Acts 2

1Ntowo kupunto pesyetap Pentekoste, kimite pesyonoto kukerurukyikey yeto akenke piko tokol ce kikoyen. 2Yoto pakenke kuco karumnta nye kicone torot nye kerkey oko yomat nye kiwuse om swamet nyewo koromun oŋnkunyiy koto tokol nye kimite kukepur cekto orit. 3Yoto kukäs cekto ce kerkey oko ŋelyepikap motik ce kaseret oŋnkopure moticoto metitap ci tokol om cekto. 4Yoto kunyor ci tokol Muyet Nyetilil oŋnkucec kuŋalal ŋelyepik alak kuyu wule kimukta kukoci Muyet Nyetilil ci ake tokol om cekto. 5Kimite yoto Yutayek ce kiminye Yerusalem, piko ce kiyweye Yiyintet ce kikikwane koret tokol kumukul. 6Nteye kotolime picoto karumnta nyoto, koruruckey wanak piko ce caŋ oŋnkukite tokol omnye kilim ci tokol kuŋolole piko co kikoyen om ŋelyepikwa. 7Kukite piko oŋnkumuyo oŋnkuŋalal kwicek nkit kumwoy kule, “Puryo kot ku pikap Kalilaya cekto cutecu ŋolole! 8Omne yec sicelim acek tokol ŋalek ce ŋolole cekto om ŋelyepta nyo kiceyitec acek? 9Ciku acek Parasik oko Metisyek oko Elamayek oko pikap Mesopotamia oko cepo Yuteya oko cepo Kapontokiya, oko cepo Pontia, oko cepo Asia, 10oko cepo Prukiya, oko cepo Pampiliya, oko cepo Misiri, oko cepo koretap Lipiya ce lekite moŋetap Kurene, oko toyek ce kwone Rom, wanak oko Yutayek oko lamek co kicäm tinitap Yutayek, 11Kirikik oko Arapuk. Kunyi celime acek cekto kuŋolole ŋelyepik kyacek yisyonutek cewoyec cepo Yiyintet.’’ 12Yoto kukite cek tokol oŋnkunŋalal kwicek nkit kutepekey kule, “Ŋolyo ne ŋolyontoni?’’ 13Ntene kucur piko alake piko co kikoyen kumwoy kule, “Kopokit picu komek ce mwonec!’’ 14Yoto kuyo Petero nye kipontokey kiyokik taman ok akenke, oŋnkunŋalal kukurto om kutit nyewo kumwoci luketap piko kule: “Merekyo akwek Yutayek, wanak oko akwek piko tokol ce minye Yerusalem, olimwo pa ani akwek topon koromun ŋalecu amöce kule omwowu. 15Puryo kot kupokit picu kuyu wulo osotitoy akwek; omnye mite yawut sawet somok nyepo kororn. 16Ntene ŋalecutecu kuce kiŋalale workoyontet Yower kumwoy kule, 17‘Mwowu Yiyintet kule, om pesyosyek cepo letut cokwoni mosayiy ani ŋalecu: Mosokoci Muyemwani piko tokol; mosikuŋorsyo werikwok oko tipikwok, mosukukäs oyiperikwok ŋoŋutok, mosukurwotyeci poyikwok kirwotik. 18Yunyoto, om pesyosyecoto mosokoci Muyemwani mpo mutworikwani moronik oko koruk, mosukuŋorsyo cekto. 19Mosoporu tukuk cepo kakitat om wulin po torot, oko pelutok ce cekite om wuli koret ŋony mosukutok korotik oko mata oko yetit nyewo; 20mosukuwälkey asista kutuyit kwek menon, oŋnkusalakay arawet kwek koroti, kutompo kot kapunto pesyet nyewo nye cikite nyepo Mokoryontet. 21Yoto ye mosicisop ci tokol nye kure kaynetap Mokoryontet.’ 22“Pikap Israel, alimnte pa ŋalecu! Yesu nyepo Nasaret kunye cito nye kiporwok akwek Yiyintet om yisyonutek ce kikwiy cepo kakitat oŋnkupo swamet oko pelutok ce kikwiy Yiyintet om wule mite neto, oŋnket akwek nkit ŋalecutecu, omnye kikwiyokis om wule omite akwek. 23Yiyintet nkit om cömisyenyi oko wule nketitoy neto nkit, kunye kicämnta keny kule roke anäm akwek Yesu; kunyo kyopar apakäc neto, omnye kyocämnte oŋnkokoyte kuwuyitoci piko co miyotec neto murtowontet. 24Ntene koŋet Yiyintet kututune met kunumune neto mwonintap met, omnye kipuryo kot komukoktos kunäm oŋnkurip met neto kwek mopusyo. 25Omnye kimwoy Tauti ŋalek ce nöme neto kule, ‘Oköse ani Mokoryontet kumite taymwani pesyosyek tokol, omnye mitowune neto yewumwani nyepo tay, sukuŋet mente kot atomtomen ani. 26Kunyo sukuŋet kupaypayit mukuleymwani, oŋnkuŋerec ŋelyepmwani, kunyo ponto pormwani kokenotet nyepo ŋerekwek; 27omnye puryo kot muci nyi yosyi soponmwani kopur kapkompic, oŋnkupuryo kot muci nyi yaste mutworinteŋuŋ nye tilil kunun. 28Kweporwo ani arosyek ce peti wule mite soponto, kunyo om tayŋuŋyi mesekono ani nyi ŋerekwek.’ 29“Mpo yeya! Omwowok ani akwek topon ŋalek ce nöme kukonyo nyewo Tauti, kule kime cemuy, kunyo mite mwenenyi nyo kicetupci ceköse acek okoy pesyoni. 30Kunyo ki workoyo, oŋnkinkete Tauti kirotyet nye kikurtoci Yiyintet neto. Kiwalkey Yiyintet kumwoy kule mosokoci cito akenke om kesenisyekap Tauti kopure ŋeceret kwek Kinko; kuyu wule kiyunto Tauti. 31Kikäs Tauti kito nye kimöce Yiyintet wokwiy om pesyosyek cepo tay. Yoto Kuŋalale ŋalek ce nöme kotutunetap metap Ŋapanet yo kimwowu kule, ‘Puryo kot cepokokyini neto kapkompic, Nto puryo kot kunun pornyi.’ 32“Kiŋet Yiyintet Yesu nyitenyi kotutune met, kunyo ceyiku acek tokol muncururwanik cepo manta ce nöme ŋalecutecu. 33Kicilaŋnta kuwo torot wokopurune yewutap tay nyepo Yiyintet, oŋnkunyor om wule mite Yiyintet Muyet Nyetilil kuyu wulo kikikurtoci Papanyi. Kunyo ŋalek cu oköse oŋnkolime akwek kuce kokoteywekyi ce kokonec kuroŋwec acek. 34Omnye kipuryo kot kulaŋnta Tauti kuwo torot; ntene mwowu neto nkit kule, ‘Kimwoci Mokoryontet Mokoryotenyu kule, Purune yu po yewumwani nyepo tay, 35okoy awec ani punikuk kopurune ŋonyutap kerenkokuk.’ 36“Kunyo möce kunket pikap kotap Israel tokol ŋalek cepo manta kule. Yesu nyitenyi nyo kyowuyitocini akwek murtowontet kunye kikoci Yiyintet kwek Mokoryontet oŋnku Ŋapanet!’’ 37Nteyu kowo kulim piko ŋalecata, kwam cekto mukuleywekwa. Yoto kumwoci cek Petero oko kiyokik alak kule, “Mpo yeya, mokyiy ne?’’ 38Kumwoci Petero cekto kule, “Arenynkey ayaste miyotyonikwok citake tokol om akwek, oŋnkokany cepatisanak om kaynetap Yesu Kristo, sukuŋet cinumunenok miyotyonikwok; mosonyoru akwek kokotutyet, nyoto ku Muyet Nyetilil nyepo Yiyintet. 39Omnye kikurtowok Yiyintet akwek oko lekokwok oko piko tokol ce mite wule low oko tokol ce kure Yiyintet kukwa wule mite neto.’’ 40Kurwokyi Petero kunkolontyi kumwoci kule, “Osorukey akwek nkit osopkey om toŋoŋutek ce kwotyini pikap pinitenyi masat!’’ 41Cepatisan om yoto piko ce kiyen ce kirice kupunto elifunek somok oŋnkuyomokey oko luketap piko ce kikoyen. 42Yoto kopurcin picoto pesyosyek tokol sukunete kiyokik cekto, oŋnkuyomokey wanak tokol sukupcicintos omikap Mokoryontet oŋnkusome okokoy. 43Kunäm muyotet ci tokol om tukuk cepo kakitat oko pelutok ce kikwiye kiyokik. 44Kuyomokey wanak piko tokol co kikoyen om cömisyet oŋnkusankan tukuk tokol ce kiponto ci tokol. 45Kwalya tukukwa oko tukuk alak tokol ce kiponto oŋnkuyomo wanak sukupcicintos kuyem kuyu wule kimoktoy ci tokol. 46Kutosyikey cek kuyu yete pesyo kutuytos wanak tokol kuyu luket akenke om kotap Yiyintet oŋnkwomncitos omik wanak om korikwa. Kwomisyi omik om ŋerekwek oko om mukuleywek ce poypoy. 47Kukostoy cekto Yiyintet oŋnkuponto cömisyet nyewo nye kicöme piko tokol. Kutosyini Mokoryontet pesyosyek tokol kuyomo wanak oko cekto piko ce kimite cisope.

will be added

X\