Acts 23

1Kurotot Paulo topon piko ce kimite kokwet, oŋnkuŋalal kule, “Merekyo mpo yeya, kyopur ani nye topon koromun om mukuleymwani oko soponmwani om taytap Yiyintet kuceke keny okoy yawut pesyoni.’’ 2Yoto pakenke kumwoci tisintet nyewo Ananiya piko ce kimite ye kilekite Paulo kusyec neto kwarmatut. 3Kumwoci Paulo neto kule, “Mosukusyeciŋ Yiyintet nyi totet nyi kiciyil kulelit! Mite nyi kepur yo wosontyo kuyu wule yunto ntarastinek, kunyi mite yec yirye ntarastinek mwocini piko kusyeca ani!’’ 4Kumwoci piko ce kimite keyoŋe ye kilekite Paulo kule. “Kecup tisintet nyewo nyepo Yiyintet!’’ 5Kuwec Paulo kumwoy kule, “Mpo yeya, kopuryo kot oŋnket kule neto ku tisintet nyewo, omnye mwowu silutekap Yiyintet kule, ‘Mente kot omwoci ŋalek ce miyotet poytoyintetap pikuk.’ ’’ 6Ntowo konket Paulo kule piko ce kimite kokwet alak ku Satusayek nto alak ku Farasayek, yoto kuŋalal kukurto om kutit nyewo kumwoy kule, “Merekyo mpo yeya! Oyiku ani Farasoyintet nye weritap Farasoyintet, kunyo amite ani cewosontyo om yu omnye acöme kokenotet kule mosukotutune met piko co kipok.’’ 7Yoto pakenke yu kowo kumwoy Paulo ŋalecato, kucec kowokut kutintentyin Farasayek oko Satusayek okoy kupciykey piko ce kimite kokwet. 8Omnye kimwowu Satusayek kule puryo kot komuce kot kotutune met piko co kipok, oŋnkumwoy yec kule puryo kot kimite malaykanik nto oyik. Ntene kucöme Farasayek kule mite tukucutecu tokol ku somok. 9Yoto kuŋetŋet kuwoyit polotet okoy kuyoŋ konetikap ntarastinek cepo luketap Farasayek oŋnkutinton kumwoy kutor kule, “Puryo kot cekösyi acek cici lelis nye miyat, pesyet ake nto kuŋololyi muyet ake nto malayket neto.’’ 10Yoto kutosyikey tintenotet oko wokutyet okoy kumuy nyewo nyepo sikarek kule muce cekto kusor Paulo kusacasac. Kumwoci sikarek kupa kwenutap piko oŋnkocut Paulo om swama kucone wule mite cek oŋnkukwer kuwo kaytap sikarek orit. 11Nto om kwomowunoto, kuyoŋe malayketap Mokoryontet komostap Paulo, oŋnkumwoci kule. “Titir! Kuyu wulo keporu nyi mwowu ŋalekwani om yuteyu po Yerusalem kunyo meseyiy mpo kuyunyoto om Rom.’’ 12Ntowo kuyec koret, koruruckey kutuyo wanak Yutayek oŋnkurwoc kuyiyta rurumut. Kuwalkey cek kumwoy kule, puryo kot kwomisyi nto kuyesyo kiy ake tokol okoy ye kacepakäc Paulo. 13Kipuntoy ce keyitye artam piko tokol ce kikiyiytakey kule ceporisye. 14Kupa cek wule mite tisik cewoyec oko poyik oŋnkumwoci kule, “Kaciwalkey acek tokol koromun kule, puryo kot cecemcemi kiy tokol okoy ye kacepakäc Paulo. 15Kunyo oyokte akwek oko kokwet yawut ŋolyontet kuwo wule mite nyewo nyepo sikarekap Romek, sukuŋet kukwer Paulo kuco wule omite akwek, ayiytekey kuyu nye omöce kule cinket ŋalek cepo manta cepo musankunyi. Mosiceyiytekey acek om aran oŋnkyepakäc neto kutompo kot kupun wuloto.’’ 16Yoto kulim weritap cekwametitap Paulo ŋalek cepo rurumunoto. Kunomen nyo kuwo okoy kupunto kaytap sikarek orit oŋnkuwokumwoci Paulo. 17Kukur Paulo sikorintet akenke nyewo oŋnkumwoci kule, “Kwer pa nyi oyiperyontoni kuwo okoy wule mite nyewo nyepo sikarek, omnye ponto ŋolyontet nye möce kule amwoci neto.’’ 18Kukwer sikorintonoto oyiperyontonoto okoy kupunto wule mite nyewo nyepo sikarek oŋnkumwoci kule, “Kokuro mopusyontet Paulo oŋnkusomo kule akweru oyiperyontoni kuco wule mite nyi, omnye ponto ŋolyontet nye möce kumwowuŋ.’’ 19Yoto kunäm nyewo nyepo sikarek oyiperyontonoto yewut oŋnkukwer kuwo tapan, oŋnkutepe möt kule, “Ponte nyi ŋolyo ne nye möce kule amwowo ani.’’ 20Kumwoci kule “Kukurwoc oŋnkucömncin Yutayek kule cesomiŋ nyi pesyetap tun, seŋet kweru Paulo kuco kokwet kuyu nye möce kokwet kule cinket ŋalek cepo manta cepo musankunyi. 21Ntene mente kot ocömnci, omnye mite piko ce keytye artam ce mosukuyiytakey kurip kule cenäm neto. Omnye kukuwalkey picoto tokol kumwoy kule puryo kot kwome cek omit nto kuyesyo okoy ye kapakäc neto. Mite yawut kuyiytoykey kunyo konye pate ŋalek ce memwowu nyi.’’ 22Kumwoci nyewo nyepo sikarek oyiperyontonoto kule, “Mente kot omwoci citake kule kemwowo ani ŋalecu.’’ Oŋnkumwoci oyiperyontonoto kuwecikey. 23Yoto kukur nyewo nyepo sikarek alak cewoyec oyeny, oŋnkumwoci kule, “Akwey sikarek pokolwokik oyeny kupa Kaysariya, wanak oko sikarek cepo Farasinek tomonwokik tisap, oko cepo ŋotwek pokolwokik oyeny; aŋnkayiytekey kunomen pesyoni ye mite sawet somok nyepo komoy. 24Okoci Paulo Farasinek ce kowete, oŋnkokwer topon okoy kupunto wule mite poytoyintet Filekis.’’ 25Yoto kusil nyewo nyepo sikarek parwet nye kisil kule. 26“Ani nyo Klautiyo Lusia. Osupoyiŋ nyi poytoyintet nye Cekonyite Filekis. 27Kunam Yutayek cici okoy kurik kupakäc cekto neto. Yoto awo ani oko sikarek okoy wosoru onumune cek, omnye kyonyoru oŋnket kule kikwek neto Romin. 28Nteye kyomöce ani kule oŋnket lelisto nye wosontyini cekto neto, yoto okwer kuwo kokwemwacek. 29Ntene anyoru kule puryo lelis nye miyat nye kikwiy nye roke cepakäce nto mpo cerotyi mopusi. Ŋalek ce wosontyini cek neto kuce nömekey oko tintenotetap ntarastinekwa pate. 30Nto om letut cemwowo kule kakwiyta Yutayek rurumut kule cepakäc neto. Acäm ani kule okweru kuco wule mite nyi, oŋnkomwoci piko co wosontyini neto kukwa kwokumwoy om tayŋuŋyi ŋalek ce wosontyini cek neto.’’ 31Yoto kunäm sikarek Paulo oŋnkukwer kuyu wulo kacemwoci, kukwer cek neto kwomowunoto okoy kupunto Antipatri. 32Ntowo kuyec koret, kuweckey sikarek cepo kerenkok kuketkey kukwa kaytap sikarek, oŋnkupakakta sikarek cepo Farasinek kukwer Paulo. 33Yoto kukwer cek neto okoy kupunto Kaysariya, oŋnkukoci parwet poytoyintet oŋnkuporci Paulo. 34Kusuman poytoyintet parwet oŋnkutepe Paulo kule cepoytowuneniŋ kureryantet oŋnkono. Nteyu kowo kunket kule cone Silisiya, 35kumwoy kule, “Mosolimuŋ ani ŋalekuk ye kakwa piko co wosontyini nyi okoy kupun yu.’’ Yoto kumwayta ceripune Paulo kaytap Erote.

will be added

X\