Acts 24

1Nto om letutap pesyosyek mut, kurekto Ananiya Tisintet nyewo kuwo Kaysariya wanak oko poyik alak oko Puritet nyepo ntarastinek nye cekure kaynenyi Tertulo. Koyoŋe cek taytap poytoyintet Filekis oŋnkumwoci ŋalek ce wosontyini Paulo. 2Yoto cekur Tertulo kuco. Kuyat nyo musankut kuŋalal kuwosontyi Paulo kumwoy kule, “Mokoryontet Filekis nye cekonyite! Om ŋomnonetap Poytoyisyeŋuŋ kunye kukonec acek kalyet kuwany kenyisyek ce caŋ, kunyo mite ce weywece tukuk ce roko kyiy om toponiyetap korenyacek. 3Ceŋerekyini acek ŋalecutecu tokol okokoy om wulyo tokol oko om pesyosyek tokol, oŋnkyikostiŋ acek nyi koromun. 4Puryo kot amöce kule awaŋeniŋ poroyinŋuŋ, kunyi osomiŋ om toponiyeŋuŋ kule limwec acek ŋalekyacek cu ŋeri. 5Kucinket acek oŋnkyenyoru kule miyat cici koromun, neto nye wurure kutoytoy Yutayek om koret tokol, neto yec kunye kantoyintetap luketap citap Nasaret. 6Cenäm acek neto, ceyiytekey kule cewosontyi kuyu wule yunto ntarastinekyo, 7ntene kuconto pararet Lusia nyewo nyepo sikarek oŋnkuco kunumenenec acek oko om swama. 8Yoto kumwoy Lusia kule roko kukwa piko co wosontyini neto wule mite nyi. Ye kekir nyi tepe cicitenyi, mesenket nkit kukwane wule mite neto ŋalek tokol cu cewosontyini acek.’’ 9Kuwasan Yutayek tokol kumwoy kule po manta ŋalekyoto tokol. 10Yoto kuwus Poytoyintet kumwoci Paulo kuŋalal. Kucec Paulo kuŋalal kumwoy kule. “Oŋnket ani kule kweyiku nyi ketintetap pikap koroni kuwany kenyisyek ce caŋ, kunyo oŋololi ani ŋalekwani oyetekey nye puryo kot oponte muyot. 11Omnye muci nyi nkit nket ŋalek cepo manta kule tompo kot kukeytya pesyosyek tamanu ok oyeny kuceke ye kyalaŋnte ani awo Yerusalem wasay. 12Kipuryo kot kunyorwo Yutayek otitentyintosi oko citake tokol om kotap Yiyintet, nto kunyorwo mpo owururi piko om korikapkok, nto mpo om wulyo ake tokol om moŋet. 13Kunyo puryo kot komuce cekto kot kumwowuŋ nyi mpo yawut pesyoni ŋalek cepo manta ce wosontyo ani cekto. 14Ntene ocöme ani om konyekukyi kule osoye ani Yiyintetap mpo kukonyo omnye arupe aret nyelel nyo mwowu cek kule puryo kot kupo manta. Ntene oŋnkoyen ŋalek tokol ce silotin om ntarastinekap Moses oko ŋalek cepo kitapunekap workoyik. 15Oponte mpo ani kokenotet om wule mite Yiyintet nye kerkey oko nyo cöme cek picutecu wosontyo ani, kule mosukotutune met piko tokol co kipok ce toponec oko ce miyotec. 16Kunyo osyeme ani oyiyisye pesyosyek tokol kuyu wule yunto cekto; kule opurte moyet nye topon om wule mite Yiyintet oko wule mite piko tokol. 17“Ntene om letut yu kowo awany kenyisyek ce caŋ nye kimomite Yerusalem, yoto awo ani osutyi pikap korenyu pesanik ce kikolye oŋnkokoyte korosek co cikoytoy. 18Nteye kyomite oyiye ŋalecutecu kuye kinyorwo ani cekto amite kotap Yiyintet orit om letut yu kowowawany ayiy ntasimnyet nyo cipukte simnyontet. Kipuryo kot opontekey yoto piko ce caŋ, kipuryo mpo kot kumite yoto cukurotet. 19Ntene kimite yoto Yutayek ce kikwone koretap poytoyisyetap Asia. Cekto picoto kuce keroke kumite yawut yuteyu po tayŋuŋyi kuwosontyo ani ye ponteno ŋolyo ake tokol. 20Kunyo yaste kuŋalal kumwoy piko cu mite yu yawut lelis ne nye kinyorta cekto yo kyoyoŋe kokwet, 21tos pate ŋolyontoni akenke nye kyokurte omwowu yo kyoyoŋe taymwacek kule, ‘Amite ani yu pesyoni, cewosontyo omnye ayeni kule mosukotutune met piko co kipok.’ ’’ 22Yoto kuker Filekis kokwet omnye kinkete ŋalekap piko co kikoyen, aŋnkumwoci cek kule, “Mosamüt musankumwoŋ ye kaco Lusia nyewo nyepo sikarek.’’ 23Kumwoci Filekis sikorintet nyewo kule ceripune Paulo mopusi, ntene kumwayta cikoci poroyinto nye yeme nye puryo kot cekerektoy coronutekyi makwa kwokwici neto tukuk ce möce. 24Om letutap pesyos ce ŋeri, kuco Filekis oko korkenyi Trusila nye ki ceptap Yutayek. Yoto kumwayta cekwer Paulo kuco cokumwoci cek ŋalek ce nöme koyenet om Kristo Yesu. 25Ntene yu kowo kutosyikey Paulo kuŋalale ŋalek cepo manta ce nöme toponiyet oko ripetapkey oko ŋalek cepo pesyetap musankut nye mosukuco, yoto kumuy Filekis oŋnkumwoy kule, “Kayem co pesyoni, wekany mosokuriŋ ani pesyet ake ye oponte poroyinto.’’ 26Kisote Filekis om aret ake kule muce kukono Paulo pesanik ce kalena. Kuyuyit nyoto kukure neto Paulo om pesyosyek alak oŋnkwokuŋalal tukway. 27Ntowo kutil kenyisyek oyeny, kunam Porika Festo poytoyisyet kuker Filekis. Yoto kumac Filekis kule kucäma Yutayek, kupakakta Paulo kuratat om mopusi.

will be added

X\