Acts 25

1Nteyu kowo kuwany Festo pesyosyek somok kuceke kopun koret nye kipoytoy, yoto kunomene Kaysariya kulaŋnta kuwo Yerusalem. 2Nteye kimite wuloto, kuwasan tisik cewoyec oko kantoyikap Yutayek kuwosontyi Paulo. Kusom cek Festo kule kucäm kukwer Paulo kuco Yerusalem. 3Omnye kikwiy rurumut kule cenäm neto kuconi om aran oŋnkyepakäc. 4Kuwekyi Festo kumwoci cekto kule, “Ceripune Paulo mopusi om Kaysariya, kunyo mosonomen aweckey ani lakwar awo kaysariya; 5roke akwey akwek kantoyikwok cepetekey sukuŋet wokuwosontyi ye kukwiy lelis nye miyat.’’ 6Kopur Festo wanak oko cekto kuwany pesyosyek sisit nto taman, oŋnkunomen kurekto kuwo Kaysariya. Ntowo kuyec koret, kopure neto ŋeceretap kokwet nye cemute musankunek oŋnkumwayta cekwer Paulo kuco kokwet. 7Nteyu kowo kuco Paulo; kuyoŋ Yutayek ce kikwone Yerusalem komut neto, oŋnkucec kuwosontyi kumwoy ŋalek ce caŋ ce nyikisec ce kipuryo kot komuce mpecek nkit kot kupor kule po manta ŋalecato. 8Ntene kuŋalal Paulo kuyetkey kumwoy kule, “Puryo kot ayiy ani lelis nye miyat nye yirye ntarastinekap Yutayek nto mpo nye nöme kotap Yiyintet, nto mpo kule kyawurte om wule mite Kinko Nyewo.’’ 9Ntene omnye kimöce Festo kule kucäm Yutayek, yoto kutepe neto Paulo kumwoci kule. “Möce kule awo Yerusalem wocewosontyineniŋ wuloto om taymwani?’’ 10Kumwoy Paulo kule, “Amite ani yu kukoyoŋe taytap ŋeceretap kokwetap Kinko Nyewo nye cemute musankunek, wule roke cewosontyineno, kunyo puryo kot ayiy lelis nye miyat om wule mite Yutayek kuyu wulo kenket nyi nkit topon. 11Ye kyoyiri ntarastinek, nto ye kyayiy lelis nye roke cepakäca, kupuryo kot osome kule osop. Ntene ye puryo kot kumite lelis nyepo manta nye wosontyo cekto, kupuryo ci nye muce kot kukoyito awo wule mite cekto. Kunyo ocururoni kule kuwo musankut wule mite Kinko Nyewo.’’ 12Yoto kulolyin Festo oko kirwokikyi cepo kokwet, ntowo kuwany; kuwekyi kumwoci Paulo kule, “Kesom nyi kule awo wule mite Kinko Nyewo, kunyo mosukutastakey musankuŋuŋ kuwo wule mite Kinko Nyewo.’’ 13Nto om letutap pesyos ce ŋeri; kukwa okoy kupun kaysariya Kinko Akripa oko Pernike kurutoci kwokusupay Festo. 14Nteyu kowo kopur cek pesyos ce ŋeri, kumwoci Festo Kinko Akripa musankutap Paulo kule, “Mite citake yuteyu nye kipokokyi Filekis mopusi; 15nteye kyomite ani Yerusalem kuŋalal kuwosontyi tisik cewoyec oko poyikap Yutayek kusomo kule omutyi neto musankut kulot. 16Ntene omwoci ani cek kule, puryo kot kukopurtap Romek kukoyito ci tokol nye cewosontyini kutompo kot kuwosontyin oko piko co wosontyini neto; oŋnkukoci poroyinto kuŋalal kuyetkey om konyekwa. 17Ntowo kukwa cek okoy kupun yuteyu, yoto monolilennkey ani awany mpo pesyo, nteye kipesyet nye koyekune opure ŋeceretap kokwet nye cemute musankunek aŋnkamwayte cekwer neto kuco kokwet. 18Yoto kuyoŋ piko co kiwosontyini, ntene kipuryo kot kumwoy kupor lelis nye miyat nye kikwiy cici kuyu wule kyosotitoy ani kule mosukumwoy. 19Ŋalek tokol ce kimwoy cek pate kuce po tintenotet nye ponto cek oko neto ce nöme ŋalekap tinimwa oko cepo citake nye kime nye cekure Yesu nye mwowu Paulo kule sope. 20Yoto kupotwo ani wule manyorte ŋalek cepo manta om ŋalecu. Atepe Paulo ye möce kule awo Yerusalem wocewosontyine wuloto musankunyi. 21Ntene kutasta kucururan Paulo musankut, oŋnkusom cerip okoy kumüt Kinko Nyewo musankunyi. Yoto amwayte cerip neto okoy okoyite kuwo wule mite Kinko Nyewo.’’ 22Kumwoci Akripa Festo kule, “Amöce mpo ani kule alim ŋalekap cicitenyi.’’ Kumwoy Festo kule, “Meselim ŋalekyi tun.’’ 23Ntowo kuyec koret kukwa kotap kokwet Akripa oko Pernike om woyinto oko koyweyisyet, kupontonukey cewoyec cepo sikarekap poryet oko kantoyik cewoyec cepo moŋet. Yoto kumwayta Festo cekwer Paulo kuco kokwet. 24Kuŋalal Festo kumwoy kule, “Kinko Akripa, oko akwek piko tokol cu cepontekey: Akäs pa akwek cici, nye kiwosontyi Yutayek tokol om wule amite ani om Yerusalem oko yuteyu ce mite. Kipol kumwoy kule puryo kot kuroke tokusop mpo kisic. 25Ntene puryo kot anyoru ani aŋnket kule kikwiy lelis nye miyat nye roke cepakäce. Ntene omnye kitasta kucururan musankut nkit kuwo wule mite Kinko Nyewo, acäm ani kule okoyite kuwo wule mite Kinko Nyewo. 26Ntene puryo kot oponte ani ŋolyontet nyepo manta nye mosilyi Kinko Nyewo. Kunyo kokweru kuco yu po taymwakwek, ntene kupëlis om tayŋuŋyi Kinko Akripa! Sukuŋet ye kacenay acek okoy cenyoru ŋalek cepo manta cepo musankunyi, anyoru mpo ani ŋolyontet nye mosil. 27Omnye porukey om wule amite ani kule puryo kot ku ŋolyo nyepo ŋomnon akoyite ani mopusyo kupuryo kot kopunto ŋalek cepo manta cepo musankut nye cewosontyini.’’

will be added

X\