikarek piko tokol ce kimuce kupir peko; kunyosyo kurane rapet oŋnkupir peko kupa okoy ruretyet tapan. 44Nto piko co koŋet, kupa co kupir peko kunämat pawunekap rapet co kokwilyo. Kuyuyit nyoto wule kicepete acek okoy cepunte koret tapan oŋnkyesopce piko tokol.

will be added

X\