Acts 17

1Kunomen cekto poninekwa kupunte koretap Ampipoli oko Apoloniya okoy kupunto Sesolonika wule kimite kotapkok nyepo Yutayek. 2Kuyu wule kiyunto kopurtap Paulo, yoto kowut kotapkok kuwany Sapatinek somok kutintentyintos oko Yutayek kuporcini ŋalek ce kinumune wule mite silutekap Yiyintet, 3ce mwowu kupor manta kule mosukutaŋany Ŋapanet, oŋnkyiŋet kotutune met. Kumwoy kupor kule, “Yesu nyitenyi omwowok ani akwek kunye Ŋapanet.’’ 4Yoto kayen Yutayek alake oŋnkuyomokey oko Paulo oko Sila, oko mpo luketap Kirikik ce caŋ co soye Yiyintet oko koruk ce tokunotin ce caŋ. 5Ntene kucorok Yutayek oŋnkoruruc piko sokoranik ce kiwur om moŋet oŋnkupol om moŋet tokol kumukul. Yoto kupa wokuput kurketap kotap Yason kusyeme kule cenyoru Paulo oko Sila sukuŋet cekweru kukwa wule mite piko. 6Ntene kipuryo kot wokunyor. Kunam Yason oko mpo yeya alak oŋnkucut kukwer wule mite poytoyikap moŋet, oŋnkupol kumwoy kule, “Kokowurta picu koret wulyo tokol! Kunyi kakwa okoy moŋenyacek? 7Kunyi Yason nye kurip picu kwek toyekyi om konyi. Yiye picu tokol ŋalek ce yirye ntarastinekap Kinko Nyewo kumwowu kule mite yec kinko ake nye cekure Yesu.’’ 8Ntowo kulim piko oko poytoyikap moŋet ŋalecato; kunyer kupol kukwanykwanynkey. 9Nto om letut yu kowo konomune cek Yason oko piko alak pesanik ce keyoŋe, kwasta kupecikey. 10Ntowo kwimen kutuyit koret, kuyomis mpo yeya co kikoyen Paulo oko Sila kupa Pereya. Ntowo kupunto woloto kowut kotapkok nyepo Yutayek. 11Kisiken pikap wuloto kupël piko cepo Sesolonika, omnye kilimnta cek lokoywek om ŋerekwek, oŋnkusuman kukir silutekap Yiyintet pesyosyek tokol sukuŋet kukäs kule po manta ŋalek ce kimwowu Paulo. 12Yoto kuyen piko ce caŋ, oŋnkuyen mpecek Kirikik koruk ce tokunotin oko moronik ce caŋ. 13Ntowo kulim Yutayek cepo Sesolonika kule kumwayte Paulo ŋolyontetap Yiyintet Pereya, yoto kukwa cek okoy wuloto oŋnkwokucec kowurur luketap piko. 14Yoto pakenke lakwar, kunäm mpo yeya co kikoyen Paulo oŋnkuyomis kuwo koret nye mite ruretyet tapan. Ntene kuŋetune Sila oko Timosewo Pereya. 15Kupetakey Paulo piko co kiyomise neto okoy kupunto tokol Asene. Oŋnkuketitakey cut kupa okoy Pereya. Kumwoci Paulo cek kunkolontyi kule womwoci Sila oko Timosewo kukwa kusorkey lakwar okoy kupun wule mite neto ye kemukakay. 16Nteye kimite Paulo kukonye Sila oko Timosewo om Asene, yoto kunyer mukuleynyi koromun yu kowo kukäs kerkeyik ce caŋ ce kimite moŋet kumukul. 17Yoto kutintentyin neto oko Yutayek oko lamek co soye Yiyintet om kotapkok, oŋnkutintentyin pesyosyek tokol oko piko ce kituytos oko neto wulo po matepo. 18Kutintentyin oko mpo piko muswokik alak cepo Epikuronik oko Stoyik. Kumwoy alake kule, “Syeme mwaskeyantani menket kiy tokol kule omwowu ne?’’ Kumwoy alake kule, “Yunye syeme kule aŋalale anet ŋalekap Yiyikap korosyek alak.’’ Kimwoy cek kuyunyoto, omnye kimwoytoy Paulo ŋalek ce nöme Yesu oko kotutunetap met. 19Yoto kukwer cek Paulo okoy kokwet nye kipure ye cekure Areopako, oŋnkumwoy kule, “Cemöce acek kule cinket konetisyoni lel nyi ŋolole nyi. 20Omnye tokulelac nye tompo kot celim acek ŋalecu ŋolole nyi, kunyo cemöce cinket poru ne?’’ 21Omnye kipuryo kiy ake nye kikwiye pikap Asene oko toyek ce kiwuci kumiŋis wuloto, ntene kiŋolole oŋnkulimntoy ŋalek ce kutokutoku. 22Yoto kuyoŋe Paulo taytap kokwet om Areopako oŋnkuŋalal kumwoy kule, “Pikap Asene! Kwakäsak ani akwek om tukuk tokol kule oyiku pic ce osoye Yiyik koromun. 23Omnye ye kwomite owesetoti opuntote moŋemwoŋ akäs oteputek wule cepele korosek okoy onyoru otepto ake nye mite silutek ce kicesil kule, ‘Po nyi Yiyintet nye mocinket.’ Kunyo nyoto mocinket nyo osoye akwek nka kot monketi kunye Yiyintet nyoto nye omwowok ani akwek. 24Yiyintet nyoto kunye kitany koret kumukul oko tukuk tokol ce mite koret, nyoto kunye Mokoryontet nye poytoy torot oko ŋony. Ntene puryo kot kuminye korik ce kitece piko yewuniyekwa, 25oŋnkupuryo kot kumöce kiy ake nye koyici piko neto om yewuniyekwa kuyu nye panan. Omnye neto nkit nye kocini piko tokol soponto oko komuŋnto oko tukuk alak tokol. 26Kinyosyo kunyo kutany cito akenke nye kiyi piko tokol om koret tokol kumukul. Neto nkit nye kiyoyec kenyisyek oŋnkusat kiyotonik tokol om koret wule ŋete wule minye piko. 27Kikwiy kuyunyoto kule sukuŋet piko kuceny kutaptapat nto sukunyor cek neto. Ntene ŋalek cepo manta kucu kule, puryo kot kumite Yiyintet wule low om wule mite ci tokol om acek. 28Omnye, ‘Cesoptosi acek, oŋnkyepesetoti, oŋnkyemite koret om kamukeywekyi.’ Kuyu wulo kimwoy mpo piko alake ŋololikap ceptyonkocok cikwakwek kule, ‘Ciku mpo acek lekokyi.’ 29Kunyo ye ciku lekokyi, kupuryo kot kuroke cisot kule Yiyintet ku kiy nye kerkey oko kerkeyin nye karin nye lekecece nto rwa nye kikwiy piko kupul om ŋomnon. 30Kunyo kikwasta Yiyintet nye kipuryo kot kumany om pesyosyek co kitil ye kipuryo kot kunket piko. Ntene mwowu yawut kumwocini piko cepo koret tokol kuweckey oŋnkurenynkey kwasta miyotyonik. 31Omnye kikwey neto pesyet nye mosukuwosontyine ci ake tokol nye mite koret tokol kumukul oŋnkumutyi musankut nyepo manta om kamukeywekap cito nyo kikwey neto nkit. Kikopor ŋalecu kupoyit manta om wule mite ci ake tokol, omnye kiŋet cicoto kotutune met.’’ 32Nteye kotolime piko alake kuŋolole Paulo ŋalek ce nöme kotutunetap met, kurorici cek neto. Ntene kumwoy piko alake kule, “Cemöce acek kule celim ŋolole nyi ŋalecu yec pesyet ake.’’ 33Yoto kunomen Paulo kuŋete kokwet 34Ntene kuyen alake oŋnkuyomokey oko neto, cekto coto ku mpo Tionisio nye kikirwokintet om kokwetap Areopako, oko korko nye cekure Tamari oko piko alak.

will be added

X\