Acts 20

1Nto om letut yu kowo kusisio ŋalek, kukur Paulo kutuyo wanak piko co kikoyen oŋnkuŋololyi cek ŋalek ce kwile oŋnkuyomis oŋnkunomen kuwo okoy Maketoniya. 2Kuwesetote kupunte korosyecoto oŋnkumwoci cekto lokoywek ce caŋ ce kwile. Yoto kuco okoy kupun koretap Akaya, 3wule kipur kuwany orok somok. Nteye kimite kuyiytoykey kule onomen ayay okoy opunte Siriya, yoto kusow konket kule kakwiyta Yutayek rurumut kule cepakäca. Kusot oŋnkuwoŋnkyi kule maweckey opunte aretap Meketoniya. 4Kiwetoykey Paulo yoto picu; Sapatro weritap Piriko citap Pereya, oko Aristariko oko Sekunto pikap Sesolonika, oko Kayo citap Terpe, oko Timosewo oko Tukiko oko Trofimo pikap koretap Asia. 5Kupa cek kunto tay wokukanyec acek Troa. 6Nto om letutap sakwetap mukatyantet nye mokutunat, cenomene acek Filipi celany rapet, yoto cipe ciwany pesyosyek mut okoy wocenyorte cekto Troa wule kiwo cepeni ciwany wuloto pesyosyek tisap. 7Nteye kipesyetap Santey kosoleny ciruruckey acek wanak oko piko co kikoyen kyomisye cepetec mukatyantet. Yoto kuŋololyi Paulo piko, ntene kutosyikey kuŋalal okoy kupunto komoy kwen, omnye kinomen kuwecinikey tun ye koyekune. 8Kimite yoto tarinek ce caŋ ce kiloytos ce kimite koto nyepo parak wule kicirurukyikey acek. 9Kimite oyiperyontet ake nye cekure Eutiko nye kikipure ye kipo pastit; ntowo kutosyikey Paulo kuŋalal kuloyit, kunuc neto okoy kunamnta rwonto, yoto kusuwune koto nyepo somok nye mite koto parak okoy wokupir ŋony. Wocenäme ŋony nye kame. 10Kuwo Paulo kurekto lakwar oŋnkuputyi kokupuyekey kunäm oŋnkumwoy kule, “Osisie morirye, tokusopot cito!’’ 11Oŋnkulaŋnta Paulo kuwo koto parak oŋnkuwokupetec mukatyantet oŋnkwam. Yoto kutosyikey kuŋalal okoy kuyec koret ntonomene kuwecikey. 12Kukwer cekto oyiperyontonoto kuwo ka kukosop, kuŋerec cek ŋerekwek ce caŋ koromun. 13Cipe acek tay wule mite rapet, oŋnkyelany cipe okoy cepunte Aso. Omnye kicemöce kule wocilany Paulo rapet om wuloto. Kimwowec acek neto cipe kuyunyoto, omnye kiwo neto kupunte oret nyepo koret. 14Ntowo kunyorcec acek neto Aso, cilany kulany rapet oŋnkyenomen cipe okoy Mitulene. 15Cenomene wuloto om rapet, ntowo kuyekune cepunte koret nye tokyintos oko Kiyo. Nto pesyet nye kirupe cepunte Samo, nto pesyet nyepo somok cepunte Melito. 16Omnye kicäm Paulo kule akeyitye Efeso om rapet mente kot olilennkey om Asia. Omnye kisortokey lakwar kule ye kemukakay opunte Yerusalem ye pesyetap Pentekoste. 17Nteye kimite Paulo Melito kuyokto cito kuwo Efeso wokukur poyik cepo pikap Yiyintet kule kukwa kwokutuyo oko neto. 18Nteyu kowo kupun picoto, kumwoci Paulo cekto ŋalek kule, “Oŋnket akwek wule yunto kapurto nyimwani om pesyosyek tokol ce kicipurcine oko akwek kuceke pesyet nyepo tayta ye kyopunu ani Asia. 19Kyoyisye yisyenyu kuyu mutworintetap Mokoryontet om poypoyet oko lokik oŋnkopunte syemutok ce kikwontyo om rurumunekap Yutayek. 20Oŋnket akwek kule puryo kot awuŋenak ani akwek ŋolyo ake tokol nyepo latik nye muce kukalyak, kuyu wulo kyomwowok oŋnkanatek om taytap piko tokol oko om korikwok. 21Kyomwowu asowu koromun Yutayek oko lamek omwoci kule misyini kuweckey kwasta miyotyonik oŋnkuwekyikey wule mite Yiyintet oŋnkuyen Mokoryontet Yesu. 22Kunyo amite yawut oweti Yerusalem omnye aywey kupoyto Muyet Nyetilil nye puryo kot oŋnketi kito nye mosukwiyakay om wule amite ani om wuloto. 23Oŋnketi kule kukosowo Muyet Nyetilil om moŋosyek tokol ce kwopunte kule keno ani pate mopusi oko toŋoŋutek. 24Ntene asute soponmwani kuyu kiy nye puryo kot kuponto latik om wule amite ani, saŋet ayitite yisyetap poninekwani aŋnkawany yisyet nye kikono Mokoryontet Yesu; nye omwoytoy lokoywek ce toponec cepo poypoyetap Yiyintet. 25“Kyowesetote ani opunte wule amite akwek tokol, amwoytoy opuru poytoyisyetap Yiyintet. Kunyo oŋnket ani yawut kule puryo ci mpo akenke om akwek nye muce kot tokukäs ani yec. 26Kunyo omwowok owolikey pesyoni kule ye kopot citake tokol om akwek kupuryo kot kunyimwani lelisto mpo kisic. 27Omnye kyomwowok akwek nye puryo kot awuŋenak tukuk tokol ce kikwiyta Yiyintet. 28Akäste oripkey akwek nkit oŋnkorip piko tokol co kikonok akwek Muyet Nyetilil. Oyiku mesewekap pikap Yiyintet ce kiwec neto nkit kwek ceci om korotikap Werinyi nkit. 29Omnye aŋnketi kule ye konomen ani, mosukukwa wule omite akwek suyik ce koromec ce puryo kot kotuce kecirek. 30Mosukupunto pesyet nye mosukuŋet piko alake om kwenumwakwek kuŋalal ŋalek cepo mwiynan kuperper kumas piko co kikoyen kurup aretap picoto. 31Kunyo oripkey akäste, oŋnkasot oŋnket kule om lokik ce caŋ cepo komoy oko pet, kyanet ani asowu ci tokol om akwek kuwany kenyisyek somok. 32“Kunyo mopokokyok ani kuripok Yiyintet oko poypoyetap ŋolyontenyi. Neto nye mokutecak topon kukonok kupeyok ce kerkey oko cepo pikyi tokol. 33Kipuryo kot acorokyi pesya nyepo ci nto mpo sira. 34Oŋnket akwek tokol kule om yewuniyekwani cutecu kuce kyoyisye tukuk ce kipoyo oko piko co kicepontekey. 35Kyoporwok ani om tukuk tokol kule yisyet nyepo swama kunye aret nye roke cikalye acek piko co puryo kot kuponto swamet, cisoti ŋalekap Mokoryontet Yesu co kimwoy kule, ‘Mite ŋerekwek ce caŋ ye cepciytoy kupël ye cekoniŋ.’ ’’ 36Nteyu kowo kuŋalal Paulo okoy kuwany, kukutuny wanak oko cekto tokol oŋnkusom. 37Ntowo kuwany; kiriryo piko tokol oŋnkunäm kumot kuŋatut Paulo kupirci cämetapkey. 38Kinerekis piko yoto koromun om ŋalek ce kimwoy Paulo kule komo komuce cekto yec kukäse neto konyekwa. Yoto kupa cekto kuyomis Paulo okoy kupunto ye kimite rapet.

will be added

X\