Acts 19

1Nteye kimite Apolo Korinso, yoto kuwo Paulo kupunte kwenutap koret okoy kupunto Efeso. Kunyorta wuloto konomik alak. 2Yoto kutepe Paulo cekto kule, “Kyonyoru akwek Muyet Nyetilil yo kyoyeni?’’ Kuwec cut kumwoy kule, “Puryo! Tompo mpo kot celim acek kule mite Muyet Nyetilil.’’ 3Kutepe Paulo cek kule, “Kunyo kicepatisanak akwek patisanet oŋnkono?’’ Kuwec kumwoy kule, “Potisonisyetap Yowana.’’ 4Kumwoy Paulo kule, “Potisonisyetap Yowana kunye kipo piko ce renyekey kwasta miyotyonikwa; kunyo kimwoci pikap Israel kule misyini kuyen cekto neto cito nyo coni om letunyi, nyoto ku Yesu.’’ 5Ntowo kulim cekto ŋalecato cepatisan om kaynetap Mokoryontet Yesu. 6Yoto kukemer Paulo yewuniyekyi metewokwa, kunyor cekto Muyet Nyetilil; kicec kuŋalal ŋelyepik alak oŋnkumwayta lokoywekap Yiyintet. 7Kipuntoy picoto ce kirice tokol taman ok oyeny. 8Kuwany Paulo wuloto orok somok kuweti kotapkok oŋnkuŋololyini piko om nyikanatet. Kutintentyin oko cekto oŋnkusyem kumwoci ŋalek cepo poytoyisyetap Yiyintet. 9Ntene kutoyis piko alake kuwuryo oŋnkutay meyen oŋnkumwoy ŋalek ce miyotec kumwoci piko ce rupe aretap Yiyintet om taytap piko tokol. Yoto kuŋet Paulo kupakakta cek, kukwey oŋnkuweto piko co kikoyen oŋnkuŋololyi kunet cek pesyosyek tokol om sukulutap Turano. 10Kutosyikey Paulo kwiyis kuyunyoto kuwany kenyisyek oyeny okoy kulim piko tokol ce kimite Asia ŋolyontetap Mokoryontet Yesu, Yutayek wanak oko Kirikik. 11Yoto kwiy Yiyintet tukuk cepo kakitat kupël cepo kwak kupunte yewuniyekap Paulo. 12Okoy cesute mpo tamparinekyi oko sirok ce kitiny porto, cesutyini piko ce mnyontos, kusopco porwonikwa oŋnkuŋetyo kupete oyik ce miyotec. 13Yoto kucec Yutayek alake cepsokeyisyek ce kipesetoti sukukwetoti oyik, kusyem mpecek kukwet oyik ce miyotec om wule piko ce kiponto oyik kwiyisye kaynetap Mokoryontet Yesu. Kumwoci cekto oyik kule, “Okwetok ani akwek om kaynetap Yesu nyo mwoytoy Paulo.’’ 14Piko ce kikwiye kuyunyoto ku werik tisap cepo Yutoyintet tisintet nyewo nye kicekure Sekewa. 15Ntene kuwekyi oyik ce miyotec kumwoci kule, “Onŋket ani Yesu, oŋnkonket mpo Paulo, nto akwek ku ŋo?’’ 16Yoto kuran cito nyo kiponto oyik oŋnkuporye cek tokol om swama okoy kupël kukwet kumwey kupa saŋ püc nye puryo kot kupunto sirok oko mwoyok ce kanyor. 17Kulim oŋnkunket ŋalecato piko tokol ce kiminye Efeso, Yutayek oko Kirikik. Kumuyo tokol koromun oŋnkukasta kuywey kaynetap Mokoryontet Yesu. 18Kukwa piko ce caŋ co kikoyen oŋnkwokumwoy kutor om tayta piko tokol tukuk ce miyotec ce kikwiy cekto. 19Kusut mpo piko tokol ce kitepe sokeyek kitapunekwa oŋnkoruruc wanak oŋnkupele taytap piko tokol. Ntowo ciyit pesanik ce kiyeme kyale kitapunecato tokol kupunto silinkinek Elifunek konom. 20Om aret nye yunyoto nyepo swama, yoto kutosyikey kuner kucäm piko ce caŋ ŋolyontetap Mokoryontet oŋnkukwilakay kupoyit swama koromun. 21Nto om letut yu kowo kwiyokis ŋalecato, kusot Paulo om moyenyi kule mawo opunte Maketoniya oko Akaya, oŋnkowo okoy Yerusalem, kumwoy yoto kule, “Ye kopunte wuloto, mosowo yec mpo okoy wakäs Rom.’’ 22Kuyokto kokolyoykyi oyeny Timosewo oko Erasto kunyosyo kupa Maketoniya, oŋnkupeni neto kupur koretap Asia kuwany pesyos ce ŋeri. 23Om pesyosyecoto ye kitoku cukurotet nyewo om Efeso om wule mite piko co rupe aretap Mokoryontet. 24Kimite wuloto citake nye cekure Temetrio nye kitonye karik ce kiyuytye kotap Yiyintet korko nye cekure Artemi; nye kinyoru piko ce kikwicini neto yisyonoto pesanik ce caŋ. 25Yoto kukur koruruc pikyi ce kyiyisyi oko piko alak ce kikwiye yisyet nye kerkey oko nyenyi oŋnkumwoci kule, “Merekyo, oŋnket akwek kule cenyortoy acek mokoryontinyo yisyoni, 26kunyo kwakäs oŋnkolim akwek nkit ŋalek ce yiye cici cekure Paulo, nyi mwocini piko kule, Yiyik ce kerkeyik co kikwiye piko kuce puryo kot kupo manta mpo kisic. Kunyo kokomukta kot kuwec piko ce caŋ, puryo kot ku wuli po Efeso nkit pate, ntene karik kunäm koretap Asia tokol. 27Kunyo mite kaŋoyenotet kule mosukuwur kamonkesyentini nyacek oŋnkunyor kaynet nye miyat. Puryo kot kuyo mpo nkit pate, ntene oko yec kule mosiciwurta kupot woyinnyi nye soye ci tokol om Asia oko koret tokol kumukul!’’ 28Nteye kotolime piko tokol ŋalecato, kunyer oŋnkucec kupol kumwoy kule, “Nyewo Artemi nyepo Efesoyek!’’ 29Kutisto polotet nyewo kunäm moŋet tokol; kurway cek oŋnkunäm Kayo oko Aristariko pikap Meketoniya ce kipontotikey oko Paulo, oŋnkukwer lakwar okoy kupunto kotap arerosyek. 30Yoto kumäc Paulo nkit kule awo wule mite piko, ntene kuyete piko co kikoyen. 31Kuyok ŋalek piko alake cewoyec cepo koret ce kicoronutekap Paulo kumwoci kule mente kot kuco cokuporkey om kotap arerosyek. 32Yoto kupol piko om kirwoket koromun; kumwowu alake ŋalek alak, kumwowu alake ŋalek alak, omnye kikiwur kirwoket nye kipuryo kot kunkete piko ce caŋ kule ŋolyo ne nye kerurukyikey cekto. 33Yoto kucämnta piko alake kule Alekisanta nyepo ŋalecu, omnye kikwer Yutayek neto kuco cokuyoŋe tay. Yoto kuwuse Alekisanta piko yewuniyekyi kule kusisio saŋalal asyem ayetkey. 34Ntowo kunket piko kule Yutoyintet neto, kupol tokol om kutit akenke kuwany sawanik oyeny kupole kumwowu kule, “Nyewo Artemi nyepo Efesoyek!’’ 35Nto om letut komuc Koronintet nyepo moŋet kuŋololyi piko okoy kusisio. Nteyu kowo kusisio piko, kumwoy neto kule, “Pikap Efeso, ŋo cito nye puryo kot konket kule, moŋetap Efeso, kunye ripe kotap Yiyintet nyewo Artemi oko rwantet nyetilil nyo kusuwune torot. 36Puryo ci nye muce kot kutintentyi tukucutecu. Kunyo misyini osisie, monte cimomnci kot oyiy kiy nye miyat. 37Omnye kokweru akwek picu kukwa yu, ce puryo kot kunyapan tukun cepo kotap Yiyintenyo nto mpo kucup Yiyintenyo nye korko. 38Kunyo ye ponto Temetrio oko pikyi co toŋsi ŋolyo nye ŋunye om wule mite citake tokol, mite pesyosyek co cemute musankunek oko poytoyik co mute musankunek roke wokuwosontyinekey cek wuloto. 39Nteye mite ŋalek alake ce omöce akwek ce pële co, mosicirwoke ŋalek coto kokwetap pikap koret nyepo kwak. 40Omnye ciŋoyeni kule muce cewosontyec acek om pararetap ŋalek ce kokwiyokis pesyoni. Puryo kot cimuce kot cikalyec acek om polotoni, kunyo moceponte ŋolyo nye cimuci cemwowu ceyetekey.’’ 41Nteyu kowo kuŋalal kuyunyoto okoy kuwany, kuyomis kumwoci piko kuseret kupecikey.

will be added

X\