Acts 21

1Nteyu kowo cisupaykey acek oko cekto, cepciykey celany acek rapet cipe ceculakisye kyay okoy cepunte Kosi, nto pesyetap oyeny cepunte Roto, nto kuceke yoto cetosyikey cipe okoy cepunte Patara. 2Cenyorte wuloto rapet nye nomene kuweti Foyinisiya, celany cepete nyoto . 3Cipe okoy cepunte wule cekäs Kupro om komosta tö, yoto cipe okoy cepunte Siriya, wokuyo rapet Tiro wule kiwocirekyi terekok ce kisute. 4Cenyorte wuloto piko alak ce kikoyen cipur oko cekto ciwany pesyosyek tisap. Kumwoci picoto Paulo om swametap Muyet Nyetilil kule mente kuwo Yerusalem. 5Nteyu kowo ciwany wuloto pesyosyek ce kicipur, cenomen poninekyo, kuyomisec piko tokol koruk oko lekok okoy cepunte moŋet saŋ, yoto cekutuny om yepo ruretyet tapan oŋnkyesom. 6Ntowo ciwany, cisupaykey acek oko cekto, oŋnkyipe acek wocelany rapet, kunomen cek, kuweckey kupa ka. 7Cetosyikey acek cipe poninekyo om rapet kuceke Tiro okoy cepunte Ptolemayi, wule kiwo cisupay mpo yeya; oŋnkyipur wanak oko cekto ciwany pesyet akenke. 8Ntowo kuyekune, cenomen cipe okoy cepunte Kaysariya. Nteye kicemite wuloto cipe kotap Filipo mwoytoyintetap lokoywek wocipur oko neto. Neto kunye akenke om piko tisap co kicekweye Yerusalem, 9Kiponto tipikyi amwan ce puryo kot cimüt ce kimwoytoy ŋolyontetap Yiyintet. 10Nteyu kowo cipur wuloto ciwany pesyos ce ŋeri, yoto kucone workoyontet Yuteya nye cekure kaynenyi Akapo. 11Yoto kuco okoy wule cemite acek, oŋnkunäm porowetap suwe nyepo Paulo; oŋnkurate kerenkokyi oko yewuniyekyi oŋnkumwoy kule, “Komwoy Muyet Nyetilil kule, yunyi wule mokuratita Yutayek citap porowoni po suwe om Yerusalem, oŋnkukoyito kunäm lamek.’’ 12Ntowo celim acek ŋalecato, cesom acek oko pikap wuloto cesaysay Paulo kule mente kuwo Yerusalem. 13Ntene kuwec kumwoy kule, “Kiy ne nyi oyiye akwek, yu korirye kuyu nyi, omöce kule ceyiri mukuleymwani? Oyiku yiytat nye puryo kot ku kule cerata pate, ntene mpo womeci Yerusalem om kaynetap Mokoryontet Yesu.’’ 14Ntowo kucis ye mocewec acek neto, kyaste pate, oŋnkyemwowu kule, “Cesome kwiyokis cepo Mokoryontet kuyu wule moktoy.’’ 15Nto om letut yu kowo cipur wuloto ciwany pesyos ce ŋeri, ceyiytekey acek cerat tukukyo oŋnkyenomen cipe celaŋnte Yerusalem. 16Yoto cepetekey acek wanak oko konomik alak cepo Kaysariya, kukwerec acek okoy kotap Manason citap Kupro nye kikikoyen om pesyosyek ce kipo tay, nye kicepeti acek yoto kule wocipurune kanyi. 17Ntowo cepunte Yerusalem, kuŋerekyec acek mpo yeya koromun. 18Ntowo kuyekune cepetekey tokol oko Paulo wocekäs Yakopo. Kimite yoto poyik tokol cepo pikap Yiyintet. 19Kosupay Paulo cekto oŋnkuŋalal kuporci topon ŋalek tokol ce kikwiy Yiyintet om wule mite lamek om yisyet nye kikwiy neto. 20Ntowo kulim cekto ŋalekyi, kuŋerec tokol kukasta Yiyintet. Oŋnkumwoci cek Paulo kule, “Yeya muci nyi nkit käs wule yunto, kule mite mpo Yutayek pokolwokik ce caŋ ce kiweckey kuyen oŋnkukwilotin tokol om ntarastinekyo. 21Kunyo kucemwoci cekto ŋalek alak ce nömiŋ nyi kule; neti nyi Yutayek tokol ce minye korosyekap lamek mwocini kule kwasta cekto ntarastinekap Moses, oŋnkimwoci kutay mawon lekokwa, oko kule kutay marup kopurtap Yutayek. 22Kunyo mokyiy kulene? Omnye porukey kupoyit manta kule; mosukulim cek kule kweco nyi. 23Kunyo roke yiy ŋalek ce mocemwowuŋ nyi. Mite yu piko amwanu ce kakuwalkey kawalat, 24wetekey nyi picutecu oŋnkuwayiy tokol oko cekto ntasimnyet nye cipukte simnyontet oŋnkikoyite nyi pesanikwa sukurwac cekto metewokwa, sukuŋet konket piko tokol kule puryo kot kupo manta ŋalek co kuceŋololeniŋ nyi. Ntene kupor kule yiku Yutoyintet nye rupe ntarastinekap Moses. 25Nto ŋalek ce nöme piko co lamek co kikoyen, kicirwoc oŋnkyesilyi cek parwet cemwoci kule, puryo kot kuroke kwam omit ce kocesoci kerkeyik oko korotik, nto tyony nye kaciket kume, oŋnkusanekay sakwayanat.’’ 26Yoto kukwer Paulo picoto, ntowo kuyekune kwiy neto oko picoto ntasimnyet nye cipukte simnyontet, oŋnkuwo Paulo kotap Yiyintet wokumwayta ye pekune pesyet nye cipukte simnyontet, oko pesyet nye mosukukonune neto kokotutekap ci tokol om cekto. 27Nto tompo kot kupunto pesyosyek tisapu kukösyi Yutayek cepo koretap Asia kumite Paulo kotap Yiyintet orit. Yoto kowurur cekto luketap piko ce caŋ oŋnkunäm Paulo. 28Kupol cek kumwoy kule, “Pikap Israel! Pikap Israel! Akalyec! Akalyec! Cito nyitenyi nyo wesotote koret tokol kumukul kunete piko tokol konetisyenyi kumwoci kule kusenkerec acek pikap Israel, oŋnkumwoci kutay ntarastinekap Moses oko koyi po Yiyintet. Kunyi kokwer mpo lamek kwokowut kotap Yiyintet kunyere koyi tilil!’’ 29Kimwoy cek kuyunyoto omnye kukukösyi cekto yikwe Paulo moŋet kupontotikey Trofimo citap Efeso, kusot cek kule toskoy kokwer Paulo neto kuco kotap Yiyintet orit. 30Yoto kutonkworokis ŋalek om moŋet tokol kumukul, kukwa kurwoy piko tokol koruruckey oŋnkunäm Paulo kucutune kotap Yiyintet; yoto pakenke ceker kurkotikap kotap Yiyintet. 31Nteye kimite luketap piko ce caŋ kusyeme kule cepakäc Paulo kume, yoto kupunto ŋalek wule mite nyewo nyepo sikarekap Romek cemwoci kule kutankwarakay Yerusalem tokol kumukul. 32Kunäm nyo pakenke sikarekap Romek alak cewoyec oko sikarek oŋnkukwer kupa lakwar wule mite luketap piko. Nteye kotoköse piko neto oko sikarek kwasta nye komokupire Paulo. 33Kuwo nyewo nyepo sikarek okoy ye kimite Paulo oŋnkunäm oŋnkumwayta cerate nyororonik oyeny, oŋnkutep kule, “Ŋo cici, kakwiy ne?’’ 34Yoto kupol piko alake om kwenutap piko kumwoy ŋalek alak, kumwowu yec alake ŋalek alak, okoy kupotyi nyewo nyepo sikarek ŋolyontet nyepo manta om polotet. Kumwayta cekwer Paulo kuwo kaytap sikarek. 35Yoto cekwer Paulo okoy kupunto yepo loŋntowutokap kaytap sikarek kukonopoti sikarek neto omnye kikiwuryo piko tokol koromun. 36Kimite yoto piko ce caŋ korwowu kunomu ce kipolonu kumwowu kule, “Apakäc cico kume!’’ 37Nteyu kirikik cekwer Paulo kowut kaytap sikarek orit kukopunto yepo kurket, yoto kuŋololyi Paulo nyewo nyepo sikarek kumwoci kule, “Omuci ani pa omwowuŋ nyi ŋolyo?’’ Kutepe nyewo sikarek neto kule, “Ŋololi nyi so ŋelyeptap Kirikik? 38Puryo kot kwinyi ne cico po Misiri nyo kicece weywekatet om pesyosyek co kutil kuntoci piko Romek Elifunek amwan ce ponto karikap poryet kupa kitela.’’ 39Kuwekyi Paulo kumwoci neto kule, “Oyiku ani Yutoyintet sikwo nye kiceyico moŋetap Taruso om Silisiya, citap moŋet nye tokunot, osomiŋ kule cömwo oŋololyi piko.’’ 40Kucömnci nyewo Paulo kuŋalal. Yoto kuyo Paulo oŋnkuwuse yewuniyekyi piko, nteyu kowo kusisio kuŋololyi om ŋelyeptap Puraniyek.

will be added

X\