Acts 18

1Om letutap ŋalecato, kunomen Paulo om Asene kuwo okoy Korinso. 2Wokunyor om wuloto Yutoyintet nye cekure Akwila nye kiceyici Ponto nye kitokucone Italia oko korkenyi Priskila. Omnye kikwetune Kinko Nyewo Klautiyo Yutayek tokol kuŋete Rom. Kuwo Paulo wokukäs cekto. 3Oŋnkopurcin kwiyis tokol omnye kikwiyisyi Paulo yisyet nye kerkey oko nye kikwiye cekto kunope wemanik sukuŋet kunyor pesanik ce kolyekey. 4Kuŋalale Paulo kotapkok pesyosyek tokol ye pesyetap Sapat kutintentyin oko cek kusyem kule acutu kuyen Yutayek oko Kirikik. 5Ntowo kupun Sila oko Timosewo kukwane Maketoniya. Kwiyis Paulo pesyosyek tokol nye puryo kot kwiye yisyet ake kumwoytoy lokoywek kuporcini Yutayek kule Yesu kunye Ŋapanet. 6Nteyu kowo kutay cek ŋalekap Paulo oŋnkumwoci ŋalek ce miyotec, kunäm Paulo sirokyi oŋnkulelekyi tertitap sirok oŋnkumwoci kule, “Ye kopotye akwek, kwakwek nkit ce nömok lelisto! Puryo kot ku ani. Kuceke yawut pesyoni kuwo tay, mosowo ani womwoci lokoywek lamek.’’ 7Yoto kunomen kupakakta cekto oŋnkuwo wokopurune kotap lomintet ake nye kisoye Yiyintet nye kicekure Tito Yusto nye kilekite kanyi kotapkok. 8Kuyen Krispo nye kinyewo nyepo kotapkok kuyen Mokoryontet wanak oko pikap kanyi tokol. Kulim pikap Korinso alake ce caŋ lokoywek okoy cepatisan cekto. 9Nto mite kwomowut ake, kukäs Paulo ŋoŋutyet nye kimwoci Mokoryontet neto kule, “Mente amuy, tosyikey ŋalal mente asis, 10omnye opontekey ani oko nyi, puryo ci nye muce kuporyeniŋ kowurtiŋ, omnye oponte ani pikwani ce caŋ ce mite moŋoni.’’ 11Yoto kopur Paulo wuloto kuwany kenyit akenke oko orok lö kunete piko ŋolyontetap Yiyintet. 12Ntowo cekwey Kalio kwek poytoyintetap Akaya, yoto koruruckey Yutayek oŋnkunäm Paulo kukwer kuwo kok wokuwosontyi. 13Kumwoy cek kule, “Cici kunye syeme kule aŋem amas piko sukuŋet kusay Yiyintet om aret nye puryo kot kucöme ntarastinek!’’ 14Nteyu kikirik kucec kuŋalal Paulo. Yoto kumwoci Kalio Yutayek kule, “Nto komite lelis nye miyat nto ŋolyo nye miyat nye kociwurta nto kamuyte ani olimwok topon akwek Yutayek. 15Ntene omnye mite pate tintenotet nyepo ŋalekap koyenotet oko ntarastinekwakwek, möce akäs oŋnkamut akwek nkit, omnye puryo kot oyiku ani ketintetap ŋalek ceyuco!’’ 16Yoto kukwet Kalio cek kupete kokwet. 17Kurotyi piko tokol kunäm Sosene nyewo nyepo kotapkok oŋnkupir om taytap kokwet. Ntene om coto tokol, kusisyecikey Kalio kuyu nye mokiy nyepo lat. 18Yoto kopur Paulo Korinso kuwany pesyos ce caŋ kupontokey oko mpo yeya piko co kikoyen nto pestos. Oŋnkunomen kulany rapet oko Akwila oko Priskila kupa okoy Siriya. Nteye kitompo kunomen Paulo kuwalkey om Kenseria oŋnkurwac metinyi. 19Yoto kupunto Efeso wule kipokokyi neto Akwila oko Priskila, oŋnkuwo nkit okoy kotapkok oŋnkutintentyin oko Yutayek. 20Kusom cek Paulo kule cipur tokol oko neto kuloyit. Ntene kutay. 21Nteye kimite kunomene kumwoci kule, “Ye kacäm Yiyintet mosoweckey ani aco wule omite akwek.’’ Kunomene Efeso kulany rapet. 22Ntowo kurekune Kaysariya kuwo kulaŋnta Yerusalem wokusupay pikap Yiyintet; oŋnkunomen kuwo Antiyok. 23Kopur Paulo wuloto pesyos ce ŋeri nto nomene kuwo kupunte korosyekap Kalatiya oko Prukiya kuŋololyinoti kukwil piko tokol co kikoyen. 24Yoto kuco okoy kupun Efeso yutoyintet ake nye cekure Apolo nye kiceyici Alekisantaria, nye kiŋolole kutok topon oŋnkusumanat nye ŋom nye kinket koromun silutekap Yiyintet. 25Kikikonetkey neto konket ŋalekap aretap Mokoryontet. Yoto om ŋerekwek ce caŋ oko mukuleyto nye topon kuŋalal Apolo kunetis topon ŋalek ce nöme Mokoryontet Yesu. Ntene kinket neto pate potisonisyet nyo kinete Yowana. 26Kucec kuŋalal om nyikanatet om kotapkok. Nteye kotolime Priskila oko Akwila ŋalekyi, kukwer kuwo komwa oŋnkuwo kunet kuporci topon ŋalek cepo aretap Yiyintet. 27Nteyu kowo kunket mpo yeya piko co kikoyen cepo Efeso kule möce Apolo kule ayay ruretyet okoy opunte Akaya, yoto kukalya kusilyi parwet nye kosutyi mpo yeya piko co kikoyen ce kimite wuloto kumwoci kule kuŋerekyi neto. Ntowo kupunto Apolo wuloto, kwiyis topon kwek kokolyoyintet nyewo om wule mite piko co kikoyen kupunto poypoyetap Yiyintet 28Omnye kitinten om swamet nyewo koromun okoy kupël Yutayek om taytap piko tokol, kuŋalal kupor kukwane silutekap Yiyintet kule, Yesu kunye Ŋapanet kupoyit manta.

will be added

X\